តាកែវ: ការស្ថាបនាស្ពានថ្មតភ្ជាប់ទំនប់បឹងតាកែវ ដែលស្ថិតនៅក្នុងក្រុងដូនកែវ ខេត្តតាកែវ មកដល់ពេលនេះសម្រេចបាន ៨០ ភាគរយហើយ។ លោក អ៊ុំ អួក ប្រធានមន្ទីរសាធារណការ និងដឹកជញ្ជូនខេត្ត កាលពីថ្ងៃទី៦ ខែសីហា ឆ្នាំ២០១២ បានអញ្ជើញចុះទៅពិនិត្យ និងជំរុញក្រុមហ៊ុនម៉ៅការ ធ្វើយ៉ាងណាអោយការស្ថាបនាបានឆាប់រហ័ស និងអោយហើយរួចរាល់ មុនពេលទឹកឡើងជន់ជោរហូរកាត់ក្រោមស្ពាន ដើម្បីអោយប្រជាពលរដ្ឋងាយស្រួលធ្វើដំណើរទៅមកបាន។
ពេលចុះទៅពិនិត្យ លោក អ៊ុំ អួក ប្រធានមន្ទីរសារធាណការ និងដឹកជញ្ជូនខេត្ត បានអោយដឹងថា ដោយនៅក្នុងឆ្នាំ២០១១ កន្លងទៅនេះ មានគ្រោះទឹកជំនន់យ៉ាងធ្ងន់ធ្ងរ ដែលធ្វើអោយមានការខូចខាតហេដ្ឋារចនាសម្ព័ន្ធជាច្រើន ក្នុងនោះមានស្ពានបេតុងមួយកន្លែង តភ្ជាប់ផ្លូវក្រុងលេខ១២អា (ទំនប់បឹងតាកែវនេះ) ។
លោកនិយាយទៀតថា ដោយមានការយកចិត្តទុកដាក់ពីឯកឧត្តម ស្រី បេន អភិបាលខេត្តតាកែវ និងឯកឧត្តម ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន នៅចុងឆ្នាំ២០១១ បានធ្វើសំណើ និងសំណូមពរទៅរាជរដ្ឋាភិបាល ដើម្បីជួយអន្តរាគមន៍។ បន្ទាប់មកគណៈប្រតិភូអន្តរក្រសួងមួយក្រុម ដឹកនាំដោយឯកឧត្តម គាត ឈន់ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចុះពិនិត្យលើការខូចខាតនេះ កាលពីថ្ងៃទី១២ ខែតុលា ឆ្នាំ២០១១ ហើយបានឯកភាពផ្តល់ជូនថវិការបស់រាជរដ្ឋាភិបាល តាមរយៈក្រសួងសាធារណការ និងដឹកជញ្ជូន ដើម្បីសាងសង់ស្ពាននេះឡើងវិញ ដែលមានប្រវែងសរុប ៤៥ម៉ែត្រ គុណនឹង ១០ម៉ែត្រ ធ្វើពីបេតុង លើថវិកាសរុបប្រមាណ ១.៩៧៥ លានរៀល ដែលបានចាប់ដំណើរការសាងសង់កាលពីអំឡុងខែកុម្ភៈ ឆ្នាំ២០១២ កន្លងទៅនេះ មកទល់ពេលនេះសម្រេចបានប្រមាណ ៨០ ភាគរយហើយ និងគ្រោងបញ្ចប់នៅមុនរដូវទឹកឡើងខាងមុខនេះ។
លោក អ៊ុំ អួក បានបញ្ជាក់ថា បើការសាងសង់ស្ពាននេះមិនទាន់រួចរាល់ មន្ទីរនឹងធ្វើស្ពានដែកបាលឡេនៅផ្លូវវាង សម្រាប់អោយប្រជាពលរដ្ឋចរាចរឆ្លងកាត់ មិនអោយស្ទះទេ៕
