ភ្នំពេញ: គណៈកម្មាធិការជាតិរៀបចំការបោះឆ្នោត គ.ជ.ប. បានសម្រេចបន្ថែមរយៈពេលពិនិត្យបញ្ជីឈ្មោះ និងចុះឈ្មោះបោះឆ្នោតចំនួន ១ ថ្ងៃ គឺនៅថ្ងៃទី១៣ ខែតុលា ឆ្នាំ២០១២ សម្រាប់ឃុំសង្កាត់ ចំនួន ៣៨៣ ឃុំសង្កាត់ ក្នុងខេត្ត ចំនួន ៩។ នេះបើតាមសេចក្តីប្រកាសរបស់ គ.ជ.ប.។
សេចក្តីប្រកាស បង្ហាញថា ខេត្ត ដែលមានឃុំសង្កាត់ ត្រូវបន្ថែមរយៈពេលចុះឈ្មោះបោះឆ្នោតនោះ រួមមាន៖ ខេត្តបន្ទាយមានជ័យ កំពង់ស្ពឺ កំពង់ធំ កណ្តាល ព្រះវិហារ ពោធិ៍សាត់ សៀមរាប ប៉ៃលិន និងឧត្តរមានជ័យ។
សេចក្តីប្រកាសរបស់ គ.ជ.ប. បានស្រង់ប្រសាសន៍របស់លោក ទេព នីថា អគ្គលេខាធិការ គ.ជ.ប. មកចុះផ្សាយថា ការសម្រេចបន្ថែមរយៈពេលនេះ ធ្វើឡើងតាមសំណើរបស់ក្រុមប្រឹក្សាឃុំសង្កាត់ និងស្មៀន និងតាមស្ថានភាពជាក់ស្តែង ដែលឃុំសង្កាត់ខ្លះ ត្រូវជន់លិចដោយជំនន់ទឹកភ្លៀង ជាពិសេសស្ថានភាពកម្មកររោងចក្រ ត្រូវទៅចុះឈ្មោះបោះឆ្នោត នៅថ្ងៃទី១២ ខែតុលា មានចំនួនច្រើន ដែលស្មៀនមិនអាចមានពេលគ្រប់គ្រាន់ ក្នុងការចុះឈ្មោះបោះឆ្នោត ត្រឹមថ្ងៃទី១២ ខែតុលាបាន។ ហេតុនេះ ទើប គ.ជ.ប. សម្រេចបន្ថែមរយៈពេលចុះឈ្មោះបោះឆ្នោត ១ ថ្ងៃទៀត។
សូមរម្លឹកថា ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ធ្វើឡើង ចាប់ពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២ នៅតាមសាលាឃុំសង្កាត់ ទូទាំងប្រទេស ដែលមានចំនួន ១.៦៣៣ ឃុំសង្កាត់។ បញ្ជីឈ្មោះបោះឆ្នោត ប្រចាំឆ្នាំ២០១២ នេះ ដើម្បីប្រើប្រាស់ សម្រាប់ការបោះឆ្នោតជាតិ នៅថ្ងៃទី២៨ ខែកក្កដា ឆ្នាំ២០១៣៕
