ឯកឧត្ដម ចម ប្រសិទ្ធ ទេសរដ្ឋមន្ដ្រី រដ្ឋមន្ដ្រីក្រសួងពាណិជ្ជកម្ម បានទទួលជួប ប្រតិភូផ្នែកអភិវឌ្ឍន៍ ពាណិជ្ជកម្ម និង ធនធានមនុស្ស នៃអង្គការកម្មវិធីអភិវឌ្ឍន៍ អង្គការសហប្រជាជាតិUNDP ប្រចាំទីក្រុង ហ្សឺណែវ ប្រទេសស្វីស ដឹកនាំដោយលោក David Luke ជាទីប្រឹក្សាជាន់ខ្ពស់។លោក David Luke បានលើកឡើង ពីកិច្ចសហប្រតិបត្ដិការដ៏ល្អ ជាមួយកម្ពុជា ទាក់ទងសកម្មភាព អភិវឌ្ឍន៍នានា។ ក្នុងនោះ វិស័យពាណិជ្ជកម្ម អង្គការ UNDP បានធ្វើកិច្ចការយ៉ាងសកម្ម ជាមួយស្ថាប័នពាក់ព័ន្ធថ្នាក់ជាតិ របស់កម្ពុជា ដើម្បីរៀបចំ នូវផែនទីបង្ហាញផ្លូវ សម្រាប់ពង្រឹង និងលើកកំពស់គោលនយោបាយ ពាណិជ្ជកម្ម ប្រសិទ្ធិភាព នៃយន្ដការស្ថាប័ន និងភាពជាម្ចាស់ដែលគាំទ្រដោយកម្មវិធី លើកកំពស់ក្របខណ្ឌ សមាហរណកម្ម (EIF) និងកម្មវិធីជំនួយ សម្រាប់ពាណិជ្ជកម្ម (Aid for Trade)។
លោក David Luke បានផ្ដល់អនុសាសន៍នូវចំនុច ៣ យ៉ាង ដែលវិស័យពាណិជ្ជកម្ម បានដើរតួនាទី ជាសំខាន់ គឺ ទី១ របៀបវីរៈនៃការ កាត់បន្ថយភាពក្រីក្រ ទី២ ការធ្វើសមាហរណកម្ម ក្នុងតំបន់ និង ទី៣ ឧត្ដមភាពប្រកួតប្រជែង។ មានប្រសាសន៍នា ឱកាសនោះ ឯកឧត្ដម ទេសរដ្ឋមន្ដ្រី ចមប្រសិទ្ធ បានថ្លែងអំណរគុណ ចំពោះកិច្ចសហការដ៏ល្អរបស់ អង្គការ UNDP ក្នុងកសកម្មភាព អភិវឌ្ឍន៍ជាច្រើន នៅកម្ពុជា។ ឯកឧត្ដម បានបន្ថែមថា វិស័យពាណិជ្ជកម្ម ត្រូវបានចាត់បញ្ចូលជាវិស័យអាទិភាព របស់រាជរដ្ឋាភិបាល ដែលបានដើរតួយ៉ាងសំខាន់ ក្នុងការរួមចំណែក ដល់ការកាត់ បន្ថយភាពក្រីក្រ របស់ប្រជាពលរដ្ឋ។ បច្ចុប្បន្នកម្ពុជា កំពុងធ្វើសេចក្ដី ពង្រាងទិសដៅ សកម្មភាពដើម្បីកសាង យុទ្ធសាស្ដ្រ សមាហរណកម្មវិភាគ ពាណិជ្ជកម្មថ្មី ពីឆ្នាំ ២០១៣-២០១៨ក្នុងគោលដៅអភិវឌ្ឍន៍ផលិតផល ដែលមានសក្ដានុពល សម្រាប់នាំចេញនិងវិស័យជាអាទិភាពមួយចំនួន ដូចជាវិស័យ ទេសចរណ៍ជាដើម។ ទាក់ទង និងការធ្វើសមាហរណកម្ម ក្នុងតំបន់ ឯកឧត្ដមទេសរដ្ឋមន្ដ្រី បានលើកឡើង ពីការយកចិត្ដ ទុកដាក់ និងត្រៀមលក្ខណៈសម្បត្ដិ របស់កម្ពុជាសម្រាប់ឆ្នាំ២០១៥ ខាងមុខ ដែលអាស៊ាន នឹងបង្កើតបានសហគមន៍ សេដ្ឋកិច្ចមួយ។ កត្ដានេះត្រូវមាន កិច្ចប្រឹងប្រែងរួម ដូចជាកិច្ចសហប្រតិបត្ដិការ សម្របសម្រួលផ្ទៃក្នុង អភិវឌ្ឍន៍ស្ថាប័ន យន្ដការពង្រឹងវិស័យ ឯកជនក៏ដូចជាការទទួលបាន នូវជំនួយបច្ចេកទេស និងអភិវឌ្ឍន៍ ។ ទាក់ទង និងឧត្ដមភាពប្រកួតប្រជែងឯកឧត្ដមទេសរដ្ឋមន្ដ្រី ចម ប្រសិទ្ធ បានលើកឡើង ពីសារៈសំខាន់ការធ្វើពិពិធកម្ម នាំចេញពិពិធកម្មសេដ្ឋកិច្ច និងតម្លៃបន្ថែម ។
ដោយឡែកនៅព្រឹកថ្ងៃដដែល ឯកឧត្ដមទេសរដ្ឋមន្ដ្រី ចម ប្រសិទ្ធ បានទទួលជួបលោកស្រីElena Tischenko ប្រធានអង្គការ UNDP ប្រចាំកម្ពុជា ដើម្បីពិភាក្សាការងារទាក់ទងនិងកិច្ចសហប្រតិបត្ដិការ រវាងកម្ពុជា និង UNDP ស្ដីពីផែន ការសកម្មភាពពីឆ្នាំ ២០១១-២០១៥ទៅលើកម្មវិធីការពង្រីក ពិធកម្មកម្ម នាំចេញរបស់កម្ពុជា ជំហ៊ានទី២ ដែលហៅកាត់ថា CEDEP IIដោយផ្ដោតជាសំខាន់ លើដំណាំដំឡូងមី ។
មានប្រសាសន៍នា ឱកាសនោះ ឯកឧត្ដមទេសរដ្ឋមន្ដ្រី ចម ប្រសិទ្ធ បានបញ្ជាក់ថា ដំណាំដំឡូងមីជាដំណាំ ដែលមាន ទីផ្សារលក់ច្រើន នៅក្រៅប្រទេស ដូចជា ចិន ថៃ វៀតណាម ជាដើម ។ ការដាំដុះបានច្រើន របស់ប្រជាពលរដ្ឋ ជាការសាទរមួយ តែយើងក៏ត្រូវជួយពួកគាត់ ថែមទៀត ដូចជាបញ្ហាទីផ្សារ បច្ចេកទេសដាំដុះ ការថែទាំ ការប្រមូលផល និងប្រភេទជីដែលត្រូវ ប្រើប្រាស់ជាដើមជាពិសេសត្រូវសិក្សា ស្រាវជ្រាវថា តើតំបន់ណា? រឺផ្ទៃដីប្រភេទណា? គួរលើកទឹកចិត្ដឱ្យ ប្រជាពលរដ្ឋធ្វើការ ដាំដុះ ដើម្បីធានាជីវភាព អចិន្ដ្រៃយ៍របស់ពួកគាត់ ពីព្រោះថាដំណាំដំឡូងមី ត្រូវការជីជាច្រើន ដើម្បីបានទិន្នផលខ្ពស់។ ជាចុងក្រោយ ឯកឧត្តម ទេសរដ្ឋមន្ដ្រី ចម ប្រសិទ្ធបានស្នើឱ្យអង្គការ UNDP បន្ដជំនួយបច្ចេកទេស និងអភិវឌ្ឍន៍ នៅកម្ពុជា បន្ដទៀត ។