ដោយ ៖ ថ្ងៃទី 07 សីហា 2012ម៉ោង 15:33:32
មានគេរាយការណ៍ថា លោក ជា រុំ មេភូមិរងភូមិរស្មីសាមគ្គី ឃុំជាំសង្កែ ស្រុកភ្នំស្រួច ខេត្ដកំពង់ស្ពឺ កំពុងកាក់កបយ៉ាងសម្បើមនៅក្នុងឱកាសនៃពេល ដែលក្រុមយុវជនសម្ដេចតេជោចុះទៅវាស់វែងដីធ្លី គឺលោកជា រុំ ជាអ្នកដែល ចេញមុខរៃអង្គាសប្រមូលថវិកាពីប្រជាពលរដ្ឋក្នុងភូមិ ដើម្បីជួយឧបត្ថម្ភអ្នកចុះ ទៅវាស់ដី និងបើមិនបង់ប្រាក់ទេ មិនបានប្លង់កម្មសិទ្ធិឡើយ។
ប្រភពខ្សឹបថា ប្រជាពលរដ្ឋក្នុង១គ្រួសារត្រូវបង់ប្រាក់ជូនលោកជា រុំ ៤០ម៉ឺន រៀល ឬ១០០ដុល្លារអាមេរិក ដើម្បីបានចុះឈ្មោះជាសមាជិកក្នុងភូមិប្រយោជន៍ ទទួលបានដីក្នុង១គ្រួសារទំហំ៥ហិកតា ។ ប្រភពរាយការណ៍ថា លោក ជា រុំ ពេល នេះ ថែមទាំងបានហៅអ្នកភូមិផ្សេងៗឱ្យមកចុះឈ្មោះជាសមាជិកភូមិរស្មីសាមគ្គី ដើម្បីទទួលយកដីទំហំ៥ហិកតានោះផង។
លោកជា រុំ កំពុងតែធ្វើព្យុះភ្លៀងក្នុងភូមិដែលនាំឱ្យប្រជាពលរដ្ឋមានការភ័យ ខ្លាច ហើយបង្ខំចិត្ដយកប្រាក់ឱ្យទៅលោក។ លោកបាននិយាយថា បើប្រជាពលរដ្ឋ មិនបង់ប្រាក់នោះ នឹងដកហូតយកដីកម្មសិទ្ធិ ដែលត្រូវបានប្រគល់ឱ្យអ្នកផ្សេង។ មិនតែប៉ុណ្ណោះ លោកមិនដែលរវល់ពីសុខទុក្ខរបស់ប្រជាពលរដ្ឋនិងការអភិវឌ្ឍ មូលដ្ឋាននោះឡើយ។
ប្រជាពលរដ្ឋនៅភូមិរស្មីសាមគ្គីដែលពីមុនគេហៅភូមិតានក ស្មើសុំឱ្យអាជ្ញា ធរស្រុកភ្នំស្រួចពិនិត្យករណីលោកជា រុំ នោះផង ពីព្រោះពេលនេះ លោកកំពុងជិះ សេះលែងដៃដើរប្រមូលយកលុយកាក់ពីប្រជាពលរដ្ឋតាមភូមិតាមចិត្ដ ៕