កំពង់ធំ: សម្តេចហ៊ុន សែន បានចាត់ទុកការសាងសង់ផ្លូវជាតិលេខ៦២ ពីកំពង់ធំ ទៅព្រះវិហារនឹងជួយលើកកម្ពស់ជីវភាពប្រជាជននៅតំបន់ភាគខាងជើងនៃប្រទេសកម្ពុជា ហើយវាក៏នឹងមានតម្លៃសម្រាប់ការដឹកជញ្ជូនជាលក្ខណៈតំបន់ផងដែរ។
នៅពេលសម្ពោធឲ្យប្រើប្រាស់ផ្លូវដែលមានប្រវែង១២៨ គីឡូម៉ែត្រ ដែលត្រូវសាងសង់ឡើងដោយជំនួយចិននោះ សម្តេចបានមានប្រសាសន៍ថា ការសាងសង់ឡើងវិញផ្លូវជាតិលេខ៦២ នេះ ជួយលើកកម្ពស់ជីវភាពរស់នៅរបស់ប្រជាពលរដ្ឋនៅតំបន់ខាងជើងរបស់កម្ពុជា ដែលមានសក្ដានុពលខាងកសិ-ឧស្សាហកម្ម ទេសចរណ៍ធម្មជាតិ និងធនធានរ៉ែ ព្រមទាំងបានជួយជំរុញការរៀបចំនិងប្រែក្លាយតំបន់នេះឲ្យទៅជាតំបន់អភិវិឌ្ឍន៍ និងជាតំបន់យុទ្ធសាស្ត្រសម្រាប់កសាងមូលដ្ឋានកំណើនសេដ្ឋកិច្ចបន្ថែមទៀត។
ផ្លូវជាតិលេខ៦២នេះក៏នឹងជួយជំរុញល្បឿននៃការអភិវឌ្ឍសេដ្ឋកិច្ចនិងសង្គមកម្ពុជា តាមរយៈការជួយសម្រួលចរាចរណ៍ដឹកជញ្ជូន ការធ្វើពាណិជ្ជកម្ម ការផ្លាស់ប្តូរ ផលិតផលកសិកម្ម ឧស្សាហកម្ម ការពង្រឹងកិច្ចសហប្រតិបត្តិការជាមួយប្រទេសថៃដែលនៅជិតខាង និងប្រទេសតំបន់និងការអភិវឌ្ឍតំបន់ត្រីកោណមរកតកម្ពុជា-ឡាវ-ថៃ៘
ផ្លូវនេះអាចនឹងដើរតួនាទីជាផ្លូវនៃច្រករបៀងកើត-លិច នៃមហាអនុតំបន់មេគង្គផងដែរ។
ផ្លូវនេះក៏បានជួយភ្ជាប់ចរាចរណ៍ពីផ្លូវជាតិលេខ៦ កាត់ឆ្ពោះទៅព្រំដែនកម្ពុជា-ថៃ នៅតាមបណ្តោយព្រំដែនខេត្តឧត្តរមានជ័យ ព្រះវិហារ ដោយចម្ងាយផ្លូវខ្លីជាងមុន។
ផ្លូវជាតិនេះ ក៏រួមចំណែកលើកកម្ពស់ការតភ្ជាប់ប្រទេសអាស៊ានផងដែរ ដោយសារផ្លូវនេះនឹងក្លាយជាបណ្តាញតភ្ជាប់ទៅនឹងផ្លូវជាតិលេខ៧ ដែលជាផ្លូវអាស៊ានហាយវ៉េលេខ១១ ដែលជានាគសេដ្ឋកិច្ចរបស់កម្ពុជា ហើយអាចនឹងភ្ជាប់ទៅនឹងផ្លូវជាតិលេខ៧៦ លេខ៧៨ ក៏ដូចជាការតភ្ជាប់ទំនាក់ទំនងរវាងបងប្អូនប្រជាពលរដ្ឋក្នុងភាគខ្ពង់រាបខាងជើង ជាមួយបងប្អូនប្រជាពលរដ្ឋនៅក្នុងខេត្តនៃភូមិភាគឦសាន ហើយក៏អាចតភ្ជាប់ចរាចរណ៍ដឹកជញ្ជូនផលិតផលពីតំបន់ខ្ពង់រាបខាងជើង ទៅកាន់កំពង់ផែសមុទ្រអន្តរជាតិនៅខេត្តព្រះសីហនុ ឬកំពង់ផែភ្នំពេញផងដែរ។ ផ្លូវជាតិលេខ៦២ នឹងបង្កភាពងាយស្រួលក្នុងការភ្ជាប់ពីខេត្តមណ្ឌលគិរី ទៅកាន់ប្រាសាទព្រះវិហារនិងខេត្តសៀមរាប ដោយអ្នកទេសចរអាចធ្វើដំណើរពីភ្នំពេញអាចទៅកម្សាន្ដនៅខេត្តមណ្ឌលគិរី រួចបន្តទៅរតនគិរីនិងបន្តកាត់ទៅខេត្តក្រចេះ និងខេត្តស្ទឹងត្រែង ឆ្ពោះទៅកាន់ខេត្តព្រះវិហារ និងសៀមរាប ដោយមិនបាច់បកក្រោយមកកាន់ផ្លូវជាតិលេខ៧ ហើយឡើងមកផ្លូវជាតិលេខ៦វិញទៀតឡើយ។
បណ្តាញប្រទាក់ក្រឡានៃផ្លូវជាតិទាំងនេះ បានបង្ហាញឲ្យឃើញយ៉ាងច្បាស់អំពីការធ្វើសមាហរណកម្មផ្ទៃក្នុងរបស់កម្ពុជា និងការធ្វើសមាហរណកម្មជាមួយប្រទេសជិតខាង៕
