ភ្នំពេញ: ព្រៃលិចទឹកនៅជុំវិញបឹងទន្លេសាប ត្រូវបានរាជរដ្ឋាភិបាល ធ្វើការសម្រេចជាថ្មីឲ្យអាជ្ញាធរទន្លេសាប ជាអ្នកការពារ និងគ្រប់គ្រងដោយផ្ទាល់ បន្ទាប់ពីមានរឿងអាស្រូវ កាប់បំផ្លាញព្រៃលិចទឹក នៅក្នុងខេត្តកំពង់ធំ រួចមក។
ប្រភពព័ត៌មានដ៏គួរទុកចិត្តមួយ បានឲ្យដឹងនៅថ្ងៃទី២២ ខែសីហា ឆ្នាំ២០១២ ថា តំបន់ព្រៃលិចទឹកជុំវិញបឹងទន្លេសាប មានទំហំប្រមាណជា ៦៤ ម៉ឺនហិកតា ត្រូវបានរាជរដ្ឋាភិបាល សម្រេចប្រគល់ភារកិច្ចឲ្យអាជ្ញាធរទន្លេសាប ជាអ្នកទទួលខុសត្រូវទាំងស្រុងហើយ បន្ទាប់ពីមានរឿងអាស្រូវ នៅក្នុងខេត្តកំពង់ធំរួចមក។
ប្រភពដែលសុំមិនបញ្ចេញឈ្មោះនេះ បានបញ្ជាក់ថា ការសម្រេចនោះ បានធ្វើឡើងតាមរយៈលិខិតលេខ៩០២ ចុះថ្ងៃទី២០ ខែសីហា ឆ្នាំ២០១២ របស់ទីស្តីការគណៈរដ្ឋមន្ត្រី ដែលបានលើកឡើងយ៉ាងស៊ីជម្រៅបំផុត អំពីករណីព្រៃលិចទឹកនៅក្នុងខេត្តកំពង់ធំហើយអាជ្ញាធរទន្លេសាប ត្រូវតែធ្វើការពារឲ្យខាងតែបាន ចំពោះព្រៃលិចទឹកទាំងអស់ នៅជុំវិញបឹងទន្លេសាប ដែលបានកំណត់រួចនៅក្នុងអនុក្រឹត្យ។
ប្រភពខាងលើបានឲ្យដឹងទៀតថា លិខិតលេខ៩០២ បានសម្រេចឲ្យអាជ្ញាធរទន្លេសាប ត្រូវធ្វើការរំលាយអាងទឹកទាំងអស់ ក្នុងតំបន់បីដោយគ្មានកំណត់ពេលវេលា។ សិក្សាអាងទឹក ដែលមាននៅក្នុងតំបន់ពីរ ដែលបានកំណត់ដោយអនុក្រឹត្យលេខ១៩៧ ដែលត្រូវកំណត់ថា តើអាងទឹកណាខ្លះត្រូវរំលាយចោលនិង អាងទឹកណាខ្លះគួរអនុញ្ញាតឲ្យប្រជាពលរដ្ឋប្រើប្រាស់បន្ត។ ត្រូវបន្តអប់រំ ឲ្យរដ្ឋអំណាចមូលដ្ឋានគ្រប់ជាន់ថ្នាក់ និងប្រជាពលរដ្ឋបានយល់ដឹងអំពីសារៈសំខាន់នៃព្រៃលិចទឹកក្នុងតំបន់ពីរ និងតំបន់បី និងអប់រំណែនាំប្រជាពលរដ្ឋឲ្យធ្វើស្រែចម្ការ តែក្នុតំបន់ដែលគាត់ធ្លាប់បានធ្វើ ឬទទួលបានការអនុញ្ញាត ហើយមិនត្រូវឲ្យប៉ះពាល់ដល់តំបន់បីជាដាច់ខាត។
មន្ត្រីក្រសួងធនធានទឹកមួយរូប បាននិយាយឲ្យដឹងនៅថ្ងៃទី២២ ខែសីហា ឆ្នាំ២០១២ ថា ដីស្រែចម្ការដែលប្រជាពលរដ្ឋធ្លាប់បានធ្វើនៅក្នុងតំបន់បី នៃបឹងទន្លេសាប ត្រូវបានកាត់ឃ្វាលជូនពួកគាត់រួចរាល់អស់ហើយ។ តំបន់បីនៃបឹងទន្លេសាប ដែលជាតំបន់ព្រៃលិចទឹកត្រូវបានការការពារដោយអនុក្រឹត្យ និងបានបោះបង្គោលព្រំដែនកំណត់រួចហើយ ដោយអាជ្ញាធរទន្លសាប ដែលមានការចូលរួមពីអាជ្ញាធរមូលដ្ឋាន។
ទោះជាយ៉ាងណាក៏តំបន់ ដែលត្រូវបានការការពារដោយអនុក្រឹត្យហើយនេះ នៅតែត្រូវបានគេរំលោភយកជាបន្តបន្ទាប់ជាទ្រង់ទ្រាយធំថែមទៀត ទើបរាជរដ្ឋាភិបាល សម្រេចជាថ្មី ឲ្យអាជ្ញាធរទន្លេសាបត្រូវតែធ្វើការការពារឲ្យបាន៕