ភ្នំពេញ: ក្រសួងការបរទេស បានប្រកាសនៅថ្ងៃទី៥ ខែតុលា ឆ្នាំ២០១២ថា ក្នុងនាមជាប្រធានអាស៊ាន ព្រះរាជាណាចក្រកម្ពុជា នឹងធ្វើជាម្ចាស់ផ្ទះ នៃកិច្ចប្រជុំកំពូលអាស៊ាន លើកទី២១ និងកិច្ចប្រជុំកំពូលពាក់ព័ន្ធដទៃទៀត ដែលនឹងប្រព្រឹត្តទៅ ពីថ្ងៃទី១៥ ដល់ថ្ងៃទី២០ ខែវិច្ឆិកា ឆ្នាំ២០១២ នៅរាជធានីភ្នំពេញ។
កិច្ចប្រជុំកំពូលអាស៊ាន នៅក្នុងខែវិច្ឆិកា ជាកិច្ចប្រជុំដ៏សំខាន់ ពិសេសកិច្ចប្រជុំមេដឹកនាំកំពូលៗ របស់ប្រទេសអាស៊ានទាំង ១០ ប្រទេស និងមេដឹកនាំកំពូលៗរបស់ប្រទេសដៃគូ ដែលរួមមាន៖ លោកប្រធានាធិបតីអាមេរិក បារ៉ាក់ អូបាម៉ា ប្រធានាធិបតីរុស្ស៊ី លោក វ្ល៉ាឌីមៀ ពូទីន ប្រធានាធិបតីសាធារណៈរដ្ឋកូរ៉េ លោក លី ម្ញុងបាក់ នាយករដ្ឋមន្ត្រី ញូហ្សឺឡេន លោក ចន ហ្វីលីពឃី នាយករដ្ឋមន្ត្រីជប៉ុន លោក យូស៊ីហ៊ីកូ ណូដា នាយករដ្ឋមន្ត្រីឥណ្ឌា លោក ម៉ាន់ម៉ូហាន់ ស៊ីញ នាយករដ្ឋមន្ត្រីចិន លោក វេន ជាប៉ាវ និងនាយករដ្ឋមន្ត្រី អូស្ត្រាលី លោកស្រី ជូលៀ ហ្គីឡាដ ជាដើម។ ក្នុងនោះ គេក៏រំពឹងថា នឹងមានវត្តមានរបស់លោក បាន គីមូន អគ្គលេខាធិការអង្គការសហប្រជាជាតិ ចូលរួមកិច្ចប្រជុំជាមួយនឹងមេដឹកនាំពិភពលោក និងមេដឹកនាំអាស៊ានផងដែរ។
រដ្ឋាភិបាល តាមរយៈក្រសួងព័ត៌មាន បានចាត់តាំងមន្ត្រីរាប់រយនាក់ ដើម្បីរៀបចំផ្នែកមណ្ឌលព័ត៌មាន ឲ្យកាន់តែប្រសើរជាងមុន។ រីឯផ្នែកសន្តិសុខ ក៏ត្រូវបានរដ្ឋាភិបាល ត្រៀមកម្លាំងប៉ូលិស ទាហាន ពិសេសកងអង្គរក្សសម្តេចហ៊ុនសែនរាប់ពាន់នាក់ ដើម្បីបង្កើនការប្រុងប្រយ័ត្ន ពង្រឹងការយាមកាមទាំងយប់ទាំងថ្ងៃ នៅភ្នំពេញ នៅវិមានសន្តិភាព កន្លែងរៀបចំកិច្ចប្រជុំកំពូល និងតាមសណ្ឋាគារធំៗ ដើម្បីទទួលវត្តមានរបស់មេដឹកនាំពិភពលោក សម្រាប់កិច្ចប្រជុំនៅខែក្រោយ នៅភ្នំពេញ៕
