ភ្នំពេញ: មន្ត្រីអ្នកនាំពាក្យក្រសួងការបរទេសកម្ពុជា បានមានប្រសាសន៍ប្រាប់ក្រុមអ្នករាយការណ៍ព័ត៌មានថា នៅក្នុងជំនួបពិភាក្សាការងារ ជាមួយលោក M Christian CON NAN ឯកអគ្គរដ្ឋទូតបារាំងប្រចាំនៅកម្ពុជា ដែលចប់អាណត្តិ និងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស នៃប្រទេសកម្ពុជានោះ គឺភាគីទាំងពីរមិនបានលើកអំពីបញ្ហាលោក ម៉ម សូណង់ដូ ឡើយ គឺពិភាក្សាគ្នាលើកិច្ចសហប្រតិបត្តិការ រវាងប្រទេសទាំងពីរប៉ុណ្ណោះ។
លោក កុយ គួង បានបញ្ជាក់បន្តថា នៅក្នុងជំនួបនោះ ភាគីបារាំងមិនបានលើកឡើងបញ្ហាលោក ម៉ម សូណង់ដូ ទេ ហើយលោកឯកអគ្គរដ្ឋទូតយល់ថា ជារឿងរបស់កម្ពុជា។
អ្នកនាំពាក្យក្រសួងការបរទេស បានមានប្រសាសន៍បែបនេះ បន្ទាប់ពីលោកឧបនាយករដ្ឋមន្ត្រី ហោ ណាំហុង បានអនុញ្ញាតឲ្យលោក M Christian CON NAN ឯកអគ្គរដ្ឋទូតបារាំងប្រចាំនៅកម្ពុជា ដែលចប់អាណត្តិបេសកកម្ម ចូលសម្តែងការគួរសម និងជម្រាបលា នៅព្រឹកថ្ងៃទី៥ ខែតុលា ឆ្នាំ២០១២ នៅទីស្តីការក្រសួងការបរទេស។
សូមបញ្ជាក់ថា លោក ម៉ម សូណង់ដូ ប្រធានសមាគមអ្នកប្រជាធិបតេយ្យ ជាអ្នកសារព័ត៌មាន និងជានាយកវិទ្យុសំបុកឃ្មុំ កាលពីថ្ងៃទី២ ខែតុលា ឆ្នាំ២០១២ ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគាររយៈពេល ២០ឆ្នាំ ពីបទបង្កើតតំបន់អបគមន៍នៅខេត្តក្រចេះ។
សេចក្តីថ្លែងការណ៍ធ្វើនៅទីក្រុងប៉ារីស ថ្ងៃទី១ ខែតុលា ឆ្នាំ២០១២ ដែលត្រូវបានស្ថានទូតបារាំងប្រចាំកម្ពុជា ផ្សព្វផ្សាយដល់អ្នកកាសែត នៅថ្ងៃទី២ ខែតុលា ឆ្នាំ២០១២ បង្ហាញយ៉ាងខ្លីថា "ប្រទេសបារាំងសោកស្តាយ ចំពោះការកាត់ទោសនេះ។ ប្រទេសបារាំង អំពាវនាវឱ្យអាជ្ញាធរកម្ពុជា ធានាថា នីតិវិធី បណ្តឹងឧទ្ធណ៍ នឹងអនុញ្ញាតឱ្យមានការត្រួតពិនិត្យរឿងក្តីនេះឡើងវិញឆាប់ៗ ប្រកបដោយយុត្តិធម៌ និងសមធម៌"៕
