ខេត្តកំពង់ធំ: រាជរដ្ឋាភិបាលកម្ពុជា បានរៀបចំគម្រោង ស្នើសុំទៅកាន់រដ្ឋាភិបាលចិន សម្រាប់បញ្ជីគម្រោងឆ្នាំ២០១៤ ដើម្បីឲ្យចិន អនុម័តគាំទ្រឲ្យកម្ពុជាខ្ចីលុយ កសាងផ្លូវចំនួន ៤ ខ្សែ។ ក្នុងនោះ មានផ្លូវមួយខ្សែ តភ្ជាប់ពីខេត្តកំពង់ឆ្នាំង ទៅកាន់ខេត្តកំពង់ធំ តាមរយៈស្ពានកាត់បឹងទន្លេសាប។
ក្នុងពិធីសម្ពោធកំណាត់ផ្លូវជាតិលេខ ៦២ ពីខេត្តកំពង់ធំ ទៅកាន់ក្រុងព្រះវិហារ ប្រវែង ១២៨ គីឡូម៉ែត្រ នាព្រឹកថ្ងៃទី៨សីហា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា គម្រោងសាងសង់ផ្លូវ និងស្ពាននោះ ត្រូវបញ្ជូនកាន់រដ្ឋាភិបាលចិន នៅឆ្នាំ២០១៣ ដើម្បីសុំឲ្យចិនផ្តល់ការគាំទ្រ ផ្តល់ឥណទានដល់រដ្ឋាភិបាលកម្ពុជា សម្រាប់ការសាងសង់ផ្លូវ ៤ ខ្សែ នៅឆ្នាំ២០១៤។ ក្នុងនោះ មានផ្លូវ ១ ខ្សែ តភ្ជាប់ខេត្តកំពង់ឆ្នាំង និងខេត្តកំពង់ធំ គឺសាងសង់ផ្លូវជាតិលេខ ៥០ សេ ផ្សារក្រោម កំពង់ឆ្នាំង ទៅកាន់ភូមិចាណុល ភូមិរកា ឃុំស្រយ៉ូវ ខេត្តកំពង់ធំ។ ឆ្លងកាត់ទន្លេសាប ដែលស្ពានឆ្លងកាត់ទន្លេសាបនោះ មានប្រវែង ៣.៥០០ ម៉ែត្រ ដែលអាចចាត់ទុកថា ជាស្ពានដែលវែងជាងគេ។ ប៉ុន្តែជំរៅទឹក វាមិនជ្រៅពេកទេ"។
ជាមួយនឹងប្រសាសន៍ដូច្នេះ សម្តេចនាយករដ្ឋមន្ត្រី ហ៊ុនសែន ក៏បានងាកទៅផ្តាំផ្ញើដល់ឯកអគ្គរដ្ឋទូតចិន លោក ផាន់ខ្វាន់សៀ ដែលមានវត្តមានក្នុងពិធីនោះ ដើម្បីឲ្យជួយជំរុញទៅរដ្ឋាភិបាលចិន ផ្តល់ប្រាក់កម្ចីឥណទានដល់រដ្ឋាភិបាលរបស់សម្តេច ដើម្បីកសាងផ្លូវ និងស្ពាន សម្រាប់សមិទ្ធិផលថ្មី ដល់ប្រជាពលដ្ឋ អ្នកកំពង់ធំ នៅឆ្នាំ២០១៤។
សម្តេចនាយករដ្ឋមន្ត្រី ហ៊ុន សែន ក៏បានប្រកាសពីគម្រោងសាងសងផ្លូវ ដោយប្រើប្រាស់ប្រាក់កម្ចីឥណទានរបស់ប្រទេសចិន ក្នុងគម្រោងពីឆ្នាំ២០១៥ ដល់ឆ្នាំ២០១៧ មានផ្លូវចំនួន ១៣ គម្រោងទៀត ហើយមានគម្រោងមួយ ដែលអ្នកកំពង់ធំ ទទួលបាន គឺគម្រោងសាងសង់ផ្លូវលេខ ៦.០ ប៉េ ពីក្រុងក្រចេះ ផ្លូវជាតិលេខ ៧ ស្ពានឆ្លងទន្លេមេគង្គ កំពង់ថ្ម ខេត្តកំពង់ធំ។ បានសេចក្តីថា ផ្លូវនោះ កាត់ពីក្រចេះ មកដល់កំពង់ធំ។
សម្តេចនាយករដ្ឋមន្ត្រី ហ៊ុន សែន ក៏បានប្រកាសថា សរុបទៅ កម្ពុជាត្រូវការផ្លូវប្រមាណជា ២០ ខ្សែទៀត ដែលត្រូវការឥណទានរបស់ចិន។ ក្នុងនោះ ក៏មានគម្រោងសាងសង់ផ្លូវមួយខ្សែ ពីបាត់ដំបង ឆ្ពោះទៅកាន់សៀមរាប ឆ្លងកាត់ទន្លេសាប ហើយក្រុមហ៊ុនចិន បានសិក្សាពីរឆ្នាំរួចហើយ។
ដោយឡែកនៅឆ្នាំ២០១២នេះ សម្តេចនាយករដ្ឋមន្ត្រី ក៏បានប្រកាសថា កម្ពុជាក៏ទទួលបានការអនុម័តពីរដ្ឋាភិបាលចិន នូវប្រាក់កម្ចី ដើម្បីស្ថាបនាផ្លូវពីរខ្សែ គឺផ្លូវជាតិលេខ ៥៥ ខេត្តពោធិ៍សាត់ ភ្នំក្រវាញ វាលវែង ថ្មដា ទៅព្រំដែនថៃ ប្រវែង ១៩០ គីឡូម៉ែត្រ។ ផ្លូវជាតិលេខ ២៣ ឃុំពាមរាំងលើ និងផ្លូវលេខ ១១៨ ស្រុកលើកដែក ពាម កោះធំផងដែរ។
ជាមួយគ្នានោះ ក្នុងពេលសម្តេចនាយករដ្ឋមន្ត្រី ហ៊ុនសែន អញ្ជើញទៅកាន់ប្រទេសចិន ខេត្តស៊ីជាំង ដើម្បីចូលរួមពិព័រណ៍អាស៊ាន-ចិន គឺសម្តេចនឹងជួបជាមួយលោកនាយករដ្ឋមន្ត្រី វេង ជាប៉ាវ នាថ្ងៃទី១ ដើមខែកញ្ញាខាងមុខ ដោយសម្តេចនឹងស្នើសុំឲ្យចិន ផ្តល់ដល់កម្ពុជា ដើម្បីប្រែក្លាយផ្លូវលំជនបទ ទៅជាផ្លូវចាក់កៅស៊ូ។
យ៉ាងណាក៏ដោយ សម្តេចនាយករដ្ឋមន្ត្រី ហ៊ុន សែន មិនបានប្រកាសពីទឹកប្រាក់ ដែលត្រូវស្នើសុំខ្ចីពីប្រទេសចិន សម្រាប់សាងសង់ផ្លូវ និងស្ពាន ដែលស្ថិតក្នុងគម្រោងនៅឆ្នាំ២០១២ ឆ្នាំ២០១៣ និងបន្តដល់ឆ្នាំ២០១៤ ព្រមទាំងឆ្នាំបន្តបន្ទាប់ទៀតនោះទេ។
ក៏ប៉ុន្តែសម្តេចនាយករដ្ឋមន្ត្រី ហ៊ុនសែន បានកត់សម្គាល់ថា "ដូចខ្ញុំព្រះករុណាខ្ញុំបញ្ជាក់ ទាំងប៉ុន្មានដប់ខ្សែ មានទាំងគម្រោងកំពង់ឆ្នាំង-កំពង់ធំ កំពង់ធំ-ក្រចេះ គម្រោងនឹងនៅបន្ត ប៉ុន្តែបើខ្ញុំករុណាខ្ញុំមិននៅទេ ( មិនមែនជានាយករដ្ឋមន្ត្រីទេ ) សុំមិនទទួលខុសត្រូវទេ ព្រោះអ្នកក្រោយ គេអាចមិនត្រូវការគម្រោងនេះ ហើយម្យ៉ាងគេក៏មិនត្រូវការចិនដែរ គេស្អប់ចិន។ និយាយឲ្យពិតទៅ គេស្អប់ចិន ហើយឃើញចិន មកជួយខ្មែរច្រើននេះ គេមិនសប្បាយចិត្តទេ ដោយគេថា ចិនមកគាបសង្កត់ខ្មែរ។ តែចាំតែគៀបបានតើ! ផាន់ខ្វាន់សៀ ( ឯកអគ្គរដ្ឋទូតចិន ប្រចាំកម្ពុជា ) ដែលគាបហ៊ុនសែន ពីអង្កាល់?។ និយាយគ្នាឲ្យច្បាស់។ វេន ជាប៉ាវ ( នាយករដ្ឋមន្ត្រីចិន ) ដែលនឹងជួបគ្នានាពេលខាងមុខ ដោយខ្ញុំសម្រេចចិត្តថា នឹងចេញពីតេអ៊ីរ៉ង់ នៅព្រឹក ឬល្ងាច ថ្ងៃ៣១ ( សីហា ) អីចឹងអាចខ្ញុំទៅដល់ស៊ីជាំង ប្រទេសចិន នៅយប់ថ្ងៃទី៣១សីហា ឆ្នាំ២០១២"។
ជាការកត់សម្គាល់ នៅពេលសព្វថ្ងៃនេះ ចិន ជាប្រទេស ដែលបានផ្តល់ជំនួយ សម្រាប់សាងសង់ផ្លូវ និងស្ពាន វែងជាងគេ នៅក្នុងប្រទេសកម្ពុជា។
នៅក្នុងជំនួបពិភាក្សាការងារទ្វេភាគីជាមួយសម្តេចនាយករដ្ឋមន្ត្រី ហ៊ុន សែន កាលពីព្រលប់ថ្ងៃទី៤ ខែវិច្ឆិកា ឆ្នាំ២០១០ លោក វូ ប៉ាងគួរ ( Wu Bangguo ) ប្រធានរដ្ឋសភាចិន ក៏បានប្រកាសថា ចិនព្រមព្រៀងលុបបំណុល ដែលកម្ពុជាជំពាក់ ចំនួនជាង ៤.២៤០.០០០ ដុល្លារអាមេរិក។
ក្នុងនោះ ចិនក៏បានយល់ព្រមអនុវត្តន៍គម្រោងអភិវឌ្ឍន៍នៅកម្ពុជាចំនួន ២៣ គម្រោង ដែលមានទឹកប្រាក់សរុប ១.៦០០ លានដុល្លារអាមេរិក។ គម្រោងទាំងនោះ ត្រូវអនុវត្តន៍ចាប់ពីឆ្នាំ២០១០ ដល់ឆ្នាំ២០១៥ លើផ្លូវជាតិ ផ្លូវដែក ស្ពាន កំពង់ផែ និងប្រព័ន្ធព័ត៌មានវិទ្យា៕
