ភ្នំពេញ: សម្តេចនាយករដ្ឋមន្ត្រី ហ៊ុន សែន បានប្រកាសថា បន្ទាប់ពីបញ្ចប់នូវនយោបាយវាស់វែងដីធ្លី ដល់ពលរដ្ឋ ដែលធ្វើឡើងដោយក្រុមយុវជនស្ម័គ្រចិត្ត នោះរដ្ឋាភិបាល នឹងបន្តនយោបាយថ្មី ក្នុងការបង្កើនល្បឿន ផ្តល់ដីសម្បទានសង្គមកិច្ចដល់ប្រជាពលរដ្ឋវិញម្តង។
ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សានៅសាកលវិទ្យាល័យ ធនធានមនុស្ស សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "បន្ទាប់ពីការចុះវាស់វែងដីធ្លីលើកនេះរួចហើយ ដំណើរ... ជំរុញល្បឿននៃការផ្តល់ដីសម្បទានសង្គមកិច្ច ព្រោះឥឡូវប្រជាពលរដ្ឋរបស់យើង ដីខាងផ្នែកតានតឹងច្រើន... ផ្នែកខាងក្រោមនេះ ខ្វះដីធ្លីហើយ។ អីចឹងកម្មវិធីផ្តល់ដីសម្បទានសង្គមកិច្ច ជូនប្រជាពលរដ្ឋនេះ គឺសំខាន់ណាស់ ដើម្បីធានាថា ២០ ទៅ ៣០ ឆ្នាំទៀត គាត់នៅតែមានដី អត់ខ្វះដី។ អីចឹងយើង ចាប់ផ្តើមដោះ រុញ បង្កើនល្បឿននូវការដោះស្រាយបញ្ហានេះ បន្តទៅទៀត ហើយត្រូវផ្តល់ក្របខណ្ឌឲ្យក្រសួងរៀបចំដែនដី"។
សម្តេចហ៊ុនសែន ក៏បានប្រកាសពីការយល់ព្រមតាមសំណើរបស់លោកទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានស្នើសុំបន្ថែមបុគ្គលិកចំនួន ៦០០ នាក់ បញ្ចូលក្នុងក្របខណ្ឌក្រសួង ដើម្បីរៀបចំធ្វើការងារ ផ្តល់ដីធ្លីដល់ប្រជាពលរដ្ឋ។ សម្តេចបានប្រកាសថា អ្នកទាំងនោះ ក៏នឹងត្រូវជ្រើសយកចេញពីក្រុមយុវនិស្សិត ដែលកំពុងអនុវត្តការងារវាស់វែងដីធ្លីនាពេលនេះផងដែរ៕
