ភ្នំពេញ: រដ្ឋមន្ត្រីក្រសួងការពារជាតិ លោកឧបនាយករដ្ឋមន្ត្រី ទៀ បាញ់ បានអះអាងថា កងយោធពលខេមរភូមិ បានប្រកាន់ជំហរឯករាជ្យ មិនរំលោភកិច្ចបោះឆ្នោត នៅក្នុងយុទ្ធនាការបោះឆ្នោត និងការបោះឆ្នោតជ្រើសតាំងសមាជិកសភា អាណត្តិទី៥ នៅឆ្នាំ២០១៣ ឡើយ។ កងទ័ព គឺគោរពទៅតាមច្បាប់បោះឆ្នោត និងច្បាប់ ស្តីពី គណបក្សនយោបាយ។
លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសាសន៍ប្រាប់ក្រុមអ្នករាយការណ៍ព័ត៌មាន កាលពីព្រឹកថ្ងៃទី៤ ខែតុលា ឆ្នាំ២០១២ នៅសណ្ឋាគារកាំបូឌីយ៉ាណា ថា "កងយោធពលខេមរភូមិន្ទ បានគោរពតាមច្បាប់បោះឆ្នោត និងច្បាប់គណបក្សនយោបាយ ជាពិសេសកងយោធពលខេមរភូមិន្ទ គឺជាកំលាំងអព្យាក្រិត្យ តែងតែបំពេញតួនាទីរបស់ខ្លួន តាមភារកិច្ច ធ្វើម៉េចរក្សាការពារសុវត្ថិភាព នៅក្នុងរង្វង់ច្បាប់ មិនឲ្យជ្រៀតជ្រែក ឬមួយនាំឲ្យមានការភិតភ័យដល់អ្នកបោះឆ្នោត ឬមួយបេក្ខជនឈរឈ្មោះបោះឆ្នោត ជាដើម គឺអត់មានជាដាច់ខាត"។
លោកឧបនាយករដ្ឋមន្ត្រី ទៀ បាញ់ បានមានប្រសាសន៍បន្តថា ច្បាប់បានចែងយ៉ាងច្បាស់លាស់ថា កំលាំងយោធា និងកំលាំងដទៃទៀត ត្រូវធានាការពារសុវត្ថិភាព នៅក្នុងការបោះឆ្នោតជ្រើសតាំងសមាជិកសភា នៅឆ្នាំ២០១៣ ខាងមុខ។
លោកឧបនាយករដ្ឋមន្ត្រី ទៀ បាញ់ បានច្រានចោល ចំពោះការចោទប្រកាន់ពីសំណាក់លោក ស៊ូយ៉ា ស៊ូប៊ែឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ដែលបានសរសេរចោទប្រកាន់ នៅក្នុងរបាយការណ៍របស់ខ្លួនថា កងខេមរភូមិន្ទមិនឯករាជ្យលំអៀងទៅគណបក្សប្រជាជនកម្ពុជា ដែលកំពុងដឹកនាំប្រទេសសព្វថ្ងៃនេះ។
លោកឧបនាយករដ្ឋមន្ត្រី ទៀ បាញ់ បានបញ្ជាក់យ៉ាងនេះថា "ចំពោះបញ្ហានេះ គាត់ចេះតែនិយាយទៅ តែច្បាប់ គេមានចែងច្បាស់លាស់ បើសិនជាឃើញមានភស្តុតាងជាក់លាក់ យើងនឹងរីករាយ តែសុំឲ្យគេមានវិធានការជាក់លាក់មក តែការពិតយើង ពុំមានធ្វើអីដូចគាត់និយាយទេ។ យើងបានគោរពច្បាប់ច្បាស់លាស់ នៅក្នុងជួរកងយោធពលខេមរភូមិ។ មានពេលខ្លះ គេនិយាយខុស តែយើងបានធ្វើយ៉ាងល្អប្រសើរ"។
ទោះជាយ៉ាងណាក៏ដោយ ក្នុងជួរកងទ័ពសព្វថ្ងៃ ត្រូវបានមហាជនមើលឃើញថា ស្ថិតនៅក្រោមរដ្ឋាភិបាល ដែលដឹកនាំដោយគណបក្សប្រជាជនកម្ពុជា៕
