វគ្គហ្វឹកហ្វឺនជំនាញទ័ពព្រៃជំនាន់ទី៥ឆ្នាំ២០១២
នៅខេត្តសៀមរាប
ឯកឧត្តម ឧត្តមសេនីយទោ ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ បានអញ្ជើញជាអធិបតីប្រកាស បើកវគ្គហ្វឹកហ្វឺនជំនាញទ័ពព្រៃ ដល់នាយទាហាន នាយទាហានរង និងពលទា ហាន ប្រមាណ៥០០រូប នៃអង្គភាពយោធភូមិភាគទី៤ដោយមានការចូលរួមជា កិត្តិយសពីសំណាក់ ឯ.ឧបណ្ឌិត ស៊ូ ភិរិន្ទ ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្រ្តីនៃ ព្រះរាជា ណាចក្រកម្ពុជា និងជាអភិបាលនៃគណៈអភិបាលខេត្ត សៀមរាប នៅឯសាលាពលទាហានទី៤ មិត្តភាពកម្ពុជា-វៀតណាម ក្នុងស្រុក បន្ទាយស្រី ខេត្តសៀមរាប ដើម្បីពង្រឹងសមត្ថភាពយុទ្ធវិធីកងទ័ពក្នុងការការពារ បូរណភាពទឹកដី ក៏ដូចជាការការពារសេចក្តីសុខជូនប្រជាពលរដ្ឋផងដែរ ។
ថ្លែងក្នុងពិធីបើកវគ្គហ្វឹកហ្វឺននេះ ឯកឧត្តមឧត្តមសេនីយទោ ពៅ ហេង មេបញ្ជាការរងនៃយោធភូមិភាគទី៤ បានឲ្យដឹងថា វគ្គនេះមានរយៈពេល៩០ថ្ងៃ គិតចាប់ពីថ្ងៃទី៤ ខែ សីហា ដល់ថ្ងៃទី១ខែវិច្ឆិកា ឆ្នាំ២០១២ ក្នុងគោលបំណងបំពេញបន្ថែមចំណេះដឹង ចំពោះនាយទាហាន នាយទាហានរង និង ពលទាហាន ឲ្យកាន់តែយល់ច្បាស់អំពីច្បាប់វិន័យសណ្តាប់ធ្នាប់ របបកំណត់របស់កងយោធពលខេមរភូមិន្ទ ចេះប្រើប្រាស់លាយផ្សំរំសេវ សារធាតុផ្សេងៗ ចេះកែច្នៃអាវុធជាតិផ្ទុះ ចេះប្រើប្រាស់ផែនទីភូមិសាស្ត្រ និងសម្ភារៈបរិក្ខារសឹកមួយចំនួនទៀត ។
ឯកឧត្តមឧត្តមសេនីយទោ ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ បានមានប្រសាសន៍ទៅកាន់អង្គភាពហ្វឹកហ្វឺនជំនាញទ័ពព្រៃថា ការពង្រឹងសមត្ថភាពរបស់កងយោធពលខេមរភូមិន្ទ គឺជារឿងដែលមានសារៈសំខាន់ខ្លាំងណាស់ ក្នុងការការពារបូរណភាពទឹកដី ពីការឈ្លានពានរបស់សត្រូវ ក្នុងខណៈពេលដែលពីអតីតកាលទឹកដីខ្មែរមួយចំនួនត្រូវបានបាត់បង់ ជាពិសេស ក្រោមការដឹកនាំប្រកបដោយគតិបណ្ឌិតដ៏ឈ្លាសវៃ និង ប៉ិនប្រសប់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការការពារបូរណភាពទឹកដី ពីការឈ្លានពានពីប្រទេសជិតខាង នារយៈកាលកន្លងទៅថ្មីៗនេះ ។
ឯកឧត្តមឧត្តមសេនីយទោ ហ៊ុន ម៉ាណែត បានអះអាងទៀតថា បើទោះបីមិនមានបញ្ហាប្រឈមរវាងកងទ័ពនិងកងទ័ព ជាមួយប្រទេសជិតខាងក៏ដោយ ក៏ការពង្រឹងសមត្ថភាពរបស់កងកម្លាំងកងយោធពលខេមរភូមិន្ទ គឺជាបញ្ហាដែល មិន ត្រូវខកខាននោះឡើយ ព្រោះថា ប្រសិនបើទាំងកម្លាំងកងទ័ព និងកម្លាំងសមត្ថកិច្ចប្រដាប់អាវុធផ្សេងៗទៀត មានចំណេះដឹងអំពីយុទ្ធវិធីបានច្បាស់លាស់ហើយនោះ វាជាការងាយស្រួលក្នុងការការពារសន្តិសុខជូនប្រជាពលរដ្ឋរបស់យើងផងដែរ ។
សូមបញ្ជាក់ថា ខ្លឹមសារនៃវគ្គហ្វឹកហ្វឺននេះ មានសណ្តាប់ធ្នាប់និងច្បាប់ , បច្ចេកទេសថ្មើរជើង , យុទ្ធវិធីទ័ពព្រៃ និង អប់រំចិត្តសាស្ត្រ ដែលមានការចូលរួមពីនាយទាហាន នាយទាហានរង និង ពលទាហាន មកពីកងពលតូចថ្មើរជើងលេខ៤១ចំនួន ២១៨នាក់ ,កងពលតូចថ្មើរជើងលេខ៤២ចំនួន១០៨នាក់ ,តំបន់ប្រតិបត្តិការសឹករងខេត្តសៀមរាប ចំនួន៩២នាក់ និង តំបន់ប្រតិបត្តិការសឹករងខេត្តព្រះវិហារចំនួន៦២នាក់ ។