ដោយ ៖ សំរិត ថ្ងៃទី 07 សីហា 2012
ភ្នំពេញ៖ ដើម្បីបង្ការនិងទប់ស្កាត់ជាមុនគ្រោះមហន្ដរាយ ដោយទឹកជំនន់នៅរដូវវស្សាឆ្នាំ២០១២នេះដែលនឹងអាចបង្កផលលំបាកដល់ប្រជាពលរដ្ឋរស់នៅក្នុងរាជធានីភ្នំពេញនោះនាព្រឹកថ្ងៃទី៧ខែសីហា លោក កែប ជុតិមា អភិបាលរាជធានីភ្នំពេញនិងមន្ដ្រី ក្រោមឱវាទបានចុះត្រួតពិនិត្យគោលដៅស្ថានីយ៏បូមទឹកសំខាន់ៗនៅភាងខាងជើងរាជធានីដើម្បីត្រៀមលក្ខណៈប្រតិបត្ដិការណ៏បូមទឹករំដោះពេលមានទឹកជំនន់ក្នុងរដូវភ្លៀងខាងមុខនេះ ។
តាមការបញ្ជាក់ឱ្យដឹងពីលោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ ក្នុងឱកាសចុះត្រួតពិនិត្យនោះថា មន្ដ្រីដែលពាក់ពន្ធ័ទទួលខុសត្រូវធន ធានទឹកនិងអាជ្ញាធររាជធានី អាជ្ញាធរខណ្ឌ សង្កាត់ទាំងអស់បានត្រៀមលក្ខណៈជាកម្លាំង សម្ភារ មួយចំនួនរួចជាស្រេចហើយ ដើម្បីបង្កាជួយសង្គ្រោះរំដោះទឹកជំនន់ចេញពីតំបន់ដែលងាយរងគ្រោះក្នុងរាជធានី ជាពិសេសនៅតំបន់ភាគខាងជើងរាជធានីភ្នំពេញ ។ តាមការព្យាករណ៏ទុកសំរាប់រាជធានីភ្នំពេញឆ្នាំនេះ គឺទឹកមានសភាពធំជាងឆ្នាំកន្លងទៅ ហើយអាចគំរាមកំហែងជន់លិចតំបន់ដែលងាយរងគ្រោះមួយចំនួននៅភាគខាងជើងមានខណ្ឌឬស្សីកែវ ខណ្ឌសែនសុខ និងខណ្ឌពោធិ៏សែនជ័យ និងអាចបង្កលក្ខណៈជន់លិចនៅតំបន់ទំនាបនៅ ខណ្ឌដែលជុំវិញរាជធានីភ្នំពេញដូច្នេះហើយទើបអាជ្ញាធរ រួមជាមួយមន្ដ្រីដែលពាក់ពន្ធ័ទាំងអស់មួយចំនួនបានត្រៀមមធ្យោបាយ គ្រប់យ៉ាងដើម្បីជួយរំលែកសង្គ្រោះប្រជាពលរដ្ឋដែលបង្កហានីភ័យដោយទឹកជំនន់ខាងលើ ។
លោក កែប ជុតិមា អភិបាលរាជធានីភ្នំពេញបានបញ្ជាក់ថា ដើម្បីបង្កានូវគ្រោះធម្មជាតិជាទឹកជំនន់ដូចកាលពីឆ្នាំ២០១១កន្លងមកនៅរាជធានីភ្នំពេញ មានស្ថានីយ៏បូមទឹកធំៗ១០គោលដៅរួចហើយ ។ ស្ថានីយ៏បូមទឹកដែលសំខាន់ជាងគេនោះគឺស្ថានីយ៏នៅទំនប់កប់ស្រូវ និងស្ថានីយ៍បូមទឹកនៅគីឡូម៉ែត្រលេខ៩ នៅភាគខាងជើងរាជធានី។ រីឯស្ថានីយ៍៨ទៀតកំពុងត្រៀមលក្ខណៈរួចហើយដែរ ដូចជាស្ថានីយ៏បឹងទំពន់ ស្ថានីយ៏មាតទន្លេទី១ ទី២ ទី៣និងទី៤ ស្ថានីយ៏ទួលគោក ស្ថានីយ៏គីឡូម៉ែត្រលេខ៦និងលេខ៩ និងស្ថានីយ៏ព្រែកតាពៅ ។
លោកបន្ដថា ការត្រៀមលក្ខណៈជួយសង្គ្រោះនោះ យើងបានចុះសាកល្បងម៉ាស៊ីនបូមទឹកទាំង១០ស្ថានីយ៏នៅក្នុងរាជធានីភ្នំពេញជាមុន ដូចជាការត្រួតពិនិត្យម៉ាស៊ីន ត្រួតពិនិត្យក្បាលបូម និងប្រពន្ធ័ខ្សែភ្លើង និងជាពិសេសប្រេងម៉ាស៊ីន ការស្ដារបាត ប្រឡាយ និងកាយសំរាម និងស្ដារដីពីបាតប្រឡាយជាដើម ការត្រៀមលក្ខណៈនេះ យើងចាប់ផ្ដើមធ្វើបណ្ដើរៗនូវស្ថានីយ៏ដែលសំខាន់ៗជាមុន ប៉ុន្ដែនិងត្រូវឱ្យរួចរាល់ក្នុងរយៈពេលមូយសប្ដាហ៏ ។
លោកមានជំនឿថា សម្រាប់រាជធានីភ្នំពេញឆ្នាំនេះ ទឹកជំនន់មិនអាចគំរាមកំហែងធ្ងន់ធ្ងររំខានការរស់នៅរបស់ប្រជាពលរដ្ឋ ដែលធ្លាប់បានគំរាមកំហែងកាលពីឆ្នាំ២០១១កន្លងមកនោះទេ ព្រោះអាជ្ញាធររាជធានីភ្នំពេញបានសាងសង់បន្ថែមនូវស្ថានីយ៏បូមទឹកធំចំនួន២រួចហើយ គឺស្ថានីយ៏បូមទឹកទំនប់កប់ស្រូវ និងស្ថានីយ៍ប្របមាតទន្លេទី១ ,២, ៣, ៤ ព្រមទាំងសាងសង់នូវបណ្ដាញលូអក្សអ៊ុយ ដែលមានទំហំធំជាងមុនផងដែរ ៕