ខេត្តឧត្តរមានជ័យ៖ ឧកញ៉ាលី យ៉ុងផាត់ អនុប្រធានក្រុមការងារគណៈកម្មាធិការកណ្តាលគណបក្សប្រជាជនកម្ពុជាចុះជួយខេត្តឧត្តរមានជ័យ និងជាប្រធានក្រុមការងារចុះជួយក្រុងសំរោង រួមជាមួយលោក លួន អាន អភិបាលខេត្ត លោក ថុន ណុល អភិបាលក្រុងសំរោង កាលពីព្រឹកថ្ងៃទី២ សីហា កន្លងទៅ បានដឹកនាំក្រុមការងារគណបក្សប្រជាជនកម្ពុជាចុះសាកសួរសុខទុក្ខ និងនាំយកគ្រឿងឧបភោគបរិភោគទៅឧបត្ថម្ភដល់ក្រុមយុវជនស្ម័គ្រចិត្តសម្តេចតេជោ ដែលកំពុងបំពេញការងារវាស់វែងដីធ្លីជូនប្រជាពលរដ្ឋ នៅភូមិផ្លុង សង្កាត់កូនក្រៀល ក្រុងសំរោង ។
លោក វាត់ ប៉ារ៉ានីន មន្ត្រីសម្របសម្រួលក្រុមនិស្សិតប្រចាំខេត្តឧត្តរមានជ័យ ជំនួសមុខឱ្យក្រុមនិស្សិតទាំងអស់ បានមានមតិស្វាគមន៍ចំពោះគណៈប្រតិភូដែលបានយកចិត្តទុកដាក់ចុះសាកសួរសុខទុក្ខ និងនាំយកអំណោយមកជួយផ្គត់ផ្គង់ដល់ក្រុមនិស្សិត ។ ជាមួយនេះក៏បានថ្លែងអំណរគុណយ៉ាងជ្រាលជ្រៅដល់សម្តេចតេជោ និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលសម្តេចតេជោ និងលោកជំទាវ តែងតែយកចិត្តទុកដាក់ដល់ក្រុមនិស្សិតដែលកំពុងបំពេញបេសកកម្មក្នុងការវាស់វែងដីធ្លីជូនប្រជាពលរដ្ឋ ។
លោកឧកញ៉ា លី យ៉ុងផាត់ បានពាំនាំនូវការសួរសុខទុក្ខពីសំណាក់សម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ជូនដល់ក្រុមនិស្សិតស្ម័គ្រចិត្ត ដែលកំពុងបំពេញបេសកកម្មវាស់វែងដីធ្លីជូនប្រជាពលរដ្ឋក្នុងខេត្តឧត្តរមានជ័យ ។ នាឱកាសនោះ លោកឧកញ៉ាក៏បានផ្តល់អំណោយឧបត្ថម្ភដល់ក្រុមនិស្សិតមានអង្ករចំនួន១តោន មីចំនួន១០កេសធំ ត្រីខចំនួន១០កេសធំ ទឹកត្រីចំនួន១០ឡូ ប៊ីចេងចំនួន១០គីឡូក្រាម ទឹកបរិសុទ្ធចំនួន១០០យួរ សាច់ជ្រូកចំនួន២០គីឡូក្រាម សាច់គោចំនួន៣០គីឡូក្រាម ។ ដោយឡែកចំពោះនិស្សិតចំនួន៥០នាក់ ក្នុងម្នាក់ៗទទួលបានថវិកា៥០ម៉ឺនរៀល ៕