រដ្ឋសភា នឹងពិភាក្សាអំពីការប្រើប្រាស់ ហត្ថពលកម្មខ្មែរ
នៅប្រទេសកាតា នាថ្ងៃស្អែកនេះ
រដ្ឋសភានៃព្រះរាជាណាចក្រកម្ពុជា គ្រោងនឹងធ្វើការពិភាក្សា និង អនុម័តសេចក្តីព្រាងច្បាប់មួយ ទាក់ទិននឹងការបញ្ជូនប្រជាពលរដ្ឋកម្ពុជាឲ្យទៅបម្រើការងារនៅក្នុងប្រទេសកាតា នៅថ្ងៃទី ០៩ ខែសីហា ស្អែកនេះ ក្រោយពីប្រទេសកាតាបានប្រកាសយល់ព្រមទទួល យកពលករស្របច្បាប់ពីប្រទេសកម្ពុជាកាលពីឆ្នាំមុន ។ បើយោងតាមសេចក្តីជូនដំណឹងរបស់អគ្គលេខាធិការដ្ឋានរដ្ឋសភា បានឲ្យដឹងថា រដ្ឋសភា នឹងបន្តសម័យប្រជុំរដ្ឋសភាលើកទី ៨ នីតិកាលទី ៤ ក្រោមអធិបតីភាពដ៏ខ្ពង់ខ្ពស់របស់សម្តេច អគ្គមហាពញាចក្រី ហេង សំរិន ប្រធានរដ្ឋសភា ។
ក្នុងសម័យប្រជុំនោះ នឹងមានលើកយករបៀបវារ:មួយចំនួន រួមទាំងការពិភាក្សា និង អនុម័ត ផងដែរលើសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងរវាងរាជរដ្ឋាភិបាលនៃ ព្រះរាជាណាចក្រកម្ពុជា និង រដ្ឋាភិបាលនៃរដ្ឋកាតា ស្តីពីការគ្រប់គ្រងការប្រើប្រាស់ហត្ថពលកម្មនៅ រដ្ឋកាតា ។
មន្រ្តីក្រសួងការងារ និង បណ្តុះបណ្តាលវិជ្ជាជីវ: និង មន្រ្តីសមាគមភ្នាក់ងារជ្រើសរើសពលករកម្ពុជា ពុំអាចទំនាក់ទំនងសុំអត្ថាធិប្បាយណាមួយបានទេ កាលពីថ្ងៃចន្ទទី ៧ ខែសីហា ម្សិលមិញនេះ ។
គួររំឭកថា កាលខែឧសភា ឆ្នាំ ២០១១ ឯកឧត្តម វង សូត រដ្ឋមន្រ្តីក្រសួងការងារ និង បណ្តុះបណ្តាលវិជ្ជាជីវ: បានដឹកនាំគណ:ប្រតិភូទៅទស្សនកិច្ចនៅក្នុងប្រទេសកាតា ដោយក្នុង អំឡុងពេលនោះ ក៏បានចុះហត្ថលេខាលើអនុសារណ:ជាមួយនឹងរដ្ឋមន្រ្តីក្រសួងការងារកាតា ។ ក្នុងអនុសារណ:នោះ ក៏បានចែងថា ប្រទេសកាតាយល់ព្រមទទួលយកពលករស្របច្បាប់ពីប្រទេស កម្ពុជា ផ្តល់ការធានារ៉ាប់រងសុខភាព និង ការការពារដោយច្បាប់ការងារប្រទេសកាតា ។
រាជរដ្ឋាភិបាលកម្ពុជា ធ្លាប់បានប៉ាន់ប្រមាណថា ក្នុងមួយឆ្នាំៗ ពលករ-ពលការិនីកម្ពុជា ដែលធ្វើការនៅបរទេសអាចផ្ញើប្រាក់ជាមធ្យមប្រហែល ១៨០ លានដុល្លាអាមេរិក មកក្រុមគ្រួសារ និង សាច់ញាតិរបស់ពួកគេក្នុងប្រទេសកម្ពុជា