កំពង់ធំ ៖ គ្រោះថ្នាក់ចរាចរ មួយបានធ្វើឲ្យមានការភ្ញាក់ផ្អើលដល់ប្រជាពលរដ្ឋនៅក្នុងផ្សារស្រយូវ ដោយសារតែមានរថយន្តសេរីទំនើបមួយគ្រឿងបានជ្រុលសចង្កូតមកបុករះ តូបបង្អែម និងតូបលក់ផ្លែឈើ ម្ចាស់តូប រត់ព្រលឹងចុងសក់ សំណាងល្អមិនបណ្ដាលឲ្យមានមនុស្សគ្រោះថ្នាក់ដល់ជីវិត។
ហេតុការណ៍នេះបានកើតឡើងកាលពីរសៀលវេលាម៉ោង ១នាទី នៅថ្ងៃទី ១១ ខែ កញ្ញា ឆ្នាំ ២០១២ នៅចំនុចភូមិ ប៉ុកយ៉ុក សង្កាត់ស្រយូវ ក្រុងស្ទឹងសែន ខេត្តកំពង់ធំ មានរថយន្តមួយគ្រឿង ប្រភេទ រថយន្តសេរីខ្ពស់ គេនិយមហៅថា អាក្រពើ ពណ៌ ស្ករ ពាក់ស្លាកលេខ ភ្នំពេញ 2I-1200 បានបើកបុករះនៅ ចំនុចមុខផ្សារស្រយូវ បណ្តាលឲ្យតុលក់បង្អែម និងលក់ផ្លែឈើមុខផ្សារ ត្រូវបានក្រពប់ដូចគេជះចោលទាំង ស្រុង ហើយរថយន្តបានរអិលទាំងទទឹងទៅទើរក្នុងរោងរបស់ផ្សារ សំណាងល្អករណីនេះ មិនបណ្តាលឲ្យមានមនុស្សស្លាប់ តែទោះយ៉ាងណា ក៏បានធ្វើឲ្យអ្នកលក់បង្អែម និងលក់ផ្លែឈើ របួសធ្ងន់ម្នាក់ ស្រាល ម្នាក់ ក្នុងនោះត្រូវបានគេស្គាល់ឈ្មោះ ឃុត លីមៃ ភេទ ស្រី អាយុ ១៦ឆ្នាំ ទទួលរងរបួសស្រាល រស់នៅភូមិ ភូមិត្រពាំងវែង សង្កាត់ ស្រយូវ ខេត្តកំពង់ធំ និងម្នាក់ ឈ្មោះធិន គឹមធី ភេទ ប្រុស អាយុ ១៧ឆ្នាំ រស់នៅភូមិ កើតហេតុ របួសធ្ងន់ បែកក្បាល និងបាក់ដៃ។
ក្រោយពីកើតហេតុ ត្រូវបានលោក អនុសេនីយ៍ឯក គុំ គឹមអុន កំលាំងនៃអធិការដ្ឋាននគរបាល ក្រុងស្ទឹងសែន សហការជាមួយកំលាំងផ្នែក កំលាំងសង្កាត់កំពង់ស្វាយ កំលាំងខណ្ឌរដ្ឋបាលព្រៃឈើកំពង់ធំ បានចុះទៅពិនិត្យនៅក្នុងរថយន្ត ប្រទះឃើញមានឈើគ្រញូង ជាច្រើនកំណាត់ ដែលមានមុខ២៥ទៅ ៣០ ជាច្រើនសន្លឹកបានផ្ទុកនៅក្នុងរថយន្ត ចំណែកតៃកុងរថយន្តក្រោយពីកើតហេតុបាន ចេញពីរថយន្តហើយ ដាក់មេប្រូចបាត់ស្រមោល ។
លោក អនុសេនីយ៍ឯក គុំ គឹមអុន កំលាំងនៃអធិការដ្ឋាននគរបាល ក្រុងស្ទឹងសែន បានឲ្យដឹងថា រថយន្តត្រូវបានយកមករក្សាទុកនៅអធិការ ចំណែកឈើដែលមានចំនួន ជិត២០ដុំ ត្រូវបានប្រគល់ឲ្យទៅជំនាញរដ្ឋបាលព្រៃឈើ ខេត្តកំពង់ធំ រក្សាទុក៕
ប៊ុនរដ្ឋា