ខេត្តកំពង់ធំ: ពិធីសម្ពោធបើកឱ្យប្រើប្រាស់កំណាត់ផ្លូវជាតិលេខ ៦២ ផ្នែកខាងត្បូង ពីកំពង់ធំ ទៅក្រុងព្រះវិហារ ខេត្តព្រះវិហារ ប្រវែង ១២៨ គីឡូម៉ែត្របានធ្វើឡើងនាព្រឹកថ្ងៃទី៨ ខែសីហា ឆ្នាំ២០១២ ក្រោមកម្ចីឥណទានសម្បទានរបស់សាធារណរដ្ឋប្រជាមានិតចិន។ កំណាត់ផ្លូវនោះ ចំណាយថវិកាសរុបជាង ៦២លានដុល្លារអាមេរិក ដោយកម្ចីឥណទានពីរដ្ឋាភិបាលចិន ប្រមាណ ៥២ លានដុល្លារ និងប្រាក់បដិភាគរបស់រដ្ឋាភិបាលកម្ពុជា ចំណាយសរុបជាង ១០ លានដុល្លារ។
លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងក្នុងពិធីបើកសម្ពោធនាព្រឹកមិញថា រដ្ឋាភិបាលនៃសាធារណរដ្ឋប្រជាមានិតចិន បានផ្ដល់កម្ចីឥណទាន និងជំនួយបច្ចេកទេសជាបន្ដបន្ទាប់សម្រាប់ការសាងសង់ និងស្ដារឡើងវិញនូវផ្លូវ-ស្ពានជាច្រើនកន្លែងនៅទូទាំងប្រទេស រួមទាំងការសាងសង់ និងស្ដារឡើងវិញនូវកំណាត់ផ្លូវជាតិលេខ៦២នេះ ដើម្បីរួមចំណែកអភិវឌ្ឍន៍ហេដ្ឋារចនាសម្ព័ន្ធដឹកជញ្ជូននៅកម្ពុជា និងជួយសម្រួលដល់ចរាចរណ៍ដឹកជញ្ជូន និងការធ្វើដំណើររបស់ប្រជាពលរដ្ឋកម្ពុជានៅទូទាំងប្រទេស និងជំរុញកំណើនសេដ្ឋកិច្ច អភិវឌ្ឍន៍សង្គម ការធ្វើសមាហរណកម្មផ្ទៃក្នុង លើកកម្ពស់កិច្ចសហប្រតិបត្ដិការក្នុងតំបន់ និងកាត់បន្ថយភាពក្រីក្ររបស់ប្រជាពលរដ្ឋកម្ពុជា ឱ្យបានឆាប់រហ័ស។
លោករដ្ឋមន្ត្រី បានបន្ថែមថា សមិទ្ធផលដែលត្រូវធ្វើពិធីសម្ពោធបើកឱ្យប្រើប្រាស់ និងដែលសម្ដេចតេជោនាយករដ្ឋមន្ដ្រី បានផ្ដល់កិត្ដិយសអញ្ជើញជាអធិបតីដ៏ខ្ពង់ខ្ពស់ក្នុងថ្ងៃនេះ គឺជាការសាងសង់ឡើងវិញកំណាត់ផ្លូវជាតិលេខ៦២ ផ្នែកខាងត្បូង ចាប់ពីផ្លូវបំបែកផ្លូវជាតិលេខ៦ ត្រង់ភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ក្នុងខេត្ដកំពង់ធំ ដល់ត្បែងមានជ័យ ទីរួមខេត្ដព្រះវិហារ មានប្រវែង១២៨គីឡូម៉ែត្រ មានសាងសង់ស្ពានចំនួន ១០កន្លែង ប្រវែង ៤៤៨ម៉ែត្រ និង លូចំនួន១៤៥ កន្លែងមានប្រវែង ១៨៥៧ម៉ែត្រ។ គម្រោងនេះចំណាយថវិកាសរុបប្រមាណ ៥២លានដុល្លារអាមេរិក និងថវិកាបដិភាគមួយចំនួនរបស់រាជរដ្ឋាភិបាល សម្រាប់ការដោះមីនយុទ្ធភណ្ឌមិនទាន់ផ្ទុះ និងដោះស្រាយផលប៉ះពាល់ អនុវត្ដន៍ការសាងសង់ដោយ ក្រុមហ៊ុនសំណង់ចិនសៀងហៃគ្រូប និងត្រួតពិនិត្យបច្ចេកទេសដោយក្រុមហ៊ុនចិន ក្វាងចូវវ៉ានអាន ដែលតាមការគ្រោងទុក គឺត្រូវបញ្ចប់ក្នុងរយៈពេល ៤០ ខែ រហូតដល់ដើមឆ្នាំ ២០១៤ ប៉ុន្តែត្រូវបានបញ្ចប់មុនផែនការកំណត់។
លោក ត្រាំ អ៊ីវតឹក ក៏បានបន្ថែមថា សមិទ្ធផលខាងលើនេះ ពិតជាមានតម្លៃធំធេងមហាសាល មិនអាចកាត់ថ្លៃបាន និងជាចំណងដៃមួយដ៏ពិសិដ្ឋសម្រាប់ខេត្ដកំពង់ធំ និងព្រះវិហារ។ ប្រជាពលរដ្ឋ មន្ដ្រីរាជការ និងកងកម្លាំងប្រដាប់អាវុធនៅទូទាំងខេត្ដកំពង់ធំ និងព្រះវិហារ ក៏ដូចជាប្រជាពលរដ្ឋនៅទូទាំងប្រទេស មានការរំភើបសប្បាយរីករាយយ៉ាងខ្លាំងចំពោះសមិទ្ធផលដ៏ធំធេងខាងលើនេះ ដែលបានបដិសន្ធិឡើង នៅចំកាលៈទេសៈដែលកម្ពុជាកំពុងត្រូវការចាំបាច់បំផុត ក្នុងដំណើរការនៃការអភិវឌ្ឍប្រទេសជាតិ ជំរុញកំណើនសេដ្ឋកិច្ច អភិវឌ្ឍន៍វិស័យទេសចរណ៍ ពាណិជ្ជកម្ម ប្រែក្លាយទីជនបទនិងបណ្តាខេត្ដដែលនៅដាច់ស្រយាល ពិសេសតំបន់ព្រំដែន ឱ្យទៅជាតំបន់សន្ដិភាព អភិវឌ្ឍន៍ និងសហប្រតិបត្ដិការ និងជាមូលដ្ឋានការពារបូរណភាពដែនដី។
លោក ត្រាំ អ៊ីវតឹក ក៏បានបន្ថែមថា សមិទ្ធផលនេះ បានបង្ហាញនូវស្នាដៃដ៏ធំធេងមួយថ្មីថែមទៀតរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំដ៏ឈ្លាសវៃ ប្រកបដោយគតិបណ្ឌិត ដែលតែងបានគិតគូរជានិច្ចដល់សុខទុក្ខ និងជីវភាពរស់នៅរបស់ប្រជាពលរដ្ឋនៅគ្រប់ទីតំបន់នៅទូទាំងប្រទេស។
ជាមួយនឹងប្រសាសន៍ដូច្នេះ លោកត្រាំអ៊ីវតឹក ក៏បានលើកឡើងថា កំណាត់ផ្លូវជាតិលេខ៦២ ពីកំពង់ធំ ដល់ក្រុងព្រះវិហារ ខេត្តព្រះវិហារ គឺជាផ្លូវមេ និងជាផ្លូវយុទ្ធសាស្ដ្រ តភ្ជាប់កំពង់ធំទៅក្រុងព្រះវិហារ និងតភ្ជាប់កំណាត់ផ្លូវជាតិលេខ៦២ កំណាត់ខាងជើង ឆ្ពោះទៅតំបន់ព្រំដែន។ ពិសេសកំណាត់ផ្លូវនេះ ក៏នឹងតភ្ជាប់ប្រាសាទព្រះវិហារ ទៅនឹងក្រុងសៀមរាបអង្គរ ដែលរួមគ្នាក្លាយទៅជាប៉ូលសេដ្ឋកិច្ចមួយដ៏សំខាន់ និងជាមជ្ឈមណ្ឌលទេសចរណ៍ដ៏មានសក្ដានុពលរបស់ព្រះរាជាណាចក្រកម្ពុជា ដែលសម្បូរទៅដោយប្រាង្គប្រាសាទបូរាណជាមរតកសម្បត្ដិវប្បធម៌ និងបូជនីយដ្ឋានប្រវត្ដិសាស្ដ្រ ដ៏ល្បីល្បាញរុងរឿងរបស់អាណាចក្រខ្មែរបុរាណ និងជាសម្បត្ដិវប្បធម៌ដ៏មានតម្លៃ របស់មនុស្សជាតិ និងបេតិកភណ្ឌពិភពលោក។
លោកត្រាំអ៊ីវតឹក បានបន្ថែមថា កំណាត់ផ្លូវជាតិលេខ៦២ ពីកំពង់ធំ ដល់ក្រុងព្រះវិហារ ខេត្តព្រះវិហារ និយាយដោយឡែក ផ្លូវជាតិលេខ៦២ទាំងមូល និយាយជារួម បានសាងសង់ឡើងវិញ សំដៅធ្វើសមាហរណកម្មផ្ទៃក្នុង ដែលអាចកំណត់បានថា ជាកំណាត់ផ្លូវចុងក្រោយក្នុងការធ្វើសមាហរណកម្មផ្ទៃក្នុងប្រទេស តាមរយៈការតភ្ជាប់ទីរួមខេត្ដទាំងអស់ ចុងក្រោយ គឺទីរួមខេត្តព្រះវិហារ ទៅនឹងរាជធានីភ្នំពេញ ដោយផ្លូវថ្នល់ក្រាលកៅស៊ូ សំដៅបម្រៃឱ្យវិស័យទេសចរណ៍ ជំរុញការអភិវឌ្ឍសេដ្ឋកិច្ច រួមទាំងបម្រើកិច្ចការពារប្រទេសថែមទៀត។ បច្ចុប្បន្នកំណាត់ផ្លូវនេះ ដែលពីមុនគឺជាផ្លូវដែលមានអសន្ដិសុខ និងប្រកបដោយគ្រោះថ្នាក់ ទៅជាផ្លូវចរាចរណ៍ដឹកជញ្ជូនទេសចរណ៍ ធ្វើដំណើរកម្សាន្ដដោយក្ដីមោទនភាព និងសោមនស្សរីករាយ ប្រជាពលរដ្ឋរស់នៅដោយសុខក្សេមក្សាន្ដ និងបានប្រែក្លាយតំបន់ដែលបន្សល់ដោយស្លាកស្នាមនៃភ្លើងសង្គ្រាម នៅតាមផ្លូវនេះឱ្យក្លាយទៅជាតំបន់អភិវឌ្ឍន៍ ដាំដុះដំណាំកសិកម្ម ដ៏មានសក្ដានុពល។
ក្នុងសុន្ទរកថា លោក ត្រាំ អ៊ីវតឹក ក៏បានបន្ថែមថា ការសាងសង់ឡើងវិញផ្លូវជាតិលេខ៦២នេះ ក៏ជួយលើកកម្ពស់ជីវភាពរស់នៅរបស់ប្រជាពលរដ្ឋ នៅតំបន់ភាគខាងជើងរបស់កម្ពុជា ដែលមានសក្ដានុពល ខាងកសិ-ឧស្សាហកម្ម ទេសចរណ៍ធម្មជាតិ និងធនធានរ៉ែនៃខេត្ដព្រះវិហារ ឧត្ដរមានជ័យ និងស្ទឹងត្រែង ជួយជំរុញការ រៀបចំ និងប្រែក្លាយសមរភូមិប្រយុទ្ធនៅតំបន់នេះ ឱ្យទៅជាតំបន់អភិវឌ្ឍន៍ និងជាតំបន់យុទ្ធសាស្ដ្រសម្រាប់កសាងមូលដ្ឋានសេដ្ឋកិច្ចផង និងមូលដ្ឋានការពារប្រទេសផង ។ ផ្លូវជាតិលេខ៦២ នេះ នឹងជួយជំរុញបន្ថែមល្បឿននៃការអភិវឌ្ឍសេដ្ឋកិច្ច និងសង្គមកម្ពុជា តាមរយៈការជួយសម្រូលចរាចរណ៍ដឹកជញ្ជូន ការធ្វើពាណិជ្ជកម្ម ការផ្លាស់ប្ដូរផលិតផលកសិកម្ម ឧស្សាហកម្ម ការពង្រឹងកិច្ចសហប្រត្ដិបត្ដិការជាមួយប្រទេសថៃ ដែលនៅជិតខាង និងប្រទេសក្នុងតំបន់ និងការអភិវឌ្ឍតំបន់ត្រីកោណមរកត កម្ពុជា-ឡាវ-ថៃ។ល។
ម្យ៉ាងទៀត លោករដ្ឋមន្ត្រី បានលើកឡើងថា ទៅដល់ទីក្រុងព្រះវិហារ ផ្លូវជាតិលេខ៦២នេះ ក៏បានបំបែកនិងតភ្ជាប់ទៅនឹងផ្លូវលេខ ២១០ ឆ្ពោះទៅកាន់ខេត្ដសៀមរាប កាត់តាមបឹងមាលា ដំដែក និងមួយផ្នែកទៀតបំបែកនិងតភ្ជាប់ទៅនឹងផ្លូវជាតិលេខ៩ ឆ្ពោះទៅធារាបរិវត្ត និងទីក្រុងស្ទឹងត្រែងនៃខេត្ដស្ទឹងត្រែង ជារបៀងសម្រាប់តភ្ជាប់តំបន់ ភូមិភាគឦសាន ទៅភូមិភាគពាយ័ព្យរបស់កម្ពុជា និងដែលជាផ្នែកមួយនៃរបៀងសេដ្ឋកិច្ចខាងត្បូង ខ្សែទី២ នៃមហាអនុតំបន់មេគង្គ។ របៀងសេដ្ឋកិច្ចខាងត្បូងខ្សែទី២នេះ តភ្ជាប់ពីទីក្រុងបាងកក និងភូមិភាគខាងត្បូងរបស់ព្រះរាជាណាចក្រថៃ កាត់តាមច្រកទ្វារព្រំដែនប៉ោយប៉ែត មកកាន់សៀមរាបអង្គរ បឹងមាលា ឆ្ពោះទៅព្រះវិហារ បន្ដទៅទីក្រុងស្ទឹងត្រែងនៃខេត្ដស្ទឹងត្រែង និងឆ្ពោះទៅកាន់ទីក្រុងបានលុង នៃខេត្ដរតនគិរី ហើយបន្ដទៅច្រកទ្វារព្រំដែន អូរយ៉ាដាវ ដើម្បីតភ្ជាប់ទៅនឹងកំពង់ផែគីញ៉ឺង និងភូមិភាគកណ្ដាល ដែលជាតំបន់មានសក្ដានុពលខាងសេដ្ឋកិច្ច និងទេសចរណ៍របស់វៀតណាម ដែលនឹងរួមចំណែកយ៉ាងខ្លាំងក្លាក្នុងការលើកកម្ពស់ប្រសិទ្ធភាពនៃការធ្វើចរាចរណ៍ដឹកជញ្ជូន ព្រមទាំងអភិវឌ្ឍន៍វិស័យពាណិជ្ជកម្ម ទេសចរណ៍ កសិកម្ម ឧស្សាហកម្ម អាជីវកម្មរ៉ែ ជាដើម។
លោក ត្រាំ អ៊ីវតឹក បានកត់សម្គាល់ថា ការសម្រេចបានជោគជ័យក្នុងការសាងសង់ និងអភិវឌ្ឍន៍ផ្លូវ-ស្ពាន ខ្វាត់ខ្វែងប្រទាក់ក្រឡាពីទីប្រជុំជន ទីក្រុងដល់ជនបទជិតឆ្ងាយដែលក្រសួងសាធារណការ និងដឹកជញ្ជូន ទទួលបានកន្លងមក គឺអាស្រ័យដោយការដឹកនាំគាំទ្រ និងការលើកទឹកចិត្ដយ៉ាងសកម្មរបស់រាជរដ្ឋាភិបាលដែលមានសម្ដេចតេជោនាយករដ្ឋមន្ដ្រី ជាប្រមុខដឹកនាំដ៏ឆ្នើម ដែលជានិច្ចកាលបានចាត់ទុកការស្ដារ និងសាងសង់ហេដ្ឋារចនាសម្ព័ន្ធដឹកជញ្ជូន ផ្លូវគោក ផ្លូវទឹក ផ្លូវដែក ផ្លូវអាកាស ស្ថិតក្នុងមុំអាទិភាពទី២ នៃយុទ្ធសាស្ដ្រចតុកោណដំណាក់កាលទី២ ជាពិសេសសម្ដេច តែងតែពុះពារស្វះស្វែងរកប្រភពធនធានពីគ្រប់មជ្ឈដ្ឋាន សម្រាប់ការសាងសង់ផ្លូវ-ស្ពាន នៅទូទាំងប្រទេស។
សូមរម្លឹកថា ក្រសួងសាធារណការ និងដឹកជញ្ជូន បានរៀបចំពិធីសម្ពោធដាក់ឲ្យប្រើប្រាស់ជាផ្លូវការ ផ្លូវជាតិលេខ ៦២ ប្រវែង ១២៨ គីឡូម៉ែត្រ ពីខេត្តកំពង់ធំ ទៅដល់ក្រុងព្រះវិហារ ក្រោមកម្ចីឥណទានពីរដ្ឋាភិបាលនៃសាធារណរដ្ឋប្រជាមានិតចិន។ ពិធីនោះធ្វើឡើងនៅព្រឹកថ្ងៃទី៨សីហា ឆ្នាំ២០១២ នៅភូមិវល្លិយាវ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ក្រោមអធិបតីភាពដ៏ខ្ពង់ខ្ពស់សម្តេចហ៊ុនសែន និងលោកជំទាវ។
តាមកម្មវិធី លោក ផាន គ័ងស៊ា ឯកអគ្គរដ្ឋទូតចិន ប្រចាំកម្ពុជា ក៏អញ្ជើញចូលរួម ក្នុងពិធីសម្ពោធបើកឲ្យប្រើប្រាស់ជាផ្លូវការផ្លូវជាតិលេខ ៦២ ( ផ្នែកខាងត្បូង ) ប្រវែង ១២៨ គីឡូម៉ែត្រ ពីកំពង់ធំ ទៅដល់ក្រុងព្រះវិហារ នាព្រឹកថ្ងៃទី៨សីហា ឆ្នាំ២០១២។ លោកឯកអគ្គរដ្ឋទូតចិន ក៏ឡើងថ្លែងសុន្ទរកថា មុនពេលសម្តេចហ៊ុនសែន មានមតិសំណេះសំណាល និងបំពាក់មេដាយ ព្រមទាំងកាត់ខ្សែបូជានិមិត្តរូបនៃការបើកឲ្យប្រើប្រាស់ផ្លូវជាតិលេខ ៦២ ជាផ្លូវការ៕
