ភ្នំពេញ: មន្ត្រីគណបក្ស នរោត្តម រណឫទ្ធិ ដែលប្តូរទៅជាគណបក្សជាតិនិយម បានច្រានចោលនូវដំណឹងដែលថា មានសមាជិកនៃគណបក្ស នរោត្តម រណឫទ្ធិ ៣ ស្រុក នៅខេត្តកំពត មានចំនួនរាយនាក់ ទៅចុះចូលជាមួយនឹង “គណប្សសង្គ្រោះជាតិ” ដែលគ្រោងនឹងកើតចេញជារូបរាងនៅពេលខាងមុខនេះ។
លោក សៅ រ៉ានី ប្រធានគណបក្សជាតិនិយម ដែលទើបប្តូរឈ្មោះមកពីគណបក្សនរោត្តមរណឫទ្ធិ នៅថ្ងៃទី២៤ ខែសីហា ឆ្នាំ២០១២ បានចេញមកផ្តល់បទសម្ភាសន៍ ជាមួយក្រុមអ្នករាយការណ៍ព័ត៌មាន ដោយបានបញ្ជាក់យ៉ាងនេះថា "ខ្ញុំមិនបដិសេធថា អត់មានអ្នកចាកចេញពីគណបក្សនេះទេ គឺមាន តែជាឆន្ទៈរបស់គេ ហើយខាងគណបក្សសមរង្ស៊ី និងសិទ្ធិមនុស្ស ក៏មានរាប់រយនាក់ ដែលចូលមកជាមួយយើងខ្ញុំដែរ តែយើងមិនទាន់ធ្វើការប្រកាសធំដុំទទួលពួកគាត់នៅឡើយ"។
លោក សៅ រ៉ានី បានមានប្រសាសន៍បន្តថា “នេះជាទិដ្ឋភាពនយោបាយមួយ តែការពិតនៅតែជាការពិតអ៊ីចឹង ថ្នាក់ដឹកនាំខេត្តកំពត ទាំងស្រុក ទាំងខេត្ត មកចូលរួមសមាជនៅនេះអស់ហើយ ថ្ងៃនេះ ប៉ុន្តែខ្ញុំមិនបដិសេធថា អត់ទេ គឺមានតិចតួច ដែលជាសមាជិកគាំទ្រទេ មិនមែនជាថ្នាក់ដឹកនាំ រចនាសម្ព័ន្ធគណបក្សទេ ពីព្រោះសមាជិគាំទ្រ ចេញចូលវាអត់មានស្ថិតស្ថេរទេ ថ្ងៃនេះចូលខាងនេះ ថ្ងៃនោះចូលខាងនោះ ប៉ុន្តែរចនាសម្ព័ន្ធ មិនបានទៅទេ គឺទៅមានតែម្នាក់ ពីរនាក់ អាហ្នឹងខ្ញុំទទួលស្គាល់”។
មន្ត្រីគណបក្សសមរង្ស៊ីនៅខេត្តកំពត បានអះអាងថា នៅថ្ងៃទី២៤ ខែសីហានេះ គណបក្សសង្គ្រោះជាតិ ធ្វើពិធីទទួលសមាជិកមកពីគណបក្ស នរោត្តមរណឫទ្ធិ នៅខេត្តកំពតចំនួនរាប់រយនាក់ មកពីស្រុកចំនួន៣ គឺស្រុកដងទង់ ស្រុកឈូក និងស្រុកជុំគីរី ដោយសារអ្នកទាំងនោះមិនទៅចូលរួមជាមួយគណបក្សហ្វ៊ុនស៊ិនប៉ិចនោះឡើយ៕