រដ្ឋមន្ត្រីការបរទេសសហរដ្ឋអាមេរិកលោកស្រីហ៊ីឡារីគ្លីងតុន កាលពីថ្ងៃអង្គារបានអំពាវនាវដល់ប្រទេសអាហ្វ្រិកខាងត្បូងដែលជាប្រទេសកាន់លទ្ធិប្រជាធិបតេយ្យនាំមុខរបស់ទ្វីបឲ្យសំដែងតួនាទីដែលមានឥទ្ធិពលថែមទៀតនៅក្នុងបញ្ហាអាហ្វ្រិក និង សាកល។
លោកស្រីគ្លីងតុន និយាយនៅពេលលោកស្រីជួបប្រជុំជាមួយរដ្ឋមន្ត្រីការបរទេសលោកស្រីម៉ែអេនកូអាណា ម៉ាសាមេនថា«យើងកំពុងស្វែងរកមធ្យោបាយដើម្បីបង្កើន និង ធ្វើឲ្យស៊ីជំរៅនូវភាពជាដៃគូរបស់យើង។ ប្រទេសអាហ្វ្រិកខាងត្បូងត្រូវតែផ្ដល់ឲ្យបានច្រើនដល់បណ្ដាប្រទេសដែលនៅសេសសល់នៅក្នុងពិភពលោក»។
«នៅពេលវិបត្តិនិងឱកាសកើតឡើងមានបញ្ហាស្វិតស្វាញដែលយើងត្រូវតែរកផ្លូវដោះស្រាយជាមួយគ្នាចាប់ពីការសាយភាយនុយក្លេអ៊ែរទៅដល់ការប្រែប្រួលធាតុអាកាស វិបត្តិសន្តិសុខ សភាពការណ៍នៅក្នុងសាធារណរដ្ឋប្រជាធិបតេយ្យកុងហ្កោ ឬប្រទេសស៊ីរី។
ក្រសួងការបទេសជាន់ខ្ពស់ម្នាក់និយាយថា លោកស្រីគ្លីងតុន ស្ថិតនៅក្នុងជើងទី៦ នៃដំណើរទស្សនកិច្ចនៅទ្វីបអាហ្វ្រិកនោះ ចង់ជំរុញទឹកចិត្តប្រទេសអាហ្រិកខាងត្បូងឲ្យសំដែងតួនាទី កាន់តែខ្លាំង និងកាន់តែមានឥទ្ធិពលនៅក្នុងកិច្ចការសកល។
ប្រទេសទាំង២ទំនងជាមានទំនាស់តិចតួចលើបញ្ហាខ្លះដូចជាកាដាក់ទណ្ឌកម្មលើប្រទេសអ៊ីរ៉ង់ និង ជម្លោះនៅប្រទេសស៊ីរី និង លីបី។
ប្រទេសអាហ្រិកខាងត្បូងដែលបច្ចុប្បន្នអង្គុយកៅអីតាមវេនមួយនៅក្នុងក្រុមប្រឹក្សាសន្តិសុខអង្គការសហប្រជាជាតិនោះកាលពីខែមុនបានបោះអនុប្បវាទពីការបោះឆ្នោតស្ដីពីទណ្ឌកម្មប្រឆាំងនឹងប្រទេសស៊ីរី ដែលគាំទ្រដោយសហរដ្ឋអាមេរិក និង បណ្ដាប្រទេសអឺរ៉ុបនោះ៕
រឹទ្ធ