ភ្នំពេញ ៖ លោកស្រី ម៉ែន សំអន ឧបនាយករដ្ឋមន្ត្រីប្រចាំការ និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានថ្លែងនូវការសាទរចំពោះវេទិកាពិភាក្សាផ្លាស់ប្ដូរយោបល់ រវាងពាណិជ្ជកររាជធានីភ្នំពេញ និងពាណិជ្ជករទីក្រុងហូជីមិញ នៅសណ្ឋាគារណាហ្គាវើល រាជធានីភ្នំពេញថ្ងៃទី០៤ខែតុលាឆ្នាំ២០១២ ដែលមានការចូលរួមពីពាណិជ្ជករទាំងពីរទីក្រុងប្រមាណជាង ៦០០នាក់។នៅក្នុងនោះដែរលោកស្រីឧបនាយករដ្ឋមន្ត្រីក៏បានជំរុញឱ្យពាណិជ្ជកររាជធានីភ្នំពេញ និង ពាណិជ្ជករទីក្រុងហូជីមិញវៀតណាមត្រូវបង្កើន ទំនាក់ទំនងបន្ថែមឱ្យខ្លាំងក្លាថែមទៀត ទាំងវិស័យ ពាណិជ្ជកម្ម ទាំងវិសយ័ ទេសចរណ៍ និងឧស្សាហកម្ម នៅកម្ពុជា នាថ្ងៃអានាគត ។
លោកស្រី ម៉ែន សំអន បានបញ្ជាក់ថា ក្នុងនាមរាជរដ្ឋាភិបាលកម្ពុជាសូមសម្តែងនូវការស្វាគមន៍ក្នុងវេទិកាដ៏មានតម្លៃនេះ ពីព្រោះវាស្របពេលដែលប្រទេសទាំងពីរ កំពុងចូលរួមអបអរសាទរខួបអនុស្សាវរីយ៍លើកទី៤៥ នៃទំនាក់ ទំនងការទូតរវាងកម្ពុជាវៀតណាមនិងបានជ្រើសរើសយកឆ្នាំ២០១២នេះ ជាឆ្នាំមិត្តភាពរបស់ប្រទេសទាំងពីរ ។ ការរីកចម្រើនគួរឲ្យកត់សម្គាល់ក្នុងវិស័យពាណិជ្ជកម្ម ក៏ដូចជាកិច្ចសហប្រតិបត្តិការទ្វេភាគីរវាងប្រទេសទាំងពីរគូសបញ្ជាក់យ៉ាងច្បាស់ អំពីការដឹកនាំដ៏ត្រឹមត្រូវរបស់រាជរដ្ឋាភិបាល ដែលមានសម្ដេចតេជោហ៊ុន សែន ជានាយករដ្ឋមន្ត្រី បាននាំមកនូវសុខសន្តិភាព និងអភិវឌ្ឍន៍គ្រប់វិស័យ ពិសេសរាជធានីភ្នំពេញ ។
លោកស្រីឧបនាយករដ្ឋមន្ត្រីបន្ដថា ជាក់ស្ដែងក្នុងរយៈពេល៦ខែដើមឆ្នាំ២០១២នេះ តួលេខពាណិជ្ជកម្មរវាងប្រទេសទាំងពីរ មានទឹកប្រាក់ប្រមាណ ជាង១.៩០០ លានដុល្លារអាមេរិក ក្នុងនោះសម្រាប់រាជធានីភ្នំពេញ ទំនិញនាំចូលពីវៀតណាម មានតម្លៃប្រមាណ ៧២៨ លានដុល្លារអាមេរិក និងទំនិញ នាំចេញទៅប្រទេសវៀតណាម ដែលមានតម្លៃប្រមាណ ៧៩លានដុល្លារ អាមេរិក ។ ម្យ៉ាងវិញទៀត ចំនួនអ្នកទេសចរវៀតណាម មកទស្សនាកម្ពុជា ដែលបច្ចុប្បន្នស្ថិតនៅលំដាប់លេខ១ ហើយទន្ទឹមនឹងនេះក៏មានប្រជាជនកម្ពុជា រាប់សែននាក់ ធ្វើដំណើរទៅប្រទេសវៀតណាម ដើម្បីកម្សាន្ត និងធ្វើធុរកិច្ច ពិនិត្យសុខភាព និងព្យា បាលជំងឺ នៅទីក្រុងហូជីមិញ ។ សមិទ្ធផលនេះបានស្ដែងចេញឱ្យឃើញ អំពីការរឹតចំណង សាមគ្គីភាព មិត្ដភាព និងកិច្ចសហប្រតិបត្ដិការ យ៉ាងល្អប្រសើររវាង ព្រះរាជាណាចក្រ កម្ពុជា នឹងប្រទេសវៀតណាម ។
ក្នុងឱកាសនោះដែរ លោក កែប ជុតិមា អភិបាលរាជធានីភ្នំពេញបានបញ្ជាក់ថា រាជធានីភ្នំពេញនិងទីក្រុងហូជីមិញ ក៍បានក្លាយជាទីក្រុងចងសម្ព័ន្ធមេត្រីភាព ជាច្រើនសតវត្សរ៍មកហើយ តាមរយៈចំណងមិត្ដភាព និងកិច្ចសហប្រតិបត្ដិការរវាងទីក្រុងយើងទាំងពីរ ។ កិច្ចសហប្រតិបត្ដិការនេះមានការរីកចម្រើនគួរឱ្យកត់សម្គាល់ ជាពិសេសកិច្ចសហប្រតិបត្ដិការលើវិស័យសេដ្ឋកិច្ច ទេសចរណ៍ ពាណិជ្ជកម្ម ដឹកជញ្ជូន សុខាភិបាល ជាដើម ។ ជាការពិត ការរីកចម្រើនលូតលាស់លើគ្រប់វិស័យនៃប្រទេសកម្ពុជា សម្រាប់រាជធានីភ្នំពេញគឺបានមកពីការជួយឧបត្ថម្ភគាំទ្រពីសំណាក់រដ្ឋាភិបាល និងប្រជាជននៃសាធារណរដ្ឋសង្គមនិយមវៀតណាម ពិសេសការឧបត្ថម្ភដោយផ្ទាល់ ពីគណៈកម្មាធិការប្រជាជនទីក្រុងហូជីមិញផងដែរ ៕
.jpg)
.jpg)