រាជធានីភ្នំពេញ ៖ លោកឧបនាយករដ្ឋមន្រ្តី ហោ ណាំហុង រដ្ឋមន្រ្តីការបរទេស និងសហប្រតិបត្តិការអន្តរជាតិបានមានប្រសាសន៍ដោយមានជំនឿយ៉ាងមុតមាំថា អាស៊ាននឹងបន្តដើរលើមាគ៌ា ត្រឹមត្រូវឆ្ពោះទៅសម្រេចសហគមន៍អាស៊ាននៅឆ្នាំ២០១៥ តាមទិសដៅ«សហគមន៍តែមួយជោគវាសនាតែមួយ» ដែលមានភាពស្អិតល្មួតផ្នែកនយោបាយមានសមាហរណកម្មសេដ្ឋកិច្ច និងរួបរួមគ្នាក្នុងសង្គមដែលយល់សុខទុក្ខគ្នា ។
ប្រសាសន៍ថ្លែងយ៉ាងដូច្នេះរបស់លោកប្រមុខការទូតខ្មែរ គឺបានធ្វើឡើងនៅព្រឹកថ្ងៃទី៨ សីហា ២០១២នេះ ក្នុងពិធីប្រារព្ធខួបលើកទី៤៥ នៃថ្ងៃបង្កើតអាស៊ាននៅទីស្តីការក្រសួងការបរទេស ។ ក្នុងឱកាសនោះដែរ លោកឧបនាយករដ្ឋមន្រ្តីហោ ណាំហុង បានលើកឡើងទៀតថា ចាប់តាំងពីបានកកើតឡើងកាលពី៤៥ឆ្នាំកន្លងទៅ អាស៊ានបានទទួលជោគជ័យដ៏ត្រចះត្រចង់ ។ ក្នុងឋានៈជាអង្គការតំបន់អាស៊ានបានឆ្លងកាត់ដំណាក់កាលដ៏លំបាក និងបញ្ហាប្រឈមជាច្រើន ។
ក្នុងការឆ្លើយតបទៅរាល់បញ្ហានីមួយៗ អាស៊ានតែងតែបោះជំហានឈានទៅមុខជានិច្ច ជាមួយស្មារតីសម្រុះសម្រួល។ ដោយមានព្រឹត្តិការណ៍សំខាន់ៗជាច្រើន និងមូលដ្ឋានសាមគ្គីភាពដ៏រឹងមាំ ក្នុងប្រវត្តិ៤៥ឆ្នាំនេះ លោកយល់ថាអាស៊ាននឹងមានជោគជ័យ ហើយអាចជម្នះបាននូវរាល់ស្ថានការណ៍អាក្រក់ទាំងឡាយ ។កាលពីឆ្នាំទៅការបង្ហូតទង់អាស៊ាន ត្រូវបានប្រារព្ធធ្វើឡើងនៅគ្រប់រដ្ឋធានីនៃរដ្ឋជាសមាជិកអាស៊ាន និងនៅតាមស្ថានទូតអាស៊ានទូទាំងពិភពលោក ។ ពេលនេះ យើងអាចមើលឃើញទង់អាស៊ានបក់រវិចគួរជាទីមោទនៈនៅទន្ទឹមនឹងទង់ជាតិរបស់រដ្ឋសមាជិកអាស៊ាន។
នេះគឺជាសក្ខីភាពនៃការបោះជំហានទៅមុខដ៏ធំមួយទៀត ឆ្ពោះទៅកាន់សហគមន៍អាស៊ាន ក៏ដូចជាការលើកកម្ពស់មុខមាត់អាស៊ានផងដែរ ។ លោកប្រមុខការទូតបន្តថា កម្ពុជាជឿជាក់ថា អាស៊ាននឹងបន្តឈានទៅមុខទៀតជាមួយនឹងស្មារតីឯកភាព និងសាមគ្គីភាព ដោយដកទុកមួយឡែកសិននូវរាល់បញ្ហាទាំងឡាយ ដែលយើងពុំអាចសម្រេចបាននូវមតិឯកភាពរួម ស្របទៅតាមស្មារតី និងទម្លាប់អនុវត្តន៍របស់អាស៊ាន ។គួរបញ្ជាក់ថា ក្នុងពិធីប្រារព្ធទិវាអាស៊ាន ខួបលើកទី៤៥ នៃការបង្កើតអាស៊ាន នាព្រឹកថ្ងៃពុធនេះ គេឃើញមានវត្តមានរបស់ឯកអគ្គរាជទូត ឯកអគ្គរដ្ឋទូត ប្រទេសជាមិត្តប្រចំាកម្ពុជាចូលរួមផងដែរ ៕