ភ្នំពេញ: លោក ប៉ុក ថន អតីតរដ្ឋលេខាធិការ ក្រសួងអប់រំ និងជាអតីតអ្នកនយោបាយជើងចាស់ម្នាក់របស់ហ៊្វុនស៊ិនប៉ិច ដែលស្វាមីភក្តិ ជាមួយនិងសម្តេចក្រុមព្រះ នរោត្តម រណឫទ្ធិ បានបដិសេធថា លោកមិនបានចូលរួមក្នុងសកម្មភាពនយោបាយរបស់គណបក្សណាមួយទៀតឡើយ នៅពេលនេះ គឺលោកបានឈប់ពីសកម្មភាពនយោបាយ ដោយទុកពេលវេលាបង្រៀនដល់សិស្សនិស្សិតជំនាន់ក្រោយម្តង។
លោក ប៉ុក ថន ក៏បានបដិសេធថា លោកពុំបានចាកចេញពីគណបក្សជាតិនិយម ( អតីតគណបក្សនរោត្តម រណឫទ្ធិ ) ទៅចូលរួមក្នុងសកម្មភាពនយោបាយជាមួយគណបក្សសង្គ្រោះជាតិ ដែលបង្កើតឡើងដោយគណបក្សសមរង្ស៊ី និងគណបក្សសិទ្ធិមនុស្សនោះទេ។
នៅរសៀលថ្ងៃទី៤ ខែតុលា ឆ្នាំ២០១២ លោក ប៉ុក ថន បានថ្លែងតាមទូរស័ព្ទប្រាប់ CEN ថា "ខ្ញុំអទ់មានចូលរួមគណបក្សនយោបាយណាទេ។ ខ្ញុំចាស់ហើយ ខ្ញុំឈប់តាំងពីមុនបោះឆ្នោតក្រុមប្រឹក្សាឃុំ មកម្ល៉េះ ខ្ញុំយកពេលវេលាបង្រៀន ខ្ញុំយកពេលវេលាធ្វើកិច្ចការខ្លះ"។
លោកបន្តថា កន្លងមក មានគណបក្សនយោបាយច្រើនហើយ ដែលបបួលលោកចូលតែលោកមិនបានទៅចួលរួមជាមួយទេ ពីព្រោះកន្លងមក លោកធ្លាប់ចូលរួមជាមួយគណបក្សច្រើនមកហើយ តាំងពីមុនឆ្នាំ១៩៩៣ មកម្ល៉េះ ទើបលោកសម្រេចចិត្ត ឈប់ពីនយោបាយម្តង នៅពេលនេះ។
លោក ប៉ុក ថន បន្តថា ឥឡូវនេះ លោកធ្វើជាសាស្ត្រាចារ្យ នៅសកលវិទ្យាល័យបញ្ញាសាស្ត្រ ហើយលោក មិនចង់លូកឡំកិច្ចការបង្រៀន ជាមួយនឹងកិច្ចការនយោបាយទេ ពីព្រោះការធ្វើនយោបាយ ត្រូវការពេលវេលាគ្រប់គ្រាន់ ធនធានថវិកានិងមានឧត្តមគតិច្បាស់លាស់។
ចំណែកលោក ប៉ុល ហំម អនុប្រធាគណៈកម្មាធិការបណ្តោះអាសន្ន នៃគណបក្សសង្គ្រោះជាតិ បានមានប្រសាសន៍នៅរសៀលថ្ងៃទី៤ ខែតុលានេះថា ពិតជាមានមន្ត្រីនៃគណបក្ស នរោត្តម រណឫទ្ធិ និងហ៊្វុនស៊ិនប៉ិចមួយចំនួន ចូលមកជាមួយគណបក្សសង្គ្រោះជាតិ។ ប៉ុន្តែលោកអះអាងថា មិនបានស្គាល់ឈ្មោះក្រុមមន្ត្រីទាំងនោះទេ សូម្បីតែលោក ប៉ុក ថន ក៏លោក ប៉ុល ហំម មិនបានដឹងទេ។
យោងតាមប្រភពស្និទ្ធនឹងមន្ត្រីជាន់ខ្ពស់គណបក្សសង្រោះជាតិ និងប្រភពស្និទ្ធនឹងមន្ត្រីជាន់ខ្ពស់អតីតគណបក្ស នរោត្តម រណឫទ្ធិ ដែលបានផ្សព្វផ្សាយជាសាធារណៈដល់បណ្ថាញសារព័ត៌មាន នៅរសៀលថ្ងៃទី៤ ខែតុលា ឆ្នាំ២០១២ បានឲ្យដឹងថា មន្ត្រីជាន់ខ្ពស់ថ្នាក់កំពូលរបស់អតីតគណបក្ស នរោត្តម រណឫទ្ធិ ជាច្រើនរូប បានចូលរួមជាមួយគណបក្សសង្គ្រោះជាតិ។
មន្ត្រីទាំងនោះរួមមានៈ លោក ប៉ុក ថន សមាជិកគណៈកម្មាធិការអចិន្ត្រៃយ៍ និងធ្លាប់ជាអនុប្រធានគណបក្ស ពីឆ្នាំ២០០៩ ដល់ឆ្នាំ២០១០ លោក នុត និនដឿន សមាជិកគណៈកម្មាធិការអចិន្ត្រៃយ៍ និងជាអគ្គហិរញ្ញិកគណបក្ស លោក ហ៊ុយ កន្ធុលវរ៉ា សមាជិកគណៈកម្មាធិការអចិន្ត្រៃយ៍ និងជាអគ្គលេខាធិការរងគណបក្ស អ្នកអង្គម្ចាស់ ស៊ីសុវត្ថិ វរៈជាតិ សមាជិកគណៈកម្មាធិការអចិន្ត្រៃយ៍ លោក ច័ន្ទ តារា សមាជិកគណៈកម្មាធិការនាយក ព្រមទាំងសមាជិកអតីតគណបក្ស នរោត្តម រណឫទ្ធិថ្នាក់មូលដ្ឋានជាច្រើននាក់ទៀត។
ដំណឹងនោះ បានផ្សព្វផ្សាយថា នេះជាការចាកចេញពីគណបក្សជាតិនិយម ដែលពីមុនឈ្មោះថា គណបក្សនរោត្តមរណឫទ្ធិ ជាទ្រង់ទ្រាយធំ លើកទី២ បន្ទាប់ពីលោក ម៉ៅ រតនា សមាជិកគណៈកម្មាធិការនាយក និងជាប្រធានក្រុមការងារ អតីតគណបក្ស នរោត្តម រណឫទ្ធិ ខេត្តកំពត និងសមាជិកសកម្មជនប្រមាណ ៥០០នាក់បានចាកចេញពីគណបក្ស ទៅចូលរួមជាមួយគណបក្សសង្គ្រោះជាតិ កាលពីខែសីហាកន្លងមក។
លិខិតដដែលនោះ បានលើកឡើងថា ក្រៅពីមន្ត្រីជាន់ខ្ពស់អតីតគណបក្ស នរោត្តម រណឫទ្ធិ ក៏នៅមានមន្ត្រីជាន់ខ្ពស់គណបក្ស ហ្វ៊ុនស៊ិនប៉ិច គឺលោក ម៉ោញ សាផាន ដែលជាអតីតអ្នកតំណាងរាស្ត្រយូរឆ្នាំ ( អ្នកតំណាងរាស្ត្រ បីអាណត្តិ) ក៏បានចូលរួមជាមួយគណបក្សសង្គ្រោះជាតិផងដែរ។
លិខិតនោះ សរសេរថា ការចាកចេញនេះ បន្ទាប់ពីមន្ត្រីជាន់ខ្ពស់ទាំងនោះ យល់ឃើញថា ការរួមរួមគ្នារបស់ លោក ញឹក ប៊ុនឆៃ និងលោក សៅ រ៉ានី ក្នុងគណបក្ស ហ្វ៊ុនស៊ិនប៉ិច គឺជាអំពើក្បត់ នឹងសម្តេចក្រុមព្រះ នរោត្តម រណឫទ្ធិ ជាអំពើក្បត់នឹងអ្នកតស៊ូ ជាអំពើក្បត់ នឹងអ្នករាជានិយម និងជាការបោកប្រាស់អ្នករាជានិយម ដើម្បីផលប្រយោជន៍ និងលាភសក្ការៈបុណ្យស័ក្កផ្ទាល់ខ្លួន ដោយទៅបំរើគេ និងទៅធ្វើជាអាយ៉ងរបស់គេ។
យ៉ាងណាក៏ដោយ មិនទាន់មានអត្ថាធិប្បាយបែបណាពីលោក ញឹក ប៊ុនឆៃ ប្រធានគណបក្សហ៊្វុនស៊ិនប៉ិច និងលោក សៅ រ៉ានី ប្រធានគណបក្សជាតិនិយម ដែលជាអតីតគណបក្សនរោត្តមរណឫទ្ធិ នៅឡើយទេ ជុំវិញដំណឹងខាងលើនេះ៕
