រាជធានីភ្នំពេញ ៖ កាលពីរសៀលថ្ងៃទី៥ ខែសីហា ឆ្នាំ២០១២ លោកឧកញ៉ា អូស្មាន ហាស្សាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ជាប្រធានអង្គការមូលនិធិអភិវឌ្ឍន៍មូស្លីមកម្ពុជាបានអញ្ជើញជាអធិបតីបិទសិក្ខាសាលាស្តីពី«យុវជនអ៊ិស្លាមឆ្ពោះទៅកាន់សហគមន៍អាស៊ាន» ។ ពិធីនេះបានរៀបចំនៅមជ្ឈមណ្ឌលម៉ូដេន៥ សង្កាត់ប្ញស្សីកែវ ខណ្ឌប្ញស្សីកែវ ដោយមានការអញ្ជើញចូលរួមផងដែរពីសំណាក់អស់លោកខ្លះជាសមាជិករដ្ឋសភា រាជរដ្ឋាភិបាល ជាថ្នាក់ដឹកនាំអ៊ិស្លាម សិស្ស និស្សិត តំណាងអង្គការ សមាគម ក្រុមហ៊ុន ប្រមាណជាង៣០០នាក់ ។
សិក្ខាសាលានេះបានប្រព្រឹត្តទៅរយៈពេល១ថ្ងៃ គឺថ្ងៃទី៥ សីហា ដែលបានរៀបចំដោយអង្គការមូលនិធិអភិវឌ្ឍន៍មូស្លីមកម្ពុជា សហការជាមួយគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា ក្នុងគោលបំណងដាស់តឿនក្រើនរំលឹកដល់យុវជនអ៊ិស្លាមកម្ពុជា ក៏ដូចជាប្រជាពលរដ្ឋទូទៅក្នុងការត្រៀមខ្លួនសម្រាប់ចូលរួមអភិវឌ្ឍន៍ជាមួយរាជរដ្ឋាភិបាល និងអភិវឌ្ឍន៍យុវជនឱ្យមានបុគ្គលលក្ខណៈពេញលេញលើផ្នែករាងកាយ បញ្ញា ចំណេះដឹង ស្មារតី សីលធម៌ តម្លៃ ដើម្បីឱ្យយុវជនក្លាយជាពលរដ្ឋល្អនៅក្នុងសង្គមជាតិ និងសមាហរណកម្មចូលទៅក្នុងសហគមន៍អាស៊ាននាឆ្នាំ២០១៥ខាងមុខនេះ ។អង្គសិក្ខាសាលាមានវាគ្មិនជាច្រើននាក់មកធ្វើបទបង្ហាញពីច្បាប់អាស៊ាន គោលការណ៍ និងសិទ្ធិរបស់អាស៊ាន ព្រមទាំងមានសំណួរចម្លើយដល់សិស្ស និស្សិតផងដែរ ។
លោកឧកញ៉ា សុះ កំរ៉ី ចាងហ្វាងគណៈដឹកនាំជាន់ខ្ពស់អ៊ិស្លាមបានថ្លែងក្នុងឱកាសបើកសិក្ខាសាលាថា រាជរដ្ឋាភិបាលមានចក្ខុវិស័យរយៈពេលវែង ដោយប្រមូលផ្តុំកម្លាំងគ្រប់មជ្ឈដ្ឋានក្នុងសង្គមជាតិសំដៅរួមចំណែកអភិវឌ្ឍន៍យុវជនឱ្យកាន់តែមានលក្ខណៈសម្បត្តិវិជ្ជមាន និងផ្តល់ឱកាសឱ្យពួកគេអភិវឌ្ឍន៍សក្តានុពលនៅក្នុងការអប់រំការងារសុខភាព ការចូលរួមធ្វើសេចក្តីសម្រេច និងការចូលរួមអភិវឌ្ឍគ្រួសារ សហគមន៍ ប្រទេសជាតិ និងពិភពលោក ។
ក្នុងឱកាសបិទសិក្ខាសាលា លោកឧកញ៉ា អូស្មាន ហាស្សាន់ ក៏បានពាំនាំប្រសាសន៍ផ្តាំផ្ញើការសាកសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលសម្តេច និងលោកជំទាវតែងតែគិតគូពីប្រជាពលរដ្ឋទូទាំងប្រទេស ជាពិសេសប្រជាពលរដ្ឋខ្មែរអ៊ិស្លាម និងយុវជនយើងទាំងអស់ ។ អ្វីដែលយើងទាំងអស់គ្នាត្រេកអរនោះ សហគមន៍អ៊ិស្លាមកម្ពុជាបានមានចំណេះវិជ្ជាខ្ពង់ខ្ពស់ និងមានបទពិសោធន៍ស្របទៅតាមសង្គមជាតិ ដែលមានសន្តិភាពពេញលេញ ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។
លោកឧកញ៉ា អូស្មាន ហាស្សាន់ មានប្រសាសន៍ក្នុងឱកាសបិទសិក្ខាសាលាឱ្យដឹងថា យុវជនអ៊ិស្លាមកម្ពុជាមានតួនាទីសំខាន់ណាស់ក្នុងការចូលរួមអភិវឌ្ឍប្រទេស និងសហគមន៍អាស៊ាន ដែលព្រះរាជាណាចក្រកម្ពុជាបានខិតខំផ្តល់ឱកាសឱ្យយុវជនធ្វើការអភិវឌ្ឍសក្តានុពលយ៉ាងពេញទំហឹង ដើម្បីធានាបាននូវធនធានមនុស្ស ក្នុងការអភិវឌ្ឍសហគមន៍អាស៊ាន ។ បច្ចុប្បន្ននេះ ប្រទេសកម្ពុជាបានផ្តល់អាទិភាពលើការកសាងសមត្ថភាព និងការអភិវឌ្ឍធនធានមនុស្សតាមរយៈផែនការយុទ្ធសាស្ត្រ និងកម្មវិធីអាទិភាពនានា ក្នុងគោលដៅលើកកម្ពស់គុណភាព និងប្រសិទ្ធភាពនៃការអប់រំសម្រាប់គ្រប់កម្រិត ដែលស្របតាមគោលនយោបាយរបស់រាជរដ្ឋាភិបាល ។
លោកអូស្មាន ហាស្សាន់ បានបន្តទៀតថា ដើម្បីឱ្យយុវជនអ៊ិស្លាមកម្ពុជាឆ្ពោះទៅកាន់សហគមន៍អាស៊ានទទួលបានជោគជ័យ យើងជាយុវជនទាមទារមានចំណេះដឹងទាំងផ្នែកចំណេះដឹងទូទៅ ភាសាបរទេស និងជំនាញបច្ចេកទេសច្បាស់លាស់ និងមានគុណភាពការអប់រំ ព្រមទាំងមានបទពិសោធន៍ ។ ដូចនេះ យុវជនត្រូវខិតខំអភិវឌ្ឍខ្លួនក្រេបយកចំណេះដឹង ដើម្បីយកផលចំណេញពីអាស៊ាន និងឈោងចាប់យកឱកាស ដើម្បីចូលរួមអភិវឌ្ឍសហគមន៍ និងប្រទេសជាតិយើងឱ្យកាន់តែរីកចម្រើនថែមទៀត ។ នៅល្ងាចនោះ លោកឧកញ៉ា អូស្មាន ហាស្សាន់ ក៏បានពិសាអាហារស្រាយបួសរួមគ្នាប្រកបដោយភាពស្និទ្ធស្នាលបំផុត បន្ទាប់ពីចប់ម៉ោងបួសអស់រយៈពេល១ថ្ងៃមក ៕