នៅវិមានរដ្ឋសភា មានការជួបជុំនៅក្នុងអង្គសិក្ខាសាលាមួយរវាង សមាជិករដ្ឋសភា ក្នុងគណៈកម្មការសុខាភិបាលសង្គមកិច្ច អតីតយុទ្ទជន យុវនិតិសម្បទាការងារបណ្តុះបណ្តាលវិជ្ជាជីវៈ និងកិច្ចការនារីជាមួយ អង្គការអាយអូជីធី និងមជ្ឈមណ្ឌលភីឌីភីព្រមទាំង បណ្តាផ្នែកពាក់ព័ន្ធមួយចំនួនទៀត ដើម្បីរិះរកវិធានការចូលរួមកាត់បន្ថយការប្រើប្រាស់គ្រឿង ស្រវឹងនៅកម្ពុជា។ បញ្ហាគ្រឿងស្រវឹងមិនត្រឹមតែជាបញ្ហាកង្វល់របស់ប្រទេសកម្ពុជាមួយ ប៉ុណ្ណោះទេ ប៉ុន្តែវាក៏ជាបញ្ហាកង្វល់រួមជាសាកលផងដែរ។ យោងតាមរបាយការណ៍អង្គការសុខភាពពិភពលោកឆ្នាំ២០០៧ បានបង្ហាញថា អ្នកប្រើប្រាស់គ្រឿងស្រវឹង នៅលើពិភពលោកមានប្រមាណ២០០០លាននាក់។គ្រឿងស្រវឹងបានបង្ករ អោយមនុស្សស្លាប់ប្រមាណ៣.៧ភាគរយ និងកើតមានជំងឺប្រចាំកាយប្រហែល៤.៤ភាគរយ។
លោកជំទាវ ហូ ណូន ប្រធានគណៈកម្មការសុខាភិបាលសង្គមកិច្ចអតីតយុទ្ទជន យុវនិតិ សម្បទាការងារបណ្តុះបណ្តាលវិជ្ជាជីវៈ និងកិច្ចការនារី បានលើកឡើងក្នុងអង្គសិក្ខាសាលានេះថា ដើម្បីចូលរួមកាត់បន្ថយការប្រើប្រាស់គ្រឿង ស្រវឹងនៅកម្ពុជារដ្ឋសភាកម្ពុជា បានអនុម័តនូវច្បាប់ ពាក់ព័ន្ធ ដូចជាច្បាប់ស្តីពីចរាចរណ៍ផ្លូវគោកដែលច្បាប់នេះ បានហាមប្រាមដាក់ពិន័យ និងផ្តន្ទាទោសចំពោះអ្នកប្រើប្រាស់គ្រឿងស្រវឹងក្នុងពេលបើកបរ។ ជាមួយនេះ រាជរដ្ឋាភិបាលតាមរយៈ ស្ថាប័នពាក់ព័ន្ធ បានដាក់ចេញនូវចរាចរ និងសេចក្តីណែនាំព្រមទាំងចាត់វិធានការផាកពិន័យ យ៉ាងតឹងរឹងជាបន្តបន្ទាប់ ហើយការដាក់ចេញនូវគោលនយោបាយភូមិ-ឃុំមានសុវត្ថិភាពរបស់រាជរដ្ឋា ភិបាលក៏ជាការ ប្តេជ្ញាចិត្តមួយទៀត ដើម្បីកាត់បន្ថយការសេបគ្រឿងស្រវឹង។កន្លងមកនេះ រដ្ឋសភាកម្ពុជាបានអនុម័តច្បាប់ទប់ស្កាត់ការប្រើប្រាស់គ្រឿង ស្រវឹង និងកាត់បន្ថយគ្រឿងស្រវឹងនៅកម្ពុជា៕