ភ្នំពេញ: ក្នុងនាមជាប្រធានអាស៊ាន នៅឆ្នាំ២០១២ ព្រះរាជាណាចក្រកម្ពុជា បានរៀបចំប្រារព្ធពិធីខួបលើកទី៤៥ នៃថ្ងៃបង្កើតអាស៊ាន ( Asean Day ) នៅព្រឹកថ្ងៃទី៨ ខែសីហា ឆ្នាំ២០១២ នៅទីស្តីការក្រសួងការបរទេស។ លោកប្រមុខការទូតកម្ពុជា ហោ ណាំហុង បានប្រកាសថា កម្ពុជាជឿជាក់ថា អាស៊ាននឹងបន្តឈានទៅមុខទៀត ជាមួយនឹងស្មារតីឯកភាពនិងសាមគ្គីភាព។
ក្នុងពិធីប្រារព្ធទិវាអាស៊ាន ខួបលើកទី៤៥ នៃការបង្កើតអាស៊ាន នាព្រឹកនេះ មានវត្តមានរបស់ឯកអគ្គរាជទូត ឯកអគ្គរដ្ឋទូត ប្រទេសជាមិត្តរបស់កម្ពុជា ពិសេសក៏មានវត្តមានរបស់ឯកអគ្គរដ្ឋទូតហ្វីលីពីន និងវៀតណាម ដែលបានអង្គុយជាប់គ្នា។ ហ្វីលីពីន និងវៀតណាម ជាប្រទេសដែលមានជម្លោះខ្លាំងក្លាជាមួយនឹងប្រទេសចិន ក្នុងជម្លោះដែនសមុទ្រចិនខាងត្បូង។ ហ្វីលីពីន ក្នុងពេលចុងក្រោយនេះ ក៏ហាក់ដូចជាមានសង្គ្រាមប៉ាកកាជាមួយនឹងកម្ពុជា តាមរយៈការឆ្លងឆ្លើយ និងកោះហៅឯកអគ្គរាជទូតកម្ពុជាចូលបំភ្លឺក្នុងជម្លោះសមុទ្រចិនខាងត្បូង ដែលជាបញ្ហាក្តៅគគុក ក្នុងកិច្ចប្រជុំរដ្ឋមន្ត្រីការបរទេសអាស៊ាន នៅរាជធានីភ្នំពេញ កាលពីដើមខែកក្កដា។
មុននឹងបង្ហូតទង់អាស៊ាន ក្នុងពិធីនៅព្រឹកមិញ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា បានថ្លែងសុន្ទរកថា ខ្លីថា "ចាប់តាំងពីបានកកើតឡើងកាលពី ៤៥ឆ្នាំកន្លងទៅ អាស៊ានបានទទួលជោគជ័យដ៏ត្រចះត្រង់។ ក្នុងឋានៈជាអង្គការតំបន់ អាស៊ានបានឆ្លងកាត់ដំណាក់កាលដ៏លំបាក និងបញ្ហាប្រឈមជាច្រើន។ ក្នុងការឆ្លើយតបទៅរាល់បញ្ហានីមួយៗ អាស៊ានតែងតែបោះជំហានឈានទៅមុខជានិច្ច ជាមួយស្មារតីសម្រុះសម្រួល។ ដោយមានព្រឹត្តិការណ៍សំខាន់ៗជាច្រើន និងមូលដ្ឋានសាមគ្គីភាពដ៏រឹងមាំ ក្នុងប្រវត្តិ ៤៥ឆ្នាំនេះ ខ្ញុំយល់ថា អាស៊ាននឹងមានជោគជ័យ ហើយអាចជម្នះបាននូវរាល់ស្ថានការណ៍អាក្រក់ទាំងឡាយ"។
លោក ហោ ណាំហុង បានលើកឡើងថា ក្នុងពេលដូចគ្នានេះ កាលពីឆ្នាំទៅ ការបង្ហូតទង់អាស៊ាន ត្រូវបានប្រារព្ធធ្វើឡើងនៅគ្រប់រដ្ឋធានី នៃរដ្ឋជាសមាជិកអាស៊ាន និងនៅតាមស្ថានទូតអាស៊ានទូទាំងពិភពលោក។ ពេលនេះ យើងអាចមើលឃើញទង់អាស៊ាន បក់រវិចគួរជាទីមោទនៈ នៅទន្ទឹមនឹងទង់ជាតិរបស់រដ្ឋសមាជិកអាស៊ាន។ នេះគឺជាសក្ខីភាពនៃការបោះជំហានទៅមុខដ៏ធំមួយទៀត ឆ្ពោះទៅកាន់សហគមន៍អាស៊ាន ក៏ដូចជាការលើកកម្ពស់មុខមាត់អាស៊ានផងដែរ បើទោះបីជាមានបញ្ហាកើតឡើងដោយមិនបាននឹកស្មានដល់។
ជាមួយនឹងការលើកឡើងដូច្នេះ លោក ហោ ណាំហុង បានបន្ថែមថា "ទោះជាដូចនេះក្ដី កម្ពុជាជឿជាក់ថា អាស៊ាននឹងបន្តឈានទៅមុខទៀត ជាមួយនឹងស្មារតីឯកភាព និងសាមគ្គីភាព ដោយដកទុកមួយឡែកសិននូវរាល់បញ្ហាទាំងឡាយ ដែលយើងពុំអាចសម្រេចបាននូវមតិឯកភាពរួម (Consensus) ស្របទៅតាមស្មារតី និងទម្លាប់អនុវត្តន៍របស់អាស៊ាន។ ធ្វើដូចនេះ យើងនឹងអាចរក្សាបាននូវតួនាទីស្នូលរបស់អាស៊ាន នៅចំពោះមុខដំណើរការវិវត្តនៃនិមាបនកម្មតំបន់ នាពេលបច្ចុប្បន្ន"។
ជាទីបញ្ចប់ លោក ហោ ណាំហុង មានជំនឿយ៉ាងមុតមាំថា អាស៊ាននឹងបន្តដើរលើមាគ៌ាត្រឹមត្រូវឆ្ពោះទៅសម្រេចសហគមន៍អាស៊ាន នៅឆ្នាំ២០១៥ តាមទិសដៅជា “សហគមន៍តែមួយ ជោគវាសនាតែមួយ” ដែលមានភាពស្អិតល្មួតផ្នែកនយោបាយ មានសមាហរណកម្មសេដ្ឋកិច្ច និងរួបរួមគ្នាក្នុងសង្គមដែលយល់សុខទុក្ខគ្នា។
សេចក្តីជូនព័ត៌មាន ចុះថ្ងៃទី៧ ខែសីហា ឆ្នាំ២០១២ បង្ហាញថា លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ធ្វើជាអធិបតី ក្នុងពិធីបង្ហូតទង់អាស៊ាន នៅព្រឹកថ្ងៃទី៨ ខែសីហា ឆ្នាំ២០១២ នៅក្រសួងការបរទេស និងសហប្រតិបត្តិការអន្តរជាតិ។ ចំណែកសម្តេចនាយករដ្ឋមន្ត្រី ហ៊ុន សែន និងលោកជំទាវ នឹងធ្វើជាអធិបតីក្នុងពិធីជប់លៀងពេលល្ងាច នៅសាលបុរីកោះពេជ្រ ដោយមានការចូលរួមពីលោក សុរិន្ទ ពិតសុវណ្ណ អគ្គលេខាធិការអាស៊ាន និងលោកជំទាវ។
សេចក្តីជូនព័ត៌មានដដែល បានលើកឡើងថា ក្នុងអំឡុងពេលពិធីជប់លៀងនោះ លោក សុរិន្ទ ពិតសុវណ្ណ អគ្គលេខាធិការអាស៊ាន នឹងឡើងថ្លែងចំណាប់អារម្មណ៍ ហើយសម្តេចតេជោ ហ៊ុនសែន នឹងថ្លែងសង្កថា ព្រមទាំងចុះហត្ថលេខាលើផ្ទាំងបាឋកថាអាស៊ាន ( Asean Lecture Poster )៕ S