ភ្នំពេញ: មន្ត្រីនៃគណបក្សសង្គ្រោះជាតិ បានមានប្រសាសន៍ថា លោក សម រង្ស៊ី ប្រធានគណបក្សសង្គ្រោះជាតិ គឺជាបេក្ខជនយ៉ាងសំខាន់ នៅក្នុងបញ្ជីបេក្ខជនសម្រាប់ការប្រកួតប្រជែង នៅក្នុងការបោះឆ្នោតជ្រើសតាំងសមាជិកសភា នៅអាណត្តិទី៥ ឆ្នាំ២០១៣ ខាងមុខនេះ។
លោក ប៉ុល ហំម អនុប្រធានគណៈកម្មការបណ្តោះអាសន្ន នៃគណបក្សសង្គ្រោះជាតិ បានលើកឡើងថា "ករណីលោកសមរង្ស៊ី ជាករណីនយោបាយ ដូច្នេះគណបក្សប្រជាជនកម្ពុជា ត្រូវតែពិភាក្សាជាមួយនឹងគណបក្សសង្គ្រោះជាតិ ដោះស្រាយបញ្ហានេះ តាមផ្លូវនយោបាយ អនុញ្ញាតឲ្យលោកសមរង្ស៊ី វិលមកចូលរួមប្រកួតប្រជែង នៅក្នុងការបោះឆ្នោតឆ្នាំ២០១៣ បានដោយសេរី"។
លោក ប៉ុល ហំម បានមានប្រសាសន៍បញ្ជាក់បន្តថា បើបញ្ហាលោកសមរង្ស៊ី ជាករណីព្រហ្មទណ្ឌនោះ ច្បាស់ជា គេតាមចាប់យកមកវិញដូចករណី ហេង ពៅ ហើយ។ តែនេះ ជាករណីនយោបាយ សូម្បីតែលោក ស៊ូយ៉ា ស៊ូប៊ែឌី អ្នករាយការណ៍ពិសេសខាងសិទ្ធិមនុស្សអង្គការសហប្រជាជាតិ នៅកម្ពុជានោះ ក៏បានចាត់ទុកការកាត់ទោសលោកសមរង្ស៊ី ថាជាបញ្ហានយោបាយដែរ ហើយលោកបានអំពាវនាវដល់រាជរដ្ឋាភិបាលកម្ពុជា អនុញ្ញាតឲ្យលោកសមរង្ស៊ីវិលចូលប្រទេសវិញ ដើម្បីចូលរួមការបោះឆ្នោតដោយស្មើភាព និងយុត្តិធម៌។
លោក ប៉ុល ហំម បានបញ្ជាក់យ៉ាងនេះថា "បើគ្មានការអនុញ្ញាតឲ្យលោក សម រង្ស៊ី បានចូលរួមបោះឆ្នោតទេនោះ សម្តេចនាយករដ្ឋមន្ត្រី ហ៊ុន សែន បានឡើងលើសង្វៀន ប្រកួតតែម្នាក់ឯង ជាមួយនឹងអាជ្ញាកណ្តាលនោះ គឺការប្រកួតនោះ អត់មានន័យទេ ពីព្រោះនៅក្នុងការបោះឆ្នោត ឆ្នាំ២០១៣នោះ មានតែគណបក្សប្រជាជនកម្ពុជា និងគណបក្សសង្គ្រោះជាតិទេ ដែលជាដៃគូប្រកួតជាមួយគ្នា"។
លោក ប៉ុល ហំម បានបន្តថា៖ នៅពេលសមាជគណបក្សខាងមុខ មុនឆ្នាំ២០១៣នោះ នឹងមានការរៀបចំបញ្ជីបេក្ខភាពសម្រាប់ឈរឈ្មោះបោះឆ្នោតនៅឆ្នាំ២០១៣ ដែលជាមន្ត្រីមកពីគណបក្ស សម រង្ស៊ី និងគណបក្សសិទ្ធិមនុស្ស និងបោះឆ្នោតជ្រើសតាំងលោកសមរង្ស៊ី ជាប្រធានគណបក្ស ហើយលោក កឹម សុខា ជាអនុប្រធានគណបក្សពីព្រោះគណបក្សទាំងពីរនេះ មិនដាក់បេក្ខភាពឈរឈ្មោះបោះឆ្នោតសមាជិកសភាឆ្នាំ២០១៣ ឡើយ។
លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានមានប្រសាសន៍ថា ករណីលោក សម រង្ស៊ី គឺជាបទល្មើសព្រហ្មទណ្ឌ មិនមែនជាករណីនយោបាយទេ។
លោក ទិត សុធា បានបន្តថា "គ្មាននរណាហាមឃាត់លោក សម រង្ស៊ី មិនឲ្យគាត់វិលចូលប្រទេសទេ ប៉ុន្តែនៅពេលមកទ្វារគុក បើករង់ចាំគាត់ ដែលជាការអនុវត្តទោសតាមការសម្រេចដោយឯករាជ្យ ពីសំណាក់តុលាការជាមុនសិន"។
ចំណែកលោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត ក៏បានមានប្រសាសន៍បញ្ជាក់ថា ករណី លោក សម រង្ស៊ី ដែលមានឈ្មោះជាទណ្ឌិត គឺមិនអនុញ្ញាតឲ្យឈរឈ្មោះ ធ្វើជាបេក្ខភាពនៅក្នុងការបោះឆ្នោតឆ្នាំ២០១៣ទេ សូម្បីតែសិទ្ធិបោះឆ្នោត ក៏គ្មានដែរ។
ថ្មីៗនេះ លោក កែវ រ៉េមី រដ្ឋលេខាធិការទីស្តីការគណៈរដ្ឋមន្ត្រី បានបញ្ជាក់ថា ករណី លោក សម រង្ស៊ី គឺជាការប្រព្រឹត្តល្មើសច្បាប់ ដែលតុលាការត្រូវតែផ្តន្ទាទោស មិនមែនជាករណីនយោបាយទេ ហើយគណបក្សប្រជាជនកម្ពុជាក៏គ្មានគោលការណ៍ សម្របសម្រួល នយោបាយ ជាមួយគណបក្សប្រឆាំង ដើម្បីបើកច្រកឲ្យលោក សម រង្ស៊ី វិលចូលស្រុកវិញ ដោយគ្មានការអនុវត្តទោស តាមដីការតុលាការនោះឡើយ។
សូមបញ្ជាក់ថា លោក សម រង្ស៊ី ត្រូវបានតុលាការកំពូលតម្កល់សាលដីកា របស់សាលាដំបូងខេត្តស្វាយរៀង ទុកជាបានការ ដែលផ្តន្ទាទោសលោកសមរង្ស៊ី កំបាំងមុខ ដាក់ពន្ធគាររយៈពេល ២ឆ្នាំ និងបង្គាប់ឲ្យបង់ប្រាក់ពិន័យជាង ៦០លានរៀល ពីបទបំផ្លាញតម្រុយបង្គោលព្រំដែនគោក នៅស្រុកចន្ទ្រា ខេត្តស្វាយរៀង និងបំផុសឲ្យមានការរើសអើង ជាតិសាសន៍ កាលពីឆ្នាំ២០០៩ ព្រមទាំងជាប់បណ្តឹងបទព្រហ្មទណ្ឌ មួយចំនួនទៀត នៅតុលាការក្រុងភ្នំពេញ៕ S