ភ្នំពេញ: លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានថ្លែងថា ជាមួយនឹងផលប្រយោជន៍ដ៏ធំធេង ដែលវិស័យទេសចរណ៍បាននាំមកដើម្បីរួមចំណែកដល់ការអភិវឌ្ឍសេដ្ឋកិច្ចសង្គម និងបរិស្ថាន វិស័យទេសចរណ៍ក៏តែងបាននាំមកនូវផលប៉ះពាល់ជាអវិជ្ជមានផងដែរ ដូចជា គ្រឿងញៀន ឧក្រិដ្ឋកម្ម ពេស្យាកម្ម។ល។ នេះបើតាមគេហទំព័រក្រសួងទេសចរណ៍ ចេញផ្សាយថ្ងៃទី២៤ ខែសីហា ឆ្នាំ២០១២។
លោករដ្ឋមន្ត្រី ថោង ខុន បានថ្លែងបែបនេះ នៅក្នុងពិធីចុះអនុស្សរណៈ នៃការយោគយល់គ្នា រវាងក្រសួងទេសចរណ៍ និងអង្គការទស្សនពិភពលោកកម្ពុជា ស្តីពី គម្រោងកុមារភាព-ផ្នែកបង្ការ ដែលជាជំនួយរបស់ទីភ្នាក់ងារអូស្រា្តលី សម្រាប់ការអភិវឌ្ឍអន្តរជាតិ (AusAID) ត្រូវបានចុះហត្ថលេខាដោយលោក JASON EVANS ប្រធានអង្គការទស្សនពិភពលោកប្រចាំកម្ពុជា និងលោក ហោ សារុន អនុរដ្ឋលេខាធិការក្រសួងទេសចរណ៍ នាព្រឹកថ្ងៃទី២២ ខែសីហា ឆ្នាំ២០១២ នៅ សណ្ឋាគារឡឺរ៉ូយ៉ាល់ ដោយមានការចូលរួមរបស់លោក ថោង ខុន រដ្ឋមន្ត្រីក្រសួងទេសចរណ៍ និងលោកស្រី PANNY RICHARDS ឯកអគ្គរដ្ឋទូតអូស្ត្រាលី ប្រចាំកម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា នៅកម្ពុជា ភ្ញៀវទេសចរភាគច្រើនបានមកទស្សនាប្រាង្គប្រាសាទ ដែលជាកេរមរតក និងស្នាដៃរបស់មនុស្សជាតិដ៏គួរឱ្យស្ញប់ស្ញែង និងពិសេសប្រាសាទអង្គរ ដែលជាបេតិកភណ្ឌ ពិភពលោកដ៏ល្បីល្បាញ ទស្សនានិងកម្សាន្តតំបន់ឆ្នេរសមុទ្ទដ៏ស្រស់ស្អាតរបស់កម្ពុជា ទស្សនាភាពស្រស់ត្រកាលនៃតំបន់ទេសចរណ៍ធម្មជាតិ សត្វផ្សោតទន្លេមេគង្គ តំបន់អេកូទេសចរណ៍ដ៏ទាក់ទាញជាច្រើនទៀត។
តែទន្ទឹមនឹងនេះ លោករដ្ឋមន្ត្រី ថោង ខុន បានលើកឡើងថា ដូចជានៅក្នុងប្រទេសមួយចំនួនក្នុងពិភពលោកផងដែរ នៅកម្ពុជា ក៏យើងសង្កេតឃើញនៅមានភ្ញៀវទេសចរមួយចំនួនបានបង្កនូវភាពអសកម្មមួយចំនួន ដូចជា គ្រឿងញៀន ការកេងប្រវ័ញ្ច និងរំលោភបំពានផ្លូវភេទលើកុមារ ដែលនេះជាកង្វល់មួយរបស់ពិភពលោក ក៏ដូចជា រដ្ឋាភិបាលកម្ពុជា ដែលកំពុងទទួលរងគ្រោះដោយអំពើល្មើសច្បាប់ ការរំលោភបំពាន និងអំពើអមនុស្សធម៌។
ប្រភពដដែលបន្តទៀតថា ផ្តើមចេញពីស្ថានភាពជាក់ស្តែង និងដើម្បីទប់ស្កាត់ និងជម្នះ បាននូវភាពអសកម្មទាំងនេះ រាជរដ្ឋាភិបាលកម្ពុជាបានបង្កើតនូវច្បាប់បទប្បញ្ញត្តិ ជាច្រើន ដូចជា ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ច្បាប់ ស្តីពីការត្រួតពិនិត្យគ្រឿងញៀន ច្បាប់ការងារ ច្បាប់ ស្តីពីទេសចរណ៍ ក្រមនីតិវិធីព្រហ្មទណ្ឌ។ល។ លើសពីនេះទៅទៀត រាជរដ្ឋាភិបាលបានដាក់ចេញនូវអនុក្រឹត្យ ប្រកាសសារាចរ និងបទដ្ឋានគតិយុត្តិមួយចំនួន ដែលទាក់ទិនទៅនឹងការហាមឃាត់ការលក់ដូរ ឬបញ្ចាំងវីដេអូអាសអាភាស ការទប់ស្កាត់អំពើហិង្សា ការប្រព្រឹត្តបទល្មើសអនាចារមកលើកុមារ និងស្ត្រី។ល។
លោក ថោង ខុន ក៏បានបន្ថែមថា ដើម្បីបង្ហាញនូវការចូលរួមយ៉ាងសកម្ម និងការប្តេជ្ញាយ៉ាងមុតមាំរបស់ក្រសួងទេសចរណ៍ ដែលជាសេនាធិការរបស់រាជរដ្ឋាភិបាល ក្នុងការចូលរួមចំណែកការពារកុមារឱ្យរួចផុតពីការកេងប្រវ័ញ្ច និងរំលោភផ្លូវភេទក្នុងវិស័យទេសចរណ៍ ក្រសួងទេសចរណ៍បានបង្កើតគណៈកម្មាធិការសុវត្ថិភាពកុមារក្នុងវិស័យទេសចរណ៍ថ្នាក់ក្រសួង និងរាជធានីខេត្ត សំដៅធ្វើការទប់ស្កាត់នូវចំណុចអសកម្មនេះឱ្យកាន់តែមានប្រសិទ្ធភាពថែមទៀត។ កន្លងមក យើងបានខិតខំសហការជាមួយក្រសួង ស្ថាប័ន និងអាជ្ញាធរពាក់ព័ន្ធ និងវិស័យឯកជន ពិសេសសមាគមឧស្សាហកម្មទេសចរណ៍ ដើម្បីអនុវត្តន៍កិច្ចការនេះទទួលបានជោគជ័យនិងលទ្ធផលល្អប្រសើរ។
លោក ថោង ខុន បានបញ្ជាក់ទៀតថា ជាក់ស្តែងនៅឆ្នាំ២០១១ កន្លងមកនេះ កម្ពុជាទទួលបានទេសចរអន្តរជាតិចំនួន ២.៨៨១.៨៦២ នាក់ ក្នុងកំណើន ១៥ ភាគរយ បើប្រៀបធៀបទៅនឹងឆ្នាំ២០១០ ហើយភ្ញៀវទេសចរក្នុងស្រុកមានចំនួន ៧លាននាក់ ដែលមានកំណើនប្រមាណ៣ភាគរយ ដោយនាំមកនូវចំណូលប្រមាណ ១.៩១២ លានដុល្លារ ចាក់បញ្ចូលទៅក្នុងសេដ្ឋកិច្ចកម្ពុជា ដែលស្មើនឹង ១២ ភាគរយនៃ GDP និងបានបង្កើតការងារដោយផ្ទាល់ប្រមាណ ៣៥ ម៉ឺននាក់៕