ខេត្តកំពង់ធំ: សម្តេចនាយករដ្ឋមន្ត្រី ហ៊ុន សែន បានប្រកាសអំពាវនាវឲ្យប្រជាជនកម្ពុជា ពិសេសអ្នករស់នៅតាមដងទន្លេ ត្រូវបង្កើនការប្រុងប្រយ័ត្ន ចំពោះគ្រោះទឹកជំនន់ ដែលអាចនឹងកើតឡើងជាថ្មី នៅឆ្នាំនេះ។
ក្នុងពិធីសម្ពោធកំណាត់ផ្លូវជាតិលេខ ៦២ ពីខេត្តកំពង់ធំ ទៅកាន់ក្រុងព្រះវិហារ នាព្រឹកថ្ងៃទី៨ ខែសីហា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "ខ្ញុំព្រះករុណខ្ញុំសូមយកឱកាសនេះ អំពាវនាវ ត្រូវប្រុងប្រយ័ត្ននូវគ្រោះធម្មជាតិ ដែលអាចកើតឡើងជាយថាហេតុ។ ករណីខ្យល់ព្យុះ និងករណីទឹកជំនន់។ ទឹកបានចាប់ផ្តើមហក់ឡើង កាលពីប៉ុន្មានថ្ងៃមុន។ ឥឡូវនៅស្ទឹងត្រែង ក្រចេះ ចាប់ស្រក់ តែនៅភ្នំពេញបន្តឡើងបន្តិច។ ប៉ុន្តែយ៉ាងណាក៏ដោយ ដែលហៅថា ឆ្នាំរោង ទឹកមិនដែលចេះតូចទេ គឺទឹកធំ"។
នៅលើទឹកដីខេត្តកំពង់ធំ ដែលទទួលរងគ្រោះធ្ងន់ធ្ងរជាងគេ ក្នុងគ្រោះទឹកជំនន់កាលពីឆ្នាំទៅ សម្តេចនាយករដ្ឋមន្ត្រី ហ៊ុន សែន ក៏បានបន្ថែមថា "ឆ្នាំទៅទឹកធំ ហើយអ្នកដែលគ្រោះថ្នាក់ជាងគេ គឺអ្នកកំពង់ធំតែម្តង។ មូលហេតុ មកពីកំពង់ធំ ក្នុងរងគ្រោះពីរដងផ្ទួនៗគ្នា ព្យុះកេតសាណា នៅឆ្នាំ២០០៩ និងទឹកជំនន់ ២០១១ ហើយម្យ៉ាងទៀត ទឹកឡើងពីទន្លេសាប និងទន្លេមេគង្គ មកទល់គ្នា តាមផ្លូវជាតិលេខ ៦។ តែយើងបានដាក់បទបញ្ជានៅពេលនោះ គឺមិនឲ្យមានប្រជាជនណាម្នាក់ ស្លាប់ដោយអត់បាយទេ ទោះជាអ្នករងគ្រោះរាប់លាននាក់ក៏ដោយ"។
សម្តេចនាយករដ្ឋមន្ត្រី ហ៊ុនសែន ក៏បានប្រកាសពីការសម្រេច ផ្អាកការសាងសង់ផ្លូវមួយចំនួន នៅតាមតំបន់ ដែលព្យាករថា នឹងមានទឹកជំនន់ជាថ្មី នៅតាមដងទន្លេមេគង្គ ក្នុងរយៈពេលប៉ុន្មានអាទិត្យខាងមុខ ឬក៏មួយខែ ទៅមួយខែកន្លះខាងមុខនេះ។ ការសម្រេចផ្អាកការដ្ឋាននោះ ដើម្បីកុំឲ្យខាតបង់ថវិកា ជួសជុល សាងសង់ផ្លូវ ដោយសារតែទឹកជំនន់ជាថ្មី។ ក៏ប៉ុន្តែបើមិនមានទឹកជំនន់ទេ រដ្ឋាភិបាលនឹងជំនួយការសាងសង់នោះ ឲ្យបានលឿនជាងមុន។
ជាមួយនឹងប្រសាសន៍ដូច្នេះ សម្តេចប្រមុខរាជរដ្ឋាភិបាល ហ៊ុន សែន ក៏បានលើកឡើងថា "នៅតាមដងទន្លេមេគង្គ ដងទន្លេសាប និងតំបន់មួយចំនួន ដែលធ្លាប់មានជំនន់ ត្រូវតែមានការប្រុងប្រៀប តំបន់ទីទួលសុវត្ថិភាពឲ្យបានម៉ត់ចត់។ អ្នកកំពង់ធំនេះ ទីទួលសុវត្ថិមានមួយចំនួន ហើយមួយចំនួនទៀត គាត់នៅរាយប៉ាយ។ បទពិសោធន៍ឆ្នាំ២០១១ បានបន្សល់ទុកឲ្យយើង នូវការរៀបចំបែបណា? រាប់ទាំងយើងមានការប្រជុំរវាងរាជរដ្ឋាភិបាល និងអង្គការក្រៅរដ្ឋាភិបាល ហើយមានវិដេអូឡាញ គ្រប់ខេត្តក្រុងទាំងអស់។ គណៈកម្មការគ្រប់គ្រងគ្រោះមហន្តរាយ ក៏បានផ្សព្វផ្សាយពីគោលការណ៍នេះ តាមខេត្តក្រុងស្រុកខណ្ឌ និងតំបន់គោលដៅ រួចហើយដែរ។ ត្រូវតែមានការប្រុងប្រយ័ត្ន។ ការពារប្រសើរជាងការព្យាបាល"។
សម្តេចហ៊ុនសែន បានគូសបញ្ជាក់ថា "អីចឹងទេ យើងការពារទុកជាមុន។ ព្យាករទុកជាមុន ហើយសូមស្នើឲ្យវិទ្យុទូរទស្សន៍ទាំងអស់ រាប់ទាំងវិទ្យុរបស់គណបក្សប្រឆាំង មេត្តាជួយផ្សព្វផ្សាយអំពីអាកាសធាតុ ដែលវាជាការចាំបាច់ណាស់ ដើម្បីឲ្យប្រជាជន ទទួលបានព័ត៌មានពីអាកាសធាតុនេះ។ ការផ្សាយនេះ ឲ្យបានញឹកញាប់បន្តិច ជាការល្អ។ វិទ្យុជួយផ្តល់ព័ត៌មាន ជួយដល់អ្នកធ្វើដំណើរតាមរថយន្ត និងប្រជាកសិករ។ នេះជាប្រយោជន៍ទាំងអស់គ្នា មិនគិតថា ខាងណា ឬខាងណាទេ"៕