ភ្នំពេញ ៖ ក្រសួងការងារផ្សព្វផ្សាយសៀវភៅមគ្គុទេសសម្រាប់និយោជិត ផែនការសកម្មភាពរបស់សហព័ន្ធនិយោជិត និងសមាគមពាណិជ្ជកម្មកម្ពុជា ស្តីពីការលុបបំបាត់ពលកម្មកុមារ នៅក្នុងប្រទេសកម្ពុជាឆ្នាំ២០១២-២០១៦ និងកម្មវិធីប្រគល់ប័ណ្ណសរសើរចំពោះស្ថាប័ន ដែលជួយគាំទ្រដល់សកម្មភាពប្រឆាំងនឹងពលកម្មកុមារ នៅក្នុងប្រទេសកម្ពុជា ក្រោមអធិបតីភាពលោកស្រី ប្រាក់ ចន្ថា រដ្ឋលេខាធិការក្រសួងការងារ និង បណ្តុះបណ្តាលវិជ្ជាជីវៈ និងជាប្រធានគណៈកម្មការជាតិពលកម្មកុមារ ។ ដោយពិធីនេះរៀបចំឡើងកាលពីថ្ងៃទី២២ ខែសីហា ឆ្នាំ ២០១២នៅសណ្ឋាគារកាំបូឌីយ៉ាណា ក្រោមជំនួយផ្នែកហរិញ្ញវត្ថុ និងបច្ចេកទេសពីអង្គការពលកម្មអន្តរជាតិ សហព័ន្ធនិយោជិត និងសមាគមពាណិជ្ជកម្មកម្ពុជា ក្រសួងការងារ។
ក្នុងពិធីនេះ លោកស្រី ប្រាក់ ចន្ថា បានបញ្ជាក់ថា គោលបំណងសិក្ខាសាលានេះ ដើម្បីប្រារពនូវកម្មវិធីប្រគល់ប័ណ្ណសរសើរចំពោះស្ថាប័ន ដែលបានជួយគាំទ្រដល់សកម្មភាពប្រឆាំងនឹងពលកម្មកុមារ ដោយធ្វើការផ្សព្វផ្សាយបន្តទៅដល់កុមារនិងនិយោជិតរបស់ខ្លួន និងការផ្សព្វផ្សាយមួយផ្នែកទៀតទៅដល់តំបន់ដែលគេរស់នៅ ក៏ដូចជានៅតាមតំបន់ភូមិកំណើតផ្សែងៗ ឲ្យយល់ដឹងពីបញ្ហាពលកម្មកុមារ ដើម្បីធ្វើយ៉ាងណាចូលរួមលប់បំបាត់ពលកម្មកុមារទូរទាំងប្រទេស ។ លោកស្រី ប្រាក់ ចន្ថា បានកោតសរសើរចំពោះការខិតខំប្រឹងប្រែង ចូលរួមសកម្មភាពជួយដល់សង្គមរបស់និយោជិត និងសហគមពាណិជ្ជកម្មកម្ពុជាផ្ទាល់ ដែលបានចូលរួមប្រឆាំងពលកម្មកុមារ ជាពិសេសដើម្បីគាំទ្រគោលដៅភ្លោះរបស់រាជរដ្ឋាភិបាលក្នុងការលុបបំបាត់ពលកម្មកុមារនាឆ្នាំ២០១២ ដល់២០១៦ខាងមុខនេះ ៕
