ភ្នំពេញ: សម្តេចនាយករដ្ឋមន្ត្រី ហ៊ុនសែន បានប្រកាសថា ទោះបីជាមានរឿងអ្វីក៏ដោយ នៅឆ្នាំនេះ ព្រះរាជពិធីបុណ្យអុំទូក នឹងត្រូវតែធ្វើ គឺមិនលុបចោលដូចកាលពីឆ្នាំទៅឡើយ។
ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សារបស់សាកលវិទ្យាល័យ ធនធានមនុស្ស កាលពីព្រឹកថ្ងៃទី៤ ខែតុលា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "ឆ្នាំនេះ យ៉ាងណាក៏ដោយធ្វើពិធីបុណ្យអុំទូកដែរ...។ ឆ្នាំមុន ដោយសារទឹកធំ ដែលឡើងតាំងពីខែប្រាំបួន ហើយដល់ខែដប់មួយហើយ មិនព្រមចុះទៅវិញ យើងលុបចោលបុណ្យអុំទូក។ តែឥឡូវ គឺប្រធានគណៈកម្មការបុណ្យជាតិ និងអន្តរជាតិ សម្តេចចៅហ្វាវាំង គង់ សំអុល បានសរសេរសួរថា តើបុណ្យអុំទូក ឬអត់? ព្រោះឆ្នាំទៅ អត់អុំម្តងហើយ ព្រោះទឹកធំពេក ហើយប្រជាពលរដ្ឋ ក៏ទទួលរងគ្រោះ។ ខ្ញុំចារត្រឡប់ទៅវិញថា រៀបចំអុំ ដូចរៀងរាល់ឆ្នាំ។ អីចឹងត្រៀមទៅ ច្បាស់ជាអុំហើយ..."។
តាមប្រតិទិន ព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប នៅទន្លេចតុមុខ មុខព្រះបរមរាជវាំង ឆ្នាំនេះ នឹងធ្វើឡើង ចំថ្ងៃទី២៧, ២៨ និងថ្ងៃទី២៩ ខែវិច្ឆិកា ឆ្នាំ២០១២។
ពាក់ព័ន្ធនឹងទឹកជំនន់វិញ ត្រូវបានសម្តេចនាយករដ្ឋមន្ត្រី ហ៊ុនសែន លើកឡើងថា ការបង្កបង្កើនផលឆ្នាំនេះ ជាទូទៅ គឺល្អ។ ស្រូវល្អ កំពុងអោនដាក់គ្រាប់ហើយ។
យ៉ាងណាក៏ដោយ សម្តេចនាយករដ្ឋមន្ត្រីហ៊ុនសែន បានអំពាវនាវឲ្យពលរដ្ឋ បង្កើនការប្រុងប្រយ័ត្ននឹងគ្រោះទឹកជំនន់ ដោយសារតែទឹកភ្លៀង ហើយព្យុះផ្គរក៏នៅតែបន្តកើតមាន ពិសេសលើការព្យាករណ៍ពីខ្យល់កន្ត្រាក់ ដែលនឹងជះឥទ្ធិពលលើប្រទេសកម្ពុជា នៅថ្ងៃទី៥ ខែតុលា ឆ្នាំ២០១២។ ម្យ៉ាងទៀត ស្ថានភាពទឹកក៏មិនទាន់ចប់សព្វគ្រប់ទេ។ ភ្លៀងនៅបន្តធ្លាក់ ដែលតំបន់មួយចំនួន នឹងបង្កជាជំនន់ទឹកភ្លៀង។
ជាការកត់សម្គាល់ ពិធីបុណ្យអុំទូកឆ្នាំមុន ត្រូវបានរដ្ឋាភិបាលលុបចោល ដោយសារតែទឹកឡើងធំ លិចលង់ទូទាំងប្រទេស។ ម្យ៉ាងទៀត ក្នុងពិធីបុណ្យអុំទូក កាលពីឆ្នាំ២០១០ នៅយប់ថ្ងៃបង្ហើយ ថ្ងៃទី៣ នៅកោះពេជ្រ ក្នុងរាជធានីភ្នំពេញ កើតមានឧបទ្ទវហេតុ លើស្ពានពេជ្រ បណ្តាលឲ្យពលរដ្ឋក្មេងចាស់ស្លាប់ចំនួន ៣៥៣ នាក់៕
