ភ្នំពេញ: ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សារបស់សាកលវិទ្យាល័យ ធនធានមនុស្ស កាលពីព្រឹកថ្ងៃទី៤ ខែតុលា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានប្រដូចថា គណបក្សប្រឆាំងនៅកម្ពុជា ខុសពីគណបក្សប្រឆាំងរបស់លោកស្រី អ៊ុងសាន ស៊ូជី នៅក្នុងប្រទេសភូមា។ នោះគឺគណបក្សប្រឆាំងនៅកម្ពុជា បានត្រឹមតែដើរឃោសនាឲ្យគេផ្តាច់ជំនួយប៉ុណ្ណោះ។
សម្តេចនាយករដ្ឋមន្ត្រី ហ៊ុន សែន បានលើកឡើងថា "គណបក្សប្រឆាំងបានទារយកចំណែកចូលរួមលើការរីកចំរើននៅកម្ពុជាដែរ។ តែគណបក្សប្រឆាំងបានធ្វើអី? ក្រៅតែពីដើរ ជួយផ្តាច់ជំនួយ។ ឥឡូវកំពុងទៅប្រាប់អូបាម៉ា កុំមកប្រជុំ ( ប្រជុំអាស៊ីបូព៌ា នៅខែវិច្ឆិកា នៅភ្នំពេញ )។ មើលអីចឹងៗ! សូមឲ្យកាត់ជំនួយ! សូមឲ្យបង្កកជំនួយ! សូមកុំមកវិនិយោគស្រុកខ្មែរ!។ ក្រៅពីដើរធ្វើអីចឹង តើបានធ្វើអី ក្រៅពីនឹងទៀត?។ ខុសពីអ៊ុងសាន ស៊ូជី ណា៎! ខុសពីអ៊ុងសាន ស៊ូជី ឆ្ងាយណាស់! ប្រៀបគេមិនបានទេ។ គេត្រូវការប្រជាជនភូមា ប្រជាជនមីយ៉ាន់ម៉ា។ ប៉ុន្តែឯងនេះ គឺរឿងមួយទៅផ្សេង"៕
