ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា សម្ដេចនឹងបកស្រាយរឿងបញ្ហាព្រំដែនក្នុងរដ្ឋសភាដោយប្រើរយៈពេលច្រើនជាង៤ម៉ោងព្រោះជាការចងក្រងឯកសារប្រវត្តិសាស្ត្រនិងមានការដាក់បញ្ចាំងស្លាយបញ្ជាក់ពីទីតាំងនិមួយៗអោយបានលំអិតច្បាស់លាស់ជាទីបំផុត ហើយសង្ឃឹមថាគណបក្សប្រឆាំងនឹងមិនដើរចេញពីសភានៅថ្ងៃនោះទេ។
ការប្រជុំពេញអង្គរដ្ឋសភានឹងចាប់ផ្ដើមនៅថ្ងៃទី៩ខែសីហាឆ្នាំ២០១២ដែលមានរបៀបវារៈចំនួន៤ ក្នុងនោះសម្ដេចតេជោក៏នឹងឆ្លើយបកស្រាយអំពីបញ្ហាការងារបោះបង្គោលព្រំដែនអោយបានច្បាស់លាស់ផងដែរ ដែលបញ្ហាព្រំដែននេះគណបក្សប្រឆាំងបានស្នើអោយរាជរដ្ឋាភិបាលបកស្រាយបំភ្លឺជូនមតិសាធារណៈអោយបានដឹងផងដែរ។ប៉ុន្តែសម្ដេចតេជោបានដឹងពីល្បិចកលនេះដោយលើកឡើងថា ការស្នើរបស់គណបក្សប្រឆាំងប្រៀបដូចជាព្រួញមួយបាញ់បានសត្វពីរ គេលើកឡើងផ្ដោតលើរូបសម្ដេចតេជោអំពីបញ្ហាព្រំដែន ប៉ុន្តែគេសំដៅទៅលើកេរ្តិ៍តំណែលរបស់សម្ដេចព្រះ នរោត្ដម សីហនុ ទៅវិញ។
សម្ដេចតេជោមានប្រសាសន៍ទៀតថាសម្ដេចនឹងក្រុមការងារបានត្រៀមឯកសារពាក់ព័ន្ធនិងបញ្ហាព្រំដែនរួចរាល់អស់ហើយក្នុងការបកស្រាយនៅរដ្ឋសភាជាតិថ្ងៃទី៩ខែសីហាឆ្នាំ២០១២ស្អែកនេះ។សម្ដេចបន្តថាក្នុងពេលបកស្រាយនោះសង្ឃឹមថា«គណបក្សប្រឆាំងនឹងមិនដើរចេញពីរដ្ឋសភាទេ ព្រោះអ្វីដែលខ្ញុំនិយាយវាមិនស្មើនិងអស់លោកជេរពួកខ្ញុំថាអាក្បត់ជាតិនោះទេ។ វាមិនធ្ងន់ជាងអស់លោកដើរជេរខ្ញុំតាមតុគុយទាវ តាមចិញ្ចើមផ្លូវនោះទេ»។ សម្ដេចតេជោ បានផ្ដាំផ្ញើដល់គណបក្សប្រឆាំងថាប្រសិនបើដើរចេញក្នុងពេលប្រជុំសភានោះជាការអាម៉ាសមួយ ហើយអ្នកទាំងនោះគួរតែយកកន្សែងឬយកដៃបិតភ្នែកអោយជិត ដើម្បីកុំអោយឃើញអ្វីទាំងអស់ និងម្យ៉ាងទៀតគួរយកសំឡីញុកត្រចៀកអោយជិតហើយពេលទៅដល់ផ្ទះចាំដកចេញ ព្រោះពួកអស់លោកមិនចង់ស្ដាប់ហើយក៏មិនចង់ឃើញ៕ស្នាយពល-សុភក្តិ