ភ្នំពេញ ៖ លោក ឃួង ស្រេង អភិបាលរងរាជធានីភ្នំពេញ បានថ្លែងឲ្យដឹងនៅថ្ងៃព្រហស្បតិ៍ ខែសីហាថា ការអភិវឌ្ឍតំបន់អូឡាំពិកក្នុងរាជធានីភ្នំពេញត្រូវបានវិនិយោគចំនួន៤០០លានដុល្លារអាមេរិក ដែលគេរំពឹងថា តំបន់នេះនឹងជួយជំរុញឲ្យរាជធានីភ្នំពេញកាន់តែមានសក្តានុពលពាណិជ្ជកម្មថែមទៀត ។
លោក ឃួង ស្រេង បានមានប្រសាសន៍ថាទំហំវិនិយោគទៅលើគម្រោងអភិវឌ្ឍន៍តំបន់អូឡាំពិក គឺចំនួន៤០០លានដុល្លារអាមេរិក ដោយក្រុមហ៊ុនវិនិយោគទុនអាណិកជនកម្ពុជា ។ លោកបានបង្ហាញនូវសុទិដ្ឋិនិយមថា នៅពេលដែលគម្រោងអភិវឌ្ឍន៍តំបន់អូឡាំពិកត្រូវបានស្ថាបនារួចរាល់ តំបន់អូឡាំពិកនេះនឹងក្លាយជាតំបន់មួយដែលជួយលើកកម្ពស់សេដ្ឋកិច្ចកម្ពុជា ព្រមទាំងជួយលើកសោភ័ណភាពរាជធានីភ្នំពេញ ឲ្យកាន់តែល្អប្រសើរថែមទៀត ។ លោកបន្ដថា រាជធានីភ្នំពេញបានសម្តែងនូវការកោតសរសើរចំពោះក្រុមហ៊ុនវិនិយោគទុនអាណិកជនកម្ពុជាដោយលោកមានប្រសាសន៍ថាក្រុមហ៊ុននេះមានផែនការច្បាស់លាស់ ។
លោក ស៊ឹង ប៊ុណ្ណា ប្រធានសមាគមអ្នកវាយតម្លៃ និងទីភ្នាក់ងារអចលនវត្ថុកម្ពុជាបានបង្ហាញនូវការគាំទ្រចំពោះគម្រោងសាងសង់ ដើម្បីអភិវឌ្ឍន៍តំបន់អូឡាំពិកនេះ ហើយលោកបានចាត់ទុកតំបន់នេះថា ជាទីតាំងមួយស្ថិតនៅក្នុងតំបន់ពាណិជ្ជកម្មមួយដ៏ល្អដែលមានដង់ស៊ីតេ ប្រជាជនរស់នៅច្រើន ។
សូមបញ្ជាក់ថាកាលពីដើមខែសីហានេះ មន្ត្រីក្រសួងរៀបចំដែនដី នគររូបនីយកម្ម និងសំណង់ បានព្យាករណ៍ថាការសាងសង់សំណង់ផ្សេងៗនៅក្នុងប្រទេសកម្ពុជានៅក្នុងឆ្នាំ ២០១២នេះនឹងមានការកើនឡើងយ៉ាងពិតប្រាកដ ដោយចាត់ទុកថា ឆ្នាំ ២០១២ នេះគឺជាឆ្នាំដ៏ល្អមួយនៅក្នុងការអនុវត្តវិស័យសំណង់នៅក្នុងប្រទេសមួយនេះ ។
ការព្យាករណ៍បែបនេះ គឺបានកើតឡើងស្របពេលដែលកម្ពុជាទទួលទុនវិនិយោគ លើវិស័យសំណង់បានរហូតដល់ទៅ៨៦៨លានដុល្លារអាមេរិក ក្នុងរយ:ពេល៦ខែដំបូងនៃឆ្នាំ ២០១២ នេះ គឺកើនចំនួន ៣៦,១៦ ភាគរយ ។
សូមបញ្ជាក់ថា គម្រោងអភិវឌ្ឍតំបន់អូឡាំពិកនេះ គឺត្រូវបង្កើតឡើងលើដីទំហំ ៨០ ម៉ឺន ម៉ែត្រការ៉េ ក្នុងរយៈពេល ៥ទៅ ៦ ឆ្នាំ ។យោងតាមការបញ្ជាក់របស់ក្រុមហ៊ុន បានឱ្យដឹងបន្ទាប់ពីក្រុមហ៊ុនបានចុះកិច្ចសន្យាអភិវឌ្ឍដីទំនេរខាងជើង និងខាងកើតពហុកីឡដ្ឋានជាតិអូឡាំពិកជាមួយក្រសួងអប់រំយុវជន និងកីឡាកាលពី ប៉ុន្មានថ្ងៃកន្លងមកនេះ រួចមកក្រុមហ៊ុននេះបានជួយធ្វើការពង្រីកផ្លូវឧកញ៉ាទេពផន (១៨២) បន្ថែមទទឹង ៤ ម៉ែត្រ ដើម្បីសម្រួលដល់ការកកស្ទះចរាចរនានា។ក្នុងគម្រោងអភិវឌ្ឍន៍តំបន់នោះក្រុមហ៊ុនមានទិសដៅក្នុងការបង្កើតផ្សារទំនើបធំមួយនៅតំបន់ខាងលើនេះគឺសណ្ឋាគារមានចំនួន៤០០ បន្ទប់អគារពាណិជ្ជកម្មកម្ពស់៥៥ ជាន់ដែលមាន ២ជាន់ ក្រោមដីសម្រាប់ចំណតរថយន្តផ្ទះអាជីវកម្មខ្នាតតូចចំនួន ១៧០ផ្ទះនិងខុនដូ ១៧០០ផងដែរ ៕