ភ្នំពេញ: រាជរដ្ឋាភិបាលកម្ពុជា បានសម្រេចចាត់តាំងមន្ត្រីជាន់ខ្ពស់មា្នក់ នៅក្រសួងការបរទេស ឲ្យទៅចូលរួមការបោះឆ្នោតជ្រើសតាំងបេក្ខភាពកម្ពុជា ជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអ ង្គការសហប្រជាជាតិ ដែលនឹងប្រព្រឹត្តទៅ នៅថ្ងៃទី១៨ ខែតុលា ឆ្នាំ២០១២ ខាងមុខនេះ ខណៈដែលប្រទេសកម្ពុជា បានដាក់បេក្ខភាពចូលរួមប្រកួតប្រជែងនោះដែរ។
ទាក់ទងទៅនឹងការបោះឆ្នោតនៅអង្គការសហប្រជាជាតិ នៅថ្ងៃទី១៨ ខែតុលា ឆ្នាំ២០១២ ដែលជាការបោះឆ្នោតជ្រើសរើសកម្ពុជា ជាសមាជិកក្រុមប្រឹក្សាសន្តិសុខ អង្គការសហប្រជាតិ ក្នុងឋានៈជាសមាជិកមិនអចិន្ត្រៃនោះ លោក កុយ គួង អ្នកនាំពាក្យក្រសួងការបរទេស បានបញ្ជាក់ថា អ្នកដែលបោះឆ្នោត គឺប្រទេសតំណាងអចិន្ត្រៃយ៍នៅអង្គការសហប្រជាជាតិ ដែលមាន ១៩៣ ប្រទេស។ យើងមិនអាចសង្ឃឹម ដោយបញ្ជាក់ពីតួលេខឲ្យបានច្បាស់នោះទេ គ្រាន់តែថា យើងមានសេចក្តីសង្ឃឹម ហើយអ្វី ដែលជាក់ស្តែង គឺលទ្ធផល នៅថ្ងៃទី១៨ ខែតុលា ឆ្នាំ២០១២ នឹងដឹងថា កម្ពុជាទទួលបានសំឡេងគាំទ្រប៉ុន្មាន ពីសមាជិកអង្គការសហប្រជាជាតិទាំងអស់។
លោក កុយ គួង បានបញ្ជាក់ថា ចំពោះនីតិវិធី ដែលតាមលោកដឹង គឺប្រទេសនីមួយៗត្រូវតែទទួលបានសំឡេងគាំទ្រ ២ ភាគ ៣ ទើបជាប់ជាសមាជិក មិនអចិន្ត្រៃយ៍ នៅក្រុមប្រឹក្សាសន្តិសុខ អង្គការសហប្រជាជាតិ ក្នុងចំណោមប្រទេស ១៩៣ សំឡេង។
លោក កុយ គួង បានមានប្រសាសន៍បញ្ជាក់ថា នៅក្នុងតំបន់អាស៊ីនេះ មានបីប្រទេស ដែលដាក់បេក្ខភាព គឺប្រទេសកម្ពុជា សាធារណរដ្ឋកូរ៉េ ( កូរ៉េខាងត្បូង ) និងប្រទេសប៊ូតាន។ តាមដំណឹង គេយកពីរប្រទេស ក្នុងចំណោមបេក្ខភាព ទាំងបីប្រទេសនេះ។
នេះជាលើកទី១ ដែលកម្ពុជា បានដាក់បេក្ខភាព សម្រាប់តំណែងសមាជិកមិនអចិន្ត្រៃយ៍ នៃក្រុមប្រឹក្សាសន្តិសុខ អង្គការសបហ្រជាជាតិ ពីព្រោះតាំងពីឆ្នាំ១៩៥៥ មក កម្ពុជាមិនដែលបានទទួលតំណែង នៅក្នុសាខា ឬអង្គការណាមួយនោះទេ។
លោកបានបន្តថា ក្នុងចំណោមមហាអំណាចទាំង ៥ ប្រទេស គឺមានប្រសទេសចិន បានសម្តែងជំហរច្បាស់ថា នឹងគាំទ្រប្រទេសកម្ពុជា ក្នុងតំណែងនេះ។ ចំណែកប្រទេសមហាអំណាចផ្សេងទៀត គេមានគោលការណ៍របស់គេ ដោយគេសុំមិនបញ្ចេញទស្សនៈជាចំហរ ហើយជាការបោះឆ្នោតសម្ងាត់។
លោក កុយ គួង បានមានប្រសាសន៍បញ្ជាក់ថា កម្ពុជាបានបញ្ជូនលោក អ៊ុច បូររិទ្ធ រដ្ឋលេខាធិការក្រសួងការបរទេស ទៅចូលរួមតាមដាន នៅក្នុងការបោះឆ្នោតថ្ងៃទី១៨ ខែតុលា ឆ្នាំ២០១២ នៅអង្គការសហប្រជាជាតិ។ នៅពេលជាប់ជាសមាជិកមិនអចិន្ត្រៃយ៍ នៅក្រុមប្រឹក្សាសន្តិសុខ អង្គការសហប្រជាជាតិ គឺថ្នាក់ដឹកនាំរាជរដ្ឋាភិបាល ក៏ដូចជា ប្រមុខការទូតកម្ពុជា ធ្លាប់បានបញ្ជាក់ហើយថា សំខាន់ គឺកម្ពុជា ចង់ចែករំលែកបទពិសោធន៍ ដែលធ្លាប់ឆ្លងកាត់កន្លងមក ជាពិសេសនយោបាយឈ្នះឈ្នះ របស់រាជរដ្ឋាភិបាលកម្ពុជា ក្នុងការបញ្ចប់សង្គ្រាមរ៉ាំរ៉ៃ និងរកសន្តិភាពពេញលេញជូនប្រទេសជាតិ ជាពិសេសនៅឆ្នាំ១៩៩៨ ដែលបានទទួលសន្តិភាពពេញលេញ ហើយទី២ទៀត កម្ពុជានឹងរួមចំណែកអំពីការគ្រប់គ្រងប្រទេស ក្រោយពីចប់ជម្លោះ និងបទពិសោធមួយទៀត គឺការរីកចំរើន គឺការអភិវឌ្ឍន៍ប្រទេសជាតិ បានឆាប់រហ័ស ក្រោយពី ប្រទេសរបស់យើង ទទួលបាននូវសុខសន្តិភាព ១០០ ភាគ ១០០ នោះ៕
