ចំនួនការិយាល័យប៉ាន់ស្មានដែលបង្កើតថ្មីមានចំនួន ៨៣៥ សរុបទាំងអស់ ១៨.៩៤២ ដោយកាលពីឆ្នាំ២០១១ មានចំនួន ១៨.១០៧ ការិយាល័យ។
នៅក្នុងសន្និសីទនោះ លោក អ៊ឹម សួស្ដី ប្រធាន គ.ជ.ប បានមានប្រសាសន៍ថា សម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ រយៈពេលចុះឈ្មោះជាក់ស្ដែងមាន ៤២ ថ្ងៃ គឺពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២ ហើយការបិទផ្សាយបញ្ជីដំបូង ដែលនឹងប្រព្រឹត្តទៅពីថ្ងៃទី១៩-៣០ ខែតុលា ឆ្នាំ២០១២ ដើម្បីឲ្យប្រជាពលរដ្ឋមកពិនិត្យមើល ព្រោះអាចបាត់ឈ្មោះ អាចអ្នកចុះហើយបាត់ឈ្មោះ អាចប្ដឹងតវ៉ាជំទាស់ចំពោះបញ្ជីផ្សាយដំបូងនេះ ហើយសល់ប៉ុន្មាន ក្រោយរយៈពេល ៤២ ថ្ងៃ គឺជារយៈពេលត្រូវដោះស្រាយបណ្ដឹង ទាំងបណ្ដឹងបដិសេធក្នុងពេលចុះឈ្មោះ ទាំងបណ្ដឹងក្រោយបិទបញ្ជីដំបូង ដែលត្រូវដោះស្រាយនៅគណៈកម្មការឃុំ-សង្កាត់រៀបចំការបោះឆ្នោត ការដោះស្រាយនៅគណៈកម្មាធិការជាតិរៀបចំការបោះឆ្នោត និងបណ្ដឹងដែលត្រូវដោះស្រាយនៅក្រុមប្រឹក្សាធម្មនុញ្ញ។
លោក អ៊ឹម សួស្តី បានបញ្ជាក់ថា “នៅថ្ងៃទី៣១ ខែធ្នូ ឆ្នាំ២០១២ គឺជាថ្ងៃដែល គ.ជ.ប ត្រូវអស់សុពលភាពលើបញ្ជីបោះឆ្នោតនេះ ហើយបញ្ជីបោះឆ្នោតនោះ គឺជាបញ្ជីដែលត្រូវយកទៅប្រើប្រាស់ នៅក្នុងការបោះឆ្នោតជ្រើសតាំងតំណាងរាស្ដ្រ នៅថ្ងៃទី២៨ ខែកក្កដា ឆ្នាំ២០១៣”។
លោកបានបន្តថា នៅក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត គ.ជ.ប មានវិធានការជាច្រើន ហើយក៏មានសេចក្ដីណែនាំរួមជាមួយក្រសួងមហាផ្ទៃ។ វិធានការនោះ គឺ គ.ជ.ប បានពង្រឹងសហប្រតិបត្តិការជាមួយនឹងស្ថាប័ន មន្ទីរផ្សេងៗរបស់រដ្ឋ ក៏ដូចជាការពង្រឹងកិច្ចសហប្រតិបត្តិការជាមួយនឹងអាជ្ញាធរគ្រប់រាជធានី-ខេត្ត ត្រូវសហការយ៉ាងណា ចូលរួមឲ្យបានច្រើនកុះករ ក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត ដោយត្រូវសម្អាតបញ្ជីឲ្យបានល្អ បំផុសប្រជាពលរដ្ឋឲ្យមកចុះឈ្មោះគ្រប់ៗគ្នា ហើយជាពិសេសឲ្យមកលុបឈ្មោះ ចំពោះប្រជាពលរដ្ឋណាដែលបានចុះឈ្មោះលើសពីមួយ។
លោក អ៊ឹម សួស្ដី បានបន្ថែមថា គ.ជ.ប បានសុំសហការជាមួយក្រសួងមួយចំនួន ដូចជា ក្រសួងព័ត៌មាន ក្រសួងធម្មការ និងសាសនា និងក្រសួងវប្បធម៌ និងវិចិត្រសិល្បៈ។
ពាក់ព័ន្ធនឹងបញ្ហាស្ថិតិ លោក អ៊ឹម សួស្ដី បានឲ្យដឹងថា យើងបានតួលេខមួយចំនួនមេឃុំ ចៅសង្កាត់ផ្ញើមក ឃើញថា ចំនួនអ្នកដែលត្រូវចុះឈ្មោះថ្មីមានចំនួន ៦១៩.៦៣០ នាក់ ហើយឈ្មោះដែលត្រូវលុបចេញពីបញ្ជីបោះឆ្នោតមានចំនួន ១៤១.៤៦៧ នាក់។ លោកបានបញ្ជាក់ថា “ឈ្មោះដែលត្រូវលុបចេញនោះ គឺឈ្មោះដែលត្រូវធ្វើបច្ចុប្បន្នភាព ក្នុងនោះ អ្នកដែលស្លាប់ត្រូវលុបឈ្មោះចេញ អ្នកដែលផ្លាស់ប្ដូរទីលំនៅ និងអ្នកដែលដកសិទ្ធិបោះឆ្នោត ដូច្នេះយើងត្រូវសម្អាតបញ្ជីតាមរយៈហ្នឹង”។
លោកបានឲ្យដឹងបន្ថែមថា ចំពោះអង្គការមិនមែនរដ្ឋាភិបាល ដែលចង់ចូលរួមអង្កេតការណ៍ការបោះឆ្នោត ចំពោះអ្នកអង្កេតការណ៍ជាតិ អាចចុះឈ្មោះពីថ្ងៃទី១៦ ខែសីហា ឆ្នាំ២០១២ រហូតដល់មុនបោះឆ្នោត ៥ ថ្ងៃ ហើយចំពោះអង្គការមិនមែនរដ្ឋាភិបាលអន្តរជាតិ អាចចុះឈ្មោះពីថ្ងៃទី១៦ ខែសីហា រហូតដល់ថ្ងៃបោះឆ្នោត គឺត្រូវដាក់នៅគណៈកម្មាធិការជាតិរៀបចំការបោះឆ្នោត។ ចំពោះការចុះឈ្មោះភ្នាក់ងារគណបក្សនយោបាយ គឺដាក់ពីរដំណាក់កាល នៅដំណាក់កាលធ្វើបញ្ជីបច្ចុប្បន្នភាពម្ដង និងនៅដំណាក់កាលពេលបោះឆ្នោត ដែលត្រូវចុះឈ្មោះពីថ្ងៃទី២៣ ខែសីហា ឆ្នាំ២០១២ សម្រាប់ដំណាក់កាលបច្ចុប្បន្នភាព និងសម្រាប់នៅពេលបោះឆ្នោត គឺចុះឈ្មោះពីថ្ងៃទី២៨ ខែមិថុនា ឆ្នាំ២០១៣។
លោកបានបញ្ជាក់ទៀតថា “នៅពេលចុះឈ្មោះនេះ គណបក្សនយោបាយត្រូវចុះនៅគណៈកម្មការឃុំ-សង្កាត់រៀបចំការបោះឆ្នោត អ្នកចុះឈ្មោះនៅឃុំណា ត្រូវពិនិត្យមើលនៅឃុំនោះ ដែលនៅទីនោះ យើងនឹងត្រូវបង្កើតគណៈកម្មការឃុំ-សង្កាត់រៀបចំការបោះឆ្នោត សម្រាប់ត្រួតពិនិត្យការឃោសនា ចែកប័ណ្ណព័ត៌មាន និងការងារផ្សេងៗ នៅថ្នាក់ឃុំ-សង្កាត់”៕