អធិការបតីអាល្លឺម៉ងលោកស្រី Angela Merkel កាលពីថ្ងៃទី២២ខែសីហានៅតែជាស្ដ្រីដែលមានសិទ្ធិអំណាច ជាងគេបំផុតនៅលើពីភពលោក តាមការជ្រើសរើសរបស់ទស្សនាវដ្ដី Forbes។
កាលដែលប្រមុខរដ្ឋាភិបាលអាល្លឺមង់ បានឈរចូលលំដាប់កំពូល ស្ដ្រីដែលមាន សិទ្ធិអំណាចបំផុត២ឆ្នាំជាប់គ្នាបានបង្ហាញ យ៉ាងច្បាស់ពីតួនាទីរបស់លោកស្រី ក្នុង ការខិតខំស្វែងរកដំណោះស្រាយដល់វិបត្តិហិរញ្ញវត្ថុនៅក្នុងប្រទេសសហគមន៍អឺរ៉ុប។ លោកស្រី Angela Merkel ជាស្ដ្រី “ដែកថែប”របស់អឺរ៉ុប ជាមេដឹកនាំឈាន មុខក្នុងប្រទេសចាយប្រាក់រួមអឺរ៉ូ ដែល កំពុងប្រឈមនឹងវិបត្ដនោះ ។
ឈរលំដាប់ទី២បន្ទាប់ពីលោកស្រី Merkel គឺរដ្ឋមន្ដ្រីការបរទេសអាមេរិក លោកស្រី ហ៊ីលឡារី គ្លីនតុន ជាស្ដ្រីដែល ត្រូវបានទស្សនាវដ្ដី Forbes វាយតម្លៃ សកម្មដោយរយៈពេលដែលលោកស្រីឡើងកាន់តំណែង បានធ្វើដំណើរទៅកាន់ បរទេសរហូតដល់ជាង១០០ប្រទេសចូល រួមដោះស្រាយបញ្ហាសំខាន់ៗពាក់ព័ន្ធ ការទូតនៅលើពិភពលោក ។ ពេលកន្លងមក លោកស្រី ហ៊ីលឡារី គ្លីនតុន បាន បំបែកឯតទគ្គកម្មជារដ្ឋមន្ដ្រីការបរទេស ដែលបំពេញបេសកកម្មទៅកាន់បរទេស ច្រើនជាងគេបំផុតលើពិភពលោក ។
លំដាប់ទី៣បន្ទាប់ពីលោកស្រី គ្លីនតុន គឺប្រធានាធិបតីប្រេស៊ីល លោកស្រី Dilma Rousseff ដែលជាស្ដ្រីប្រធា នាធិបតីដំបូងគេបង្អស់បានសម្រេចគោលសំខាន់ៗ នៅក្នុងប្រទេសតំបន់អាមេរិក ឡាទីន ។
បញ្ជីឈ្មោះស្ដ្រី១០០នាក់ដែលមានសិទ្ធិអំណាចជាងគេបំផុតនៅលើពិភពលោក ដែលជ្រើសរើសដោយទស្សនាវដ្ដី Forbes បានផ្ដោតលើសកម្មភាពជាច្រើន ទាំងនៅលើវិស័យនយោបាយ ពាណិជ្ជកម្ម ប្រព័ន្ធផ្សព្វផ្សាយ កម្សាន្ដនិងសកម្មភាព ផ្សេងៗដែលនាំមកនូវផលប្រយោជន៍ ដល់ប្រទេសជាតិ ។
ស្ដ្រីដែលមានឥទ្ធិពលបំផុតទាំង១០០នាក់ ស្ថិតក្នុង២៨ប្រទេស ដែលមានវ័យមធ្យម គឺ៥៥ឆ្នាំ ។ ឥទ្ធិពលរបស់ពួកគាត់ ត្រូវបានវាយតម្លៃពឹងផ្អែកនៅលើប្រាក់ចំណូល ការបង្ហាញខ្លួនតាមប្រព័ន្ធផ្សព្វផ្សាយ និងឥទ្ធិពលទៅលើមហាជន ។ នៅក្នុងបញ្ជីឆ្នាំនេះរបស់ Forbes ប្រាក់ ចំណូលសរុបរបស់ស្ដ្រីដែលមានឥទ្ធិពលបំផុតទាំង១០០រូប មានទឹកប្រាក់រហូតដល់៩៨៤ពាន់លានដុល្លារ ។
នៅក្នុងការជ្រើសរើសឆ្នាំនេះមាន ស្ដ្រី១៦រូបថ្មី ស្ថិតក្នុងចំណោម១០០នាក់នោះ គឺតារាចម្រៀង Jennifer Lopez, Lady Gaga, លោកស្រី Michelle Obama,...។ ស្ដ្រីដែលមានវ័យក្មេង បំផុតក្នុងចំណោមនោះ គឺនាង Lady Gaga ដែលមានវ័យត្រឹមតែ២៦ឆ្នាំ និង ចាស់ជាងគេបំផុត គឺព្រះមហាក្សត្រី អង់គ្លេស ElizabethII ៕
