ភ្នំពេញ: សម្តេចនាយករដ្ឋមន្ត្រីហ៊ុន សែន នឹងបកស្រាយអំពីបញ្ហាព្រំដែនកម្ពុជាជាមួយវៀតណាម នៅរដ្ឋសភា នាថ្ងៃស្អែកនេះ ចំណែកមន្ត្រីរាជការកម្ពុជាតាមក្រសួងនានា ក៏ត្រូវបានអនុញ្ញាតអោយសម្រាកពីការងារដើម្បីតាមដានការបកស្រាយរបស់លោកអំពីបញ្ហាដ៏ចម្រូងចម្រាស់មួយនេះផងដែរ។ នេះជាលើកដំបូងហើយដែលលោកនឹងធ្វើការបកស្រាយផ្ទាល់មាត់ ជូនដល់សភាតាមការស្នើសុំរបស់សមាជិកសភាមកពីគណបក្សប្រឆាំង។ នេះគឺជាព្រឹត្តិការណ៍ប្រវត្តិសាស្ត្រមួយដែលនាយករដ្ឋមន្ត្រីបានឆ្លើយតបនឹងតំណាងរាស្ត្រគណបក្សប្រឆាំងចំពោះបញ្ហាព្រំដែនដ៏រ៉ាំរ៉ៃជាមួយប្រទេសជិតខាង។
ប្រទេសកម្ពុជា និងវៀតណាម មានប្រវែងព្រំដែនគោកជាង ៨០០ គីឡូម៉ែត្រ និងបង្គោលសរុបចំនួន ៣៧៥ បង្គោល។ ការបោះបង្គោលចាប់ផ្តើមកាលពីឆ្នាំ២០០៦ ហើយគ្រោងនឹងបញ្ចប់នៅបំណាច់ឆ្នាំ២០១២នេះ។ ប៉ុន្តែទោះបីជាយ៉ាងនេះក៏ដោយចុះ គណបក្សប្រឆាំងតែងតែគិតថា ទឹកដីកម្ពុជាមួយចំនួនត្រូវបានបាត់បង់ទៅដល់ដៃវៀតណាម ហើយទម្លាក់កំហុសនេះមកលើរដ្ឋាភិបាលដែលដឹកនាំដោយសម្តេចហ៊ុន សែន។
ប្រជាពលរដ្ឋមកម្ពុជាមុខជានឹងតាមដានដោយយកចិត្តទុកដាក់ចំពោះការបកស្រាយរបស់លោក ដែលនឹងមានតម្លៃជាប្រវត្តិសាស្ត្រអំពីបញ្ហាព្រំដែនដ៏ចម្រូងចម្រាស់នេះ។ ខណៈដែលសារព័ត៌មានបស្ចឹមប្រទេសមួយចំនួនគិតថា លោកជានាយករដ្ឋមន្ត្រីដែលនិយាយមិនថ្នមសម្តីនោះ។ ប្រជាជនកម្ពុជាភាគច្រើនគិតថា លោកមិនត្រឹមតែជាមេដឹកនាំមួយរូបដែលអាចធានាស្ថិរភាពនយោបាយកម្ពុជាទេ ប៉ុន្តែថែមទាំងជាវាគ្មិនដ៏ពូកែហោសព្ទដែលទាក់ទាញការតាមដានយ៉ាងយកចិត្តទុកដាក់នៅពេលដែលលោកថ្លែងជាសាធារណ:ម្តងៗដូចជា នៅក្នុងការចុះជួបប្រជាជនរងគ្រោះដោយទឹកជំនន់ ការសម្ពោធសាលារៀន ការសម្ពោធផ្លូវថ្នល់ និងស្ពាន ព្រមទាំងហេត្ថារចនាសម្ព័ន្ធចំបាច់ដទៃទៀត។ ក្រៅពីប្រជាជនកម្ពុជានោះ វៀតណាម ថៃ និងឡាវ ក៏នឹងយកចិត្តទុកដាក់ផងដែរចំពោះអ្វីដែលនាយករដ្ឋមន្ត្រីកម្ពុជា នឹងនិយាយនៅក្នុងសភាដែលាមានសមាជិក១២៣នាក់ ពីព្រោះវានឹងទាក់ទងនឹងជំហរកម្ពុជាចំពោះបញ្ហាព្រំដែនជាមួយប្រទេសជិតខាង។
នៅពេលដែលលោកមានប្រសាសន៍នៅថ្ងៃស្អែក លោកនឹងត្រូវធ្វើការបកស្រាយមួយដែលប្រាប់ដល់ប្រជាជនកម្ពុជា អំពីកិច្ចប្រឹងប្រែងរបស់រដ្ឋាភិបាលរបស់លោក នៅក្នុងកិច្ចការពារបូរណភាពទឹកដីព្រមទាំងការកសាងសន្តិភាពតាមព្រំដែន ជាមួយប្រទេសវៀតណាមក៏ដូចជា ប្រទេសជិតខាងដទែទៀត។ កន្លងមកព្រួញជាច្រើនបានបាញ់ដោយអ្នកនយោបាយប្រឆាំង មកលើរដ្ឋាភិបាលរបស់លោកដោយចោទប្រកាន់ថា ធ្វើអោយបាត់បង់ទឹកដីកម្ពុជា។ បញ្ហាព្រំដែនត្រូវបានគណបក្សប្រឆាំងនៅកម្ពុជាយកមកប្រើប្រាស់គ្រប់ពេលវេលាឆ្ពោះទៅរកការបបោះឆ្នោត ដោយស្វែងរកសម្លេងឆ្នោត។ ខណៈដែលសម្លេងប្រឆាំងលាន់សម្លេងជាងមុន ក្រោយពីមានផែនការបង្រួបបង្រួមរវាងគណបក្សសមរង្ស៊ី និងគណបក្សសិទ្ធិមនុស្ស សម្តេចហ៊ុន សែន អាចប្រើប្រាស់ឱកាសថ្ងៃស្អែក ដើម្បីបិទច្រកនយោបាយមួយរបស់គណបក្សប្រឆាំង ដើម្បីកុំអោយពួកគេបន្តលើកយកមកវាយប្រហារលើគណបក្សប្រជាជនកម្ពុជា ដើម្បីស្វែងរកសម្លេងឆ្នោត។
ភ្នែកនឹងប្រឹងបើក ហើយត្រចៀកនឹងប្រឹងស្តាប់ការជជែកដេញដោលគ្នានៅរដ្ឋសភារវាងនាយករដ្ឋមន្ត្រី និងអ្នកតំណាងរាស្ត្រគណបក្សប្រឆាំង។ វប្បធម៌ នៃការជជែកដេញដោលដោយឈរនៅលើផលប្រយោជន៍ជាតិមួយបែបនេះ គួរត្រូវបានលើកទឹកចិត្តអោយមានជាបន្តទៀត ដើម្បីឆ្លុះបញ្ចាំងអំពីភាពចាស់ទុំនៃលទ្ធិប្រជាធិបតេយ្យនៅក្នុងប្រទេសកម្ពុជា ហើយផលប្រយោជន៍ជាតិត្រូវបានការពារទៅតាមផ្លូវច្បាប់។
បន្ទាប់ពីបានស្តាប់ការបកស្រាយនៅថ្ងៃស្អែកហើយ ប្រជាជនកម្ពុជានឹងអាចឈានដល់ការសន្និដ្ឋានពិតប្រាកដមួយថា តើរាជរដ្ឋាភិបាលកម្ពុជាបានធ្វើអ្វីខ្លះ ដើម្បីការពាររទឹកដីកម្ពុជា ហើយថា តើការចោទប្រកាន់របស់អ្នកនយោបាយប្រឆាំងកន្លងមកគួរអោយជឿឬយ៉ាងណា?
ការសន្និដ្ឋានណាមួយនឹងចំណុះទៅលើភាពប៉ិនប្រសប់របស់នាយករដ្ឋមន្ត្រី និងសមាជិកសភាគណបក្សប្រឆាំង។ សូមទុកអោយលំហូរសេរី នៃព័ត៌មានបំភ្លឺការគិតគូររបស់ប្រជាជនខ្មែរគ្រប់រូប៕