ខេត្តកំពង់ធំ: ក្នុងពិធីសម្ពោធកំណាត់ផ្លូវជាតិលេខ ៦២ ពីខេត្តកំពង់ធំ ទៅកាន់ក្រុងព្រះវិហារ ប្រវែង ១២៨ គីឡូម៉ែត្រ នាព្រឹកថ្ងៃទី៨សីហា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ផ្តាំផ្ញើដល់អាជ្ញាធរខេត្ត និងអាជ្ញាធរមូលដ្ឋាន ឲ្យបន្តមើលថែក្រុមយុវជនស្ម័គ្រចិត្ត ដែលដឹកនាំដោយកូនប្រុសរបស់សម្តេច នៅក្នុងយុទ្ធនាការវាស់វែងដីធ្លី ចែកជូនដល់ប្រជាពលរដ្ឋកម្ពុជា នៅទូទាំងប្រទេស នាពេលនេះ។ មកដល់ពេលនេះ ក្រុមយុវជនស្ម័គ្រចិត្ត បានវាស់វែងដីទំហំ ១៧២.៨៤៥ ហិកតា ក្នុងចំណោមផ្ទៃដីសរុប ១,២ លានហិកតា។
សម្តេចនាយករដ្ឋមន្ត្រី ហ៊ុនសែន បានមានប្រសាសន៍ថា "ក្រុមយុវជនស្ម័គ្រចិត្តទាំងនោះ បានជួយការងារច្រើនណាស់ នៅមូលដ្ឋាន ក្រៅពីវាស់វែងដីធ្លី ក្មួយៗទាំងនោះ បានជួយជួសជុលសាលារៀន និងសុំពីខ្ញុំ សាងសង់សាលារៀន និងស្រះទឹកជាច្រើនទៀត។ ក្មួយៗទាំងនោះ ក៏បានចែករំលែកនូវចំណេះដឹង និងសម្ភារៈដល់ប្រជាជននៅមូលដ្ឋានផងដែរ"។
សម្តេចហ៊ុនសែន ក៏បានប្រកាសថា នៅពេលខាងមុខនេះ រាជរដ្ឋាភិបាល នឹងត្រូវបន្ថែមប្រមាណជា ១០ ក្រុមថែមទៀត ទៅកាន់ខេត្តគោលដៅមួយចំនួនថែមទៀត ដូចជា នៅខេត្តពោធិ៍សាត់ និងខេត្តក្រុងមួយចំនួនទៀត។ ឥឡូវភរិយារបស់សម្តេច កំពុងតែត្រៀមអាវរងា ដើម្បីចែកជូនដល់ក្រុមយុវជន និងមន្ត្រីសូរិយាដី ដែលចុះវាស់វែងដីធ្លីទាំងនោះ។
ជាមួយគ្នានោះ សម្តេចនាយករដ្ឋមន្ត្រី ហ៊ុនសែន ក៏បានបន្ថែមថា ក្រុមនិស្សិត ១០ ក្រុម ដែលត្រូវិលត្រឡប់មកកាន់ខេត្តកំពង់ធំ នៅថ្ងៃទី៩សីហា ឆ្នាំ២០១២ ត្រូវពន្យារពេលដល់ថ្ងៃ១០សីហាវិញ។ ក្នុងនោះ ក៏មានក្រុមនិស្សិតមួយចំនួនទៀត ត្រូវធ្វើដំណើរទៅកាន់ខេត្តដទៃទៀត។ ប៉ុន្តែដោយសារតែដើម្បីឲ្យនិស្សិតបានយល់ជ្រាបពីបញ្ហាព្រំដែនកម្ពុជា-វៀតណាម ត្រូវស្នាក់នៅភ្នំពេញមួយថ្ងៃទៀត ដើម្បីតាមដានបទអន្តរាគមន៍របស់សម្តេច នៅរដ្ឋសភា។
សម្តេចនាយករដ្ឋមន្ត្រី ហ៊ុន សែន ក៏បានបង្ហាញនូវទិន្នន័យមួយ ដែលយប់មិញថា "នៅម៉ោង ១០ យប់ ថ្ងៃទី៧សីហា ឆ្នាំ២០១២ ក្រសួងរៀបចំដែនដី នគរូបនីយកម្ម និងសំណង់ បានបញ្ជូនមកខ្ញុំ គឺយើងបានវាស់វែងដីទំហំ ១៧២.៨៤៥ ហិកតា ហើយ។ ក្នុងនោះ កត់ក្នុងសម្រង់បញ្ជីឈ្មោះ ៩៥.០៦៨ គ្រួសារ។ ចំនួនគ្រួសារ ដែលផ្ទៀងផ្ទាត់រួច មានចំនួន ៧៨.៤៣៣ គ្រួសារ។ វាស់ក្បាលដី ៧៤.០៤៧ ក្បាលដី។ អីចឹងទេ យើងនៅខ្វះតែ ៥.០០០ គ្រួសារទៀត ស្មើនឹង ១០០.០០០ គ្រួសារហើយ ក្នុងពេលដែលមានតម្រូវការ ធ្វើប្រមាណជាង ៣៥០.០០០ គ្រួសារ និងដី ១,២ លានហិកតា ដើម្បីឲ្យប្រជាពលរដ្ឋមានសុវត្ថិភាព កាន់កាប់ដីធ្លី។ ផ្តល់កម្មសិទ្ធិជូន។ ពីដើម ធ្វើដោយភ្នែកស ភ្នែកខ្មៅ មិនដឹងថ្ងៃណាគេយកវិញ។ ឥឡូវប្រជាពលរដ្ឋ នឹងទទួលបានកម្មសិទ្ធិ។ សុំធ្វើផ្ទះឲ្យធំទៅ ហើយបង្កបង្កើនផលឲ្យបានច្រើនទៅ។ គ្រាន់តែស្នើសុំកុំឲ្យលក់ដីនោះ ហើយកុំរានព្រៃបន្ថែម"។
ជាមួយនឹងប្រសាសន៍ដូច្នេះ សម្តេចនាយករដ្ឋមន្ត្រី ហ៊ុនសែន ក៏បានប្រកាសថា "យើងនឹងផ្តល់ដីសង្គមកិច្ចរាប់សិបម៉ឺនហិកតាទៀត ឲ្យតែខ្វះដីពិតប្រាកដ ហើយក្រសួងផែនការបានធ្វើគម្រោង ក១ ក២ អាក្រទី១ ក្រទី២ យើងស្រួលប្រើណាស់។ យើងយកសំរង់ទិន្នន័យនោះ ដើម្បីប្រគល់ដីឲ្យគាត់។ វាស់ព្រំប្រទល់ឲ្យហើយ ជូនទៅ ៣ ហិកតា ឬ ៥ ហិកតា ដើម្បីឲ្យខ្មែរមានដីធ្វើ។ អីចឹងទេ អរគុណណាស់ចំពោះការចូលរួមទាំងឡាយរបស់ប្រជាពលរដ្ឋ នៅក្នុងកម្មវិធីដីធ្លីរបស់រាជរដ្ឋាភិបាលអាណត្តិនេះ"។
សម្តេចហ៊ុនសែន ក៏បានប្រកាសថា "យើងក៏នឹងបន្តពន្លឿន ល្បឿននៃការផ្តល់ដីសង្គមកិច្ចជូនប្រជាពលរដ្ឋ។ អ្នកដែលខ្វះដីពិតប្រាកដ កុំទៅចាញ់បោកមេខ្យល់ គេទារយកលុយ ដើម្បីបានដី។ រាជរដ្ឋាភិបាលនឹងដោះស្រាយជូននូវដីធ្លីជូនប្រជាពលរដ្ឋ"។
សូមរម្លឹកថា ក្រុមយុវជនស្ម័គ្រចិត្តសម្តេចតេជោហ៊ុនសែន ដែលដឹកនាំដោយលោក ហ៊ុនម៉ានិត កូនប្រុសរបស់សម្តេចហ៊ុនសែន បានចុះបំពេញបេសកកម្មវាស់វែងដីធ្លី ជូនប្រជាពលរដ្ឋ លើកដំបូង កាលពីថ្ងៃទី២៨មិថុនា ឆ្នាំ២០១២ នៅតាមខេត្តគោលដៅមួយចំនួន។ ក្រុមយុវជនទាំងនោះ ក៏ត្រូវបានបញ្ជូន ទៅកាន់មូលដ្ឋាន ជាបន្តបន្ទាប់ ដែលមកដល់ពេលនេះ មានចំនួនជាង ១.០០០ នាក់ហើយ។ បេសកកម្មវាស់វែងដីធ្លីនោះ ត្រូវបានរដ្ឋាភិបាលកំណត់ថា មានរយៈពេល ៦ ខែ៕
