លោក លន់ លឹមថៃ អញ្ជើញបើកវគ្គបណ្តុះបណ្តាលស្តីពីការអនុវត្តការការពារសុវត្ថិភាពបរិស្ថាន,សង្គម និងយុទ្ធសាស្ត្រទំនាក់ទំនងគម្រោងបែកចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច
ខេត្តកំពង់ចាម ៖ កាលពីព្រឹកថ្ងៃទី៧ ខែសីហា ឆ្នាំ២០១២ នៅសាលប្រជុំសាលាខេត្តកំពង់ចាម លោក លន់ លឹមថៃ អភិបាលរងខេត្ត តំណាងដ៏ខ្ពង់ខ្ពស់របស់លោក ហ៊ុន ណេង អភិបាលខេត្តកំពង់ចាម និងក្នុងនាមនាយកគំរោង(LASED)ថ្នាក់ជាតិ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីការអនុវត្តការពារសុវត្ថិភាពបរិស្ថាន និងសង្គម និងយុតិ្តសាស្ត្រទំនាក់ទំនងគម្រោងបែកចែកដីសម្បទាន សង្គមកិច្ច និងការអនុវត្តសេដ្ឋកិច្ច (ហៅកាត់ថា LASED)ដែលមានរយៈពេលបីថ្ងៃពីថែ្ង៧ ខែសីហាដល់ថ្ងៃទី៩ ខែសីហា ឆ្នាំ២០១២ ដល់មន្ត្រីអនុវត្តគម្រោង( LASED) ទាំងបីខេត្តរួមមាន កំពង់ចាម ក្រចេះ កំពង់ធំ សរុបទាំងអស់៦៩ រូប ។
ថ្លែងក្នុងឱកាសពិធីបើកវគ្គនេះ លោក លន់ លឹមថៃ បានថ្លែងកោតសរសើរដល់មន្ត្រីទាំងបីខេត្ត ដែលក្នុងរយៈពេលជាងបីឆ្នាំកន្លងមកនេះ បានខិតខំពុះពារជំនះរាល់កាលលំបាករហូតធ្វើឲ្យគំរោងេយើង សម្រេច បាននូវគោលដៅជាយុទ្ធសាស្ត្រគ្រប់ដំណាក់កាល ។ លោក មានប្រសាសន៍បន្តទៀតថា លទ្ធផល ដ៏ត្រចះត្រចង់នេះក៏អាស្រ័យដោយមានកាលចូលរួមពីដៃគូរអភិវឌ្ឍន៍នានា ដោយរួមមាន ធគារពិភពលោក អង្គការ GI2 អាឡឺម៉ង់ និងអង្គការវឌ្ឍនភាពផងដែរ ។ ទន្ទឹមនិងលទ្ធផលជាវិជ្ជមានខាងលើលោក ក៏បាន មានប្រសាសន៍ផ្តាំផ្ញើរដល់សិក្ខាកាមទាំងអស់ត្រូវខិតខំត្រងត្រាប់ចាប់យកនូវចំណេះដឹងបន្ថែមទៀត ពីវគ្គបណ្តុះបណ្តាលនិងសំណូមពរឲ្យគ្រូឧទ្ទេសនាមទាំងអស់ត្រូវបញ្ចេញឲ្យអស់ពីសមត្ថភាព ដើម្បីឲ្យសិក្ខាកាមបានយល់ដឹងគ្រប់ៗគ្នា ។
សូមបញ្ជាក់ថាគំរោង(LASED) ជាគំរោងមួយរបស់រជរដ្ឋាភិបាលស្ថិតក្រោមការដឹកនាំដ៏ឈ្លាសវៃ របស់សម្តេចតេជោ ហ៊ុន សែន ជាប្រមុខរាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋ តាមរយៈការផ្តល់ដីសម្បទានសង្គមកិច្ច និងអភិវឌ្ឍន៍សេដ្ឋកិច្ចជូនដល់ប្រជាពលរដ្ឋក្រីក្រ និងគ្មានដីពិតប្រាកដ គំរោងនិងផ្តល់ជូនប្រជាពលរដ្ឋទាំងនោះនូវដីសំរាប់សាងសង់លំនៅដ្ឋាន និង សំរាប់ប្រកបរបរកសិកម្ម ។ ហើយគំរោងនេះមានការចូលរួមពីធនាគារពិភពលោក និងអង្គការ GI2 អាល្លឺម៉ង់ ដែលបច្ចុប្បន្នកំពុងធ្វើការសាកល្បងទៅលើខេត្តចំនួនបី គឺកំពង់ចាម ក្រចេះ និងកំពង់ធំ ៕