ដោយ ៖ វណ្ណៈ
ខេត្ដកំពង់ចាម ៖ កាលពីវេលាម៉ោង១០យប់ ថ្ងៃទី២២ ខែសីហា ឆ្នាំ២០១២ លោក ខ្ចង អូន ចៅសង្កាត់បឹងកុក បានចុះត្រួតពិនិត្យលើកម្លាំងប្រជាការពារតាមគោលដៅ ដែលនៅក្នុងមូលដ្ឋានសង្កាត់បឹងកុក មាន៧ភូមិ ហើយមានកម្លាំងប្រជាការពារចំនួន៧៧នាក់ ។
ការចុះរដ្ឋបាលនេះ លោក ខ្ចង អូន បានឱ្យដឹងថា ដោយអនុវត្ដតាមគោលនយោបាយរបស់រាជរដ្ឋាភិបាលនិង មានការចង្អុលបង្ហាញពីលោក ហ៊ុន ណេង អភិបាលខេត្ដកំពង់ចាម ក៏ដូចជាការណែនាំពីលោកអភិបាលក្រុង ស្ដីពីភូមិ-ឃុំមានសុវត្ថិភាព បានជ្រើសរើសប្រជាពលរដ្ឋស្ម័គ្រចិត្ដចូលរួមជាប្រជាការពារដោយលោកចៅសង្កាត់បានកាត់សម្លៀកបំពាក់និងប្រឡង់ដៃ ចែកជូនគ្រប់ៗគ្នា ហើយបែងចែកជា៧គោលដៅ មាន ក្រុមចល័តខ្លះសម្រាប់ការពារសន្ដិសុខសុវត្ថិភាព លើបញ្ហាមានករណីចោរ លួច ឆក់ ប្លន់ និងទប់ស្កាត់ក្មេងទំនើង អំពើហិង្សាក្នុងគ្រួសារជាដើម ។
លោកខ្ចង អូន បានបន្ដឱ្យដឹងទៀតថា កន្លងមកកាលពីពេលបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្ដិទី៣ សង្កាត់បឹងកុក គណបក្សប្រជាជនកម្ពុជា ទទួលបានសំឡេងបោះឆ្នោតឈ្នះលើសលប់ ក៏ដូចជាការគាំទ្ររូបលោកជាចៅសង្កាត់ ដូច្នេះក្នុងនាមលោកជាអ្នកគ្រប់ គ្រង ឬជាគណៈបញ្ជាការឯកភាពសង្កាត់ គឺមានការទទួលខុសត្រូវក្នុងមូលដ្ឋានផ្ទាល់និងតែងតែខិតខំអភិវឌ្ឍន៍ ពិសេសជួយសម្រួលរាល់ពាក្យបណ្ដឹងនិងឯកសារ ចុះហត្ថលេខាផ្សេងៗ ដោយមិនទាមទារប្រាក់និងបានគិតគូពីភូមិ-ឃុំមាន សុវត្ថិភាពក្នុងមូលដ្ឋានដើម្បីឱ្យប្រជាពលរដ្ឋកាន់តែមានជំនឿនិងទទួលភាពកក់ក្ដៅមកលើថ្នាក់ដឹកនាំ ។
លោក លី ពៅ ដែលជាប្រជាពលរដ្ឋរស់នៅក្នុងភូមិបឹងកុកបាននិយាយថា មួយរយៈនេះបញ្ហាសន្ដិសុខនិងអំពើលួច ឆក់ ប្លន់ ហាក់ដូចជាមិនសូវកើតហេតុ បន្ទាប់ពីមានក្រុមប្រជាការពារគាត់ចុះជាប្រចាំ ទាំងពេលយប់និងពេលថ្ងៃ ក៏ដូចជាកម្លាំងសមត្ថកិច្ចពង្រឹងសន្ដិសុខនោះ ។
លោក ខ្ចង អូន បានលើកឡើងដែរថា ជាគោលការណ៍លោកត្រៀមទិញវិទ្យុ ទាក់ទងផ្ដល់ឱ្យកម្លាំងប្រជាការពារក្នុង១ ក្រុម១គ្រឿងដើម្បីងាយស្រួលទាក់ទងគ្នាក្នុងពេលមានហេតុការណ៍កើតឡើង ៕