ភ្នំពេញ ៖ លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារជាមួយលោកស្រីបណ្ឌិត Noeleen Heyzer អគ្គលេខាធិការរងអង្គការសហប្រជាតិ និងជាលេខាធិការប្រតិបត្តិ នៃបេសកកម្មសេដ្ឋកិច្ចនិងសង្គម ប្រចាំតំបន់អាស៊ីប៉ាស៊ីហ្វិក នារសៀលថ្ងៃទី២២ ខែសីហា ឆ្នាំ២០១២ នៅទីស្តីការក្រសួង ។
លោកស្រី Noeleen Heyzer បានបានជំរាបជូនលោក គាត ឈន់ ថា ក្នុងដំណើរទស្សនកិច្ចរបស់លោកស្រីមកកម្ពុជានាពេលនេះ លោកស្រីមានការរំភើបយ៉ាងខ្លាំង នៅពេលដែលបានឃើញការរីកចម្រើនរបស់កម្ពុជា លោកស្រីធ្លាប់បានមកកម្ពុជាម្តងកាលពីឆ្នាំ២០០៥ ហើយនៅពេល នេះលោកស្រីឃើញកម្ពុជា មានការផ្លាស់ប្តូរយ៉ាងខ្លាំង ទោះបីកម្ពុជាបានជួបប្រទះនូវវិបត្តិសេដ្ឋកិច្ចពិភពលោកយ៉ាងណាក៏ដោយ ក៏កម្ពុជានៅតែទទួលបានកំណើនសេដ្ឋកិច្ច និងមានការអភិវឌ្ឍប្រកបដោយចីរភាព ក្នុងរយៈពេលដ៏ខ្លីប៉ុណ្ណោះ ។ ជាមួយនេះលោកស្រីបានគាំទ្រដល់កម្ពុជាដែលបានបំពេញការងារលើសមភាពយេនឌ័រ ការយកចិត្តទុកដាក់លើវិស័យអប់រំ វិស័យសុខុមាលភាព និងការកាត់បន្ថយគម្លាតរវាងអ្នកមាន និងអ្នកក្រ ដែលទាំងនេះគឺជាកត្តាសំខាន់សម្រាប់ជំរុញការអភិវឌ្ឍនៅកម្ពុជា ។ លោកស្រីបានកោតសរសើរចំពោះការដឹកនាំដ៏ត្រឹមត្រូវនឹងប្រកបទៅដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើឲ្យប្រទេសកម្ពុជា មានការរីកចម្រើនលើគ្រប់វិស័យដូចសព្វថ្ងៃនេះ ។
ភាគីទាំងពីរក៏បានផ្លាស់ប្តូរយោបល់គ្នា ដើម្បីជួយពង្រឹងបន្ថែមនូវតួនាទី និងទំនាក់ទំនងរបស់កម្ពុជានៅក្នុងសហគមន៏អន្តរជាតិ ជាពិសេសនៅក្នុងក្របខណ្ឌរបស់សហប្រជាជាតិ និងអាស៊ាន ខណៈដែលកម្ពុជាជាប្រធាន និងធ្វើឲ្យកំណើនសេដ្ឋកិច្ចរបស់កម្ពុជាកើនជាមធ្យមក្នុងមួយឆ្នាំ៧% នឹងបានធ្វើឲ្យប្រទេសកម្ពុជាបានចាកផុតពីប្រទេស ដែលមានការអភិវឌ្ឍន៏តិចតួច និងមានចំណូលទាបឲ្យមានការអភិវឌ្ឍន៏កំរិតខ្ពស់ មធ្យម និងមានចំណូលកំរិតខ្ពស់ មធ្យម នៅឆ្នាំ២០១៨ ដល់ឆ្នាំ២០៣០ ។
លោកឧបនាយករដ្ឋមន្ត្រី គាត ឈន់ បានជំរាបជូនថា កម្ពុជានឹងធ្វើការអភិវឌ្ឍន៏ប្រកបដោយចិរភាព មានលក្ខណៈបរិយាប័ណ្ណ ដើម្បីធានានូវការលានុវត្តភាពក្នុងការចូលរួម និងផ្តល់ផលប្រយោជន៏ដល់ប្រជាជនគ្រប់ស្រទាប់ នឹងធ្វើយ៉ាងណាដើម្បីទប់ទល់សេដ្ឋកិច្ចឲ្យមានលក្ខណៈធន់ និងអាចទប់ទល់ជាមួយវិបត្តិផ្សេងៗបានជាយថាហេតុ ពិនិត្យលទ្ធភាពនិងស្វែងយល់ឲ្យកាន់តែច្បាស់ថែមទៀត នូវតម្រូវការនិងជំនួយបច្ចេកទេសចាំបាច់នានាដែលកម្ពុជាត្រូវការសិក្សា និងស្វែងយល់ឲ្យកាន់តែស៊ីជម្រៅ នូវការអភិវឌ្ឍន៏ដ៏ឆាប់រហ័សរបស់កម្ពុជា ដែលគេបានចាត់ទុកថាជាប្រទេសដែលមានកំណើនសេដ្ឋកិច្ចលឿនមួយនៅក្នុងតំបន់ ៕