ក្នុងពិធីបុណ្យប្រគេទៀនវស្សានោះ សម្តេចជាស៊ីម បានបង្ហាញមុខ ក្នុងសំលៀកបំពាក់អាចារ្យ ខោខ្មៅ អាវស បង់កប្រមា ដែលគេមើលទៅសម្តេចមានសុខភាពរឹងមាំ ដោយសម្តេចអាចអង្គុយលើកៅអី ស្តាប់លោកសូត្រធម៌។ ពិធីនោះ ក៏ត្រូវបានអនុញ្ញាតឲ្យអ្នកកាសែត ចូលថតរូបផងដែរ។
សូមរម្លឹកថា មានការចុះផ្សាយដំណឹង តាមហ្វេសប៊ុក នៅថ្ងៃចន្ទ ទី៦សីហា ឆ្នាំ២០១២ ដោយលើកឡើងថា សម្តេច ជា ស៊ីម បានទទួលមរណភាព ខណៈដែលក្នុងរយៈពេលចុងក្រោយនេះគេឃើញសម្តេច ជា ស៊ីម មានបញ្ហាសុខភាពមិនសូវល្អ និងអវត្តមាន នៅក្នុងពិធីសាធារណៈធំៗមួយចំនួន ដូចជា ថ្ងៃខួបបង្កើតគណបក្សប្រជាជនកម្ពុជា កាលពីថ្ងៃទី២៨មិថុនា ឆ្នាំ២០១២។
ក៏ប៉ុន្តែខុទ្ទកាល័យសម្តេចជាស៊ីម និងអគ្គលេខាធិការព្រឹទ្ធសភា បានចេញសេចក្តីប្រកាសជាលាយលក្ខណ៍អក្សរ និងផ្ទាល់មាត់ ច្រានចោលនូវព័ត៌មានបំផ្លើស និងព័ត៌មានប្រឌិតអកុសលនោះ ហើយថាសម្តេចជាស៊ីម ដែលមានអាយុ ៧៩ ឆ្នាំ មានសុខភាពល្អ និងកំពុងប្រតិបត្តិមុខងារជាប្រមុខរដ្ឋស្តីទី។ ខុទ្ទកាល័យសម្តេចជាស៊ីម ក៏បានព្រមានប្តឹងចំពោះអ្នកផ្សព្វផ្សាយព័ត៌មានបំផ្លើសនោះផងដែរ៕ S