កំពង់ឆ្នាំង: ប្រជាពលរដ្ឋមានគ្នាប្រមាណជាង ៣០ នាក់ មកពីភូមិកោះក្អែក ឃុំកំពង់ហៅ ស្រុកកំពង់លែង កាលពីថ្ងៃទី២៤ ខែសីហា ឆ្នាំ២០១២ បាននាំគ្នាមកកាន់ការិយាល័យតំណាងរាស្ដ្រមណ្ឌលកំពង់ឆ្នាំង ដើម្បីសុំការជួយអន្ដរាគមន៍ បន្ទាប់ពីខាងអយ្យការអមសាលាដំបូងខេត្ដ កោះហៅអ្នកភូមិ៥នាក់ មកសាកសួរ រឿងចាប់អួន និងជនរបស់ជនជាតិវៀតណាមដុតបំផ្លាញចោល។
តំណាងប្រជាពលរដ្ឋ បានឲ្យដឹងថា កាលពីអំឡុងខែមេសា ឆ្នាំ២០១២ មានទូកអួន និងទូកជនរបស់ជនជាតិវៀតណាមជាច្រើនគ្រឿង បានចូលមកនេសាទ នៅត្រង់កន្លែង ដែលពួកគាត់ដាក់មង ក្នុងពេលនោះ ពួកគាត់បានអោយក្រុមវ៉ៃអួន ចេញ ពីព្រោះធ្វើអោយត្រីផ្អើលពួកគាត់នេសាទមិនបាន ប៉ុន្ដែក្រុមនេសាទជនជាតិវៀតណាមទាំងនោះ មិនព្រមស្ដាប់ពួកគាត់ ខឹង ក៏ចាប់យកអួន និងជន ដុតចោលតែម្ដង។
ប្រជពលរដ្ឋបានអោយដឹងទៀតថា អ្នកភូមិរបស់គាត់ ដែលត្រូវតុការកោះហៅក្នុងរឿងនេះ ១-ឈ្មោះធឹម ធីមភេទប្រុស អាយុ៤៨ឆ្នាំ ២-នួន ខាភេទប្រុស អាយុ៣៦ឆ្នាំ ៣-ជុក ហួនភេទប្រុស អាយុ៦៦ឆ្នាំ ៤-ឈ្មោះ ឡេងឈឿនភេទប្រុស អាយុ៣៦ឆ្នាំ និង៥-ឈ្មោះ ជាចក់ ភេទប្រុស អាយុ ៤៤ឆ្នាំ។ អ្នកទាំង៥នាក់នេះ រស់នៅភូមិកោះក្អែក ឃុំកំពង់ហៅស្រុកកំពង់លែង ខេត្ដកំពង់ឆ្នាំង។
លោក ពេញ វិបុល ព្រះរាជអាជ្ញាអមសាលាដំបូងខេត្ដកំពង់ឆ្នាំង បានអោយដឹងថា រឿងនេះ ខាងអយ្យកាចាត់ការទៅតាមរបាយការណ៍របស់អាជ្ញាធរ ក្នុងការទប់ស្កាត់ ភាពអាណាធិបតេយ្យ របស់ប្រជាពលរដ្ឋនៅក្នុងតំបន់នោះ។
លោក ពេញ វិបុល បានបញ្ជាក់អោយដឹងថា កាលពីវេលាម៉ោង ៨ និង ៣០ នាទី យប់ ថ្ងៃទី៣០ ខែមេសា ឆ្នាំ២០១២ មានប្រជាពលរដ្ឋមួយក្រុម នៅក្នុងភូមិកោះក្អែកចំនួន ១៧នាក់ បាននាំគ្នាទៅចាប់ទូកនេសាទរបស់ជនជាតិវៀតណាម ចំនួន ៧ទូក ក្នុងនោះ មានអួន ២វង់ និងជន ១វង់ ជម្រិតទារប្រាក់ចំនួន ៥លានរៀល នៅពេលនោះក្រុមនេសាទជនជាតិវៀតណាមគ្មានលុយអោយពួកគេ បានដោះលែងមនុស្ស និងទូក៥គ្រឿងអោយត្រឡប់មកវិញ ហើយពួកគេបានឃាត់ទុកទូក២គ្រឿង និងបានយកជន និងសាច់អួនទាំងនោះ ដុតបំផ្លាញចោល។
លោកព្រះរាជអាជ្ញា បានបញ្ជាក់ថា នេះគ្រាន់តែជាការកោះហៅអ្នកពាក់ព័ន្ធ មកសាកសួរតែប៉ុណ្ណោះ ប៉ុន្ដែពួកគេ មិនបានចូលមកបំភ្លឺឡើយ បែរជាលើកគ្នា ទៅកាន់ការិយាល័យតំណាងរាស្ដ្រទៅវិញ៕