ដោយ ៖ សំរិត ថ្ងៃទី 07 សីហា 2012
ភ្នំពេញ៖ ដើម្បីឆ្លើយតបទៅនិងបញ្ហាភូមិ សង្កាត់មានសុវត្ដិភាព លោក កែប ជុតិមា អភិបាលរាជធានីភ្នំពេញ បានប្រមានដកតំណែងជាចៅសង្កាត់ ប្រសិនបើមិនបានធ្វើវេទិការសាធារណៈជាមួយប្រជាពលរដ្ឋរយៈពេល២ខែជាប់គ្នា ទោះបីចៅសង្កាត់នោះជាបេក្ខជនមកពីគណបក្ស ប្រជាជនយ៉ាងណាក៍ដោយ ហើយលោកគិតថា បញ្ហានេះមិនមែនសង្កាត់នោះជាប់រវល់ ដែលមិនអាច់ធ្វើកិច្ចការនេះមិនបាននោះទេ។ លោកកែប ជុតិមា បានប្រមានបែបនេះដដែលៗក្នុងកិច្ចប្រជុំប្រចាំខែនារសៀលថ្ងៃទី៦ ខែសីហា ឆ្នាំ២០១២ នៅសាលារាជធានីភ្នំពេញ ។
លោក កែប ជុតិមា បានហៅវេទិការសាធារណៈនេះជាកិច្ចការសំខាន់ណាស់ ដែលជាការឆ្លើយឆ្លងរវាងរដ្ឋអំណាចជាមួយនិងប្រជាពលរដ្ឋ ដែលរដ្ឋអំណាចនឹងបានដឹងអំពីព័ត៌មានពិតនៅមូលដ្ឋាន ដោយលោកបានសំណូមពរតាមរយៈវេទិការនេះ ព្រោះយើងដឹងហើយថា នៅរាជធានីភ្នំពេញសព្វថ្ងៃនេះក្លាយទៅជាទីក្រុងដែលគេចាប់អារម្មណ៍ខ្លាំងណាស់ មានទេសចរក៏ច្រើន អ្នកវិនិយោគក៍ច្រើន ហើយក៍កាន់តែមានឈ្មោះល្បីល្បាញ ដូច្នេះយើងត្រូវប្រឹងប្រែងរក្សាសន្ដិសុខសណ្ដាប់ធ្នាប់ ស្ថិរភាពនយោបាយនៅភ្នំពេញឱ្យប្រសើរជាទីបំផុត ។
លោកបន្ដថា លោកដឹងហើយកន្លងមកគ្រាន់តែរឿងចោរឆក់ ប្លន់ ព័ត៌មានគេផ្សាយពាសពេញពិភពលោក ។ យើងមានភារកិច្ចជាច្រើនដែលត្រូវធ្វើទាំងអស់នេះ វាបានឆ្លុះបញ្ចាំងពីភាពគ្រោះថ្នាក់ដែលកើតឡើងពីការធ្វេប្រហែសរបស់អាជ្ញាធរយើង ។ យើងកុំភ្លេចថា កន្លងមកនេះបោះឆ្នោតគេទុកចិត្ដគណបក្សប្រជាជន គឺផ្នែកសំខាន់ណាស់លើស្ថិរភាពន ឮយោបាយ សន្ដិសុខសណ្ដាប់ធ្នាប់នេះឯង ។ លោកក៍បានស្នើឱ្យគណៈបញ្ជាការឯកភាពគ្រប់បណ្ដាខណ្ឌ ពិសេសលោកចៅហ្វាយខណ្ឌទាំងអស់ ត្រូវយកចិត្ដទុកដាក់ណែនាំចៅសង្កាត់ទាំងអស់យកចិត្ដទុកដាក់លើបញ្ហានេះឱ្យបានម៉ត់ចត់ ព្រោះការចូលរួមក្នុងវេទិការសាធារណៈរបស់ប្រជាពលរដ្ឋ ជាការស្ទង់មតិក្នុងការគាំទ្ររបស់គាត់មកលើយើង ហើយបញ្ហានេះក៍ជាការសម្ដែងពីប្រជាប្រិយភាពរបស់យើងទៅសហគមន៍របស់គាត់នឹងបញ្ហាមួយទៀត ដែលសំខាន់នោះ គឺត្រូវយកសំណូមពរបស់ប្រជាពលរដ្ឋដែលបានលើកក្នុងវេទិការឱ្យដោះស្រាយនៅមូលដ្ឋានគាត់ ត្រូវតែដោះស្រាយជាបន្ទាន់ ក្នុងករណីណាដែលធ្ងន់ធ្ងរមិនអាចមានលទ្ធិភាពដោះស្រាយបាន ត្រូវយកសំណូមពរនោះមកឱ្យអាជ្ញាធររាជធានីភ្នំពេញជាបន្ទាន់ ជៀសវាងសំណូមពររបស់គាត់បន្ដពីវេទិការមួយទៅវេទិការមួយទៀតវាមិនមានតម្លៃទេ ។
លោកក៍បានឱ្យដឹងទៀតថា បច្ចុប្បន្នអាជ្ញាធរមូលដ្ឋានមានភារកិច្ចដែលត្រូវទទួលបន្ថែមនៅក្នុងគោលនយោបាយ ភូមិ សង្កាត់មានសុវត្ថិភាព គឺចាស់មាន៥ចំណុចនិងថ្មីមាន៤ សរុប៩ចំណុច ( បន្ថែម៤នោះគឺទី១-គ្មានគ្រោះថ្មាក់ចរាចរ, ទី២-គ្មានគ្រោះថ្នាក់ដោយសារយុទ្ធភណ្ឌ័មិនទាន់ផ្ទុះ, ទី៣-គ្មានវិធានការណ៍ទប់ស្កាត់គ្រប់គ្រង និងឆ្លើយតបចំពោះគ្រោះមហន្ដរាយប្រកបដោយប្រសិទ្ធភាព និងទី៤-គ្មានប៉ុសិ៍្ដត្រួតពិនិត្យខុសច្បាប់ (កុងត្រូលជជុះ) ៕