រាជធានីភ្នំពេញ ៖ ប្រជាពលរដ្ឋចំនួន៣ភូមិដែលរស់នៅជាប់របងអាកាសយានដ្ឋានភ្នំពេញអន្តរជាតិ ស្ថិតក្នុងសង្កាត់ចោមចៅបានធ្វើការតវ៉ាសុំឱ្យអាជ្ញាធររាជធានីភ្នំពេញ និងសង្កាត់ចោមចៅជួយដោះស្រាយនូវផលប៉ះពាល់ ខណៈពេលដែលអាជ្ញាធរចាប់ផ្តើមវាស់វែងដីពង្រីករបងអាកាសយានដ្ឋានប៉ះដីលំនៅឋានរបស់ពួកគាត់ ។
នៅព្រឹកថ្ងៃទី៧ សីហា ២០១២ មានប្រជាពលរដ្ឋជាង៤០នាក់តំណាងឱ្យប្រជាពលរដ្ឋ៣ភូមិខាងលើបាននាំគ្នាធ្វើដំណើរទៅកាន់សាលាសង្កាត់ចោមចៅ ធ្វើការតវ៉ាដោយសន្តិវិធីដោយពួកគាត់ស្នើសុំឱ្យអាជ្ញាធរជួយដោះស្រាយនូវផលប៉ះពាល់នានាខាងលើនោះ ។ ប្រជាពលរដ្ឋម្នាក់ឈ្មោះភួង សុភាព ភេទស្រី អាយុ៣៨ឆ្នាំបាននិយាយថា ប្រជាពលរដ្ឋដែលរងផលប៉ះពាល់ពីការពង្រីករបងអាកាសយានដ្ឋាននោះមានចំនួន៣ភូមិហើយកន្លងមកសាលារាជធានីភ្នំពេញ បានចេញសេចក្តីជូនដំណឹងឱ្យប្រជាពលរដ្ឋទាំងអស់ដែលមានទីលំនៅជាប់របងអាកាសយានដ្ឋានភ្នំពេញអន្តរជាតិ រុះរើចេញពីរបងអាកាសយានដ្ឋានចម្ងាយ១០ម៉ែត្រ ដើម្បីយកកន្លែងពង្រីកអាកាសយានដ្ឋាន។
នៅពេលនោះពួកគាត់ទាំងអស់គ្នាបានធ្វើការតវ៉ាយ៉ាងស្វិតស្វាញ ទើបក្រោយមកមានការបន្ធូរបន្ថយនៅត្រឹមចម្ងាយ៥ម៉ែត្រវិញ។ ប៉ុន្តែទោះបីជាបែបនេះក្តីក៏នៅតែមានការប៉ះពាល់ដល់លំនៅឋានរបស់ពួកគាត់ស្ទើរតែទាំងស្រុងដែរ ទើបមកសុំឱ្យអាជ្ញាធរជួយ។