សម្តេចតេជោ ហ៊ុន សែន អញ្ជើញសម្ពោធ ដាក់ឲ្យប្រើប្រាស់កំណាត់ផ្លូវលេខ៦២ ខេត្តកំពង់ធំ-ព្រះវិហារ
សម្តេចតេជោ ហ៊ុន សែន នាយករដ្ឋ មន្រ្តីនៃព្រះរាជាណាចក្រកម្ពុជា អមដោយមន្រ្តីជាន់ខ្ពស់ជាច្រើនរូប បានអញ្ជើញជាអធិបតីបើកសម្ពោធដាក់ឲ្យប្រើប្រាស់ជាផ្លូវការ នូវកំណាត់ផ្លូវជាតិលេខ៦២ ប្រវែង១២៨គីឡូម៉ែត្រ ចាប់ពីថ្នល់បំបែកខេត្តកំពង់ធំឆ្ពោះទៅទីរួមខេត្ត ព្រះវិហារ ក្រោមជំនួយ ឥណទានរបស់ចិន។ នៅក្នុងពិធីនេះ ក៏មានការអញ្ជើញចូលរួមពីអគ្គរដ្ឋទូចិនប្រចាំនៅកម្ពុជា និងប្រជាពលរដ្ឋ សិស្សានុសិស្ស យ៉ាងច្រើន កុះករ។ ម្រោងស្តារឡើងវិញ នូវកំណាត់ផ្លូវជាតិលេខ៦២នេះប្រើប្រាស់ថវិកាអស់ ៥២លានដុល្លាអាមេរិក ក្រោមកម្ចី ឥណទាន ធនាគារអាហរណ និហរណចិន និងរដ្ឋាភិបាលនៃសាធារណរដ្ឋ ប្រជាមានិតចិនដែលសាង
សង់ដោយ ក្រុមហ៊ុនសៀងហៃគ្រុប និងត្រួតពិនិត្យបច្ចេកទេសដោយក្រុមហ៊ុនក្វាងចូវ វ៉ាន់អាន ចំណាយ រយៈពេល៤០ខែជាប្រភេទផ្លូវចាក់កៅស៊ូ ២ជាន់(DBST) ក្នុងនោះមានស្ពាន១០កន្លែង។សមិទ្ធិផលថ្មីមួយនេះ វានឹងបម្រើ និងជំរុញ កំណើនសេដ្ឋកិច្ចសង្គមជាតិ ក្នុងការអភិវឌ្ឍវិស័យទេសចរណ៍ ដែលមានសក្តានុពលខ្ពស់ នៃប្រទេសកម្ពុជា គឺប្រាសាទបុរាណនិងធនធានធម្មជាតិ ម៉្យាងវិញទៀតផ្លូវ នេះ បង្កលក្ខណៈងាយស្រួល និងឆាប់រហ័សដល់ប្រជាពលរដ្ឋក្នុងតំបន់ធ្វើដំណើរនិងដឹកជញ្ជូនកសិផលផ្សេងៗ ពីខេត្តកំពង់ធំ ខេត្តព្រះវិហារ និងខេត្តស្ទឹងត្រែង ជាពិសេសវិស័យទេសចរណ៍ នឹងមានការកើនឡើងផងដែរ៕