រាជធានីភ្នំពេញ ៖ ក្រសួងទេសចរណ៍នៃព្រះរាជាណាចក្រកម្ពុជា បានចេញនូវរបាយការណ៍ស្ថិតិទេសចរណ៍ដោយបង្ហាញថា ក្នុងរយៈពេល៦ខែដើមឆ្នាំ២០១២ នេះ កម្ពុជាទទួលបានភ្ញៀវទេសចរអន្តរជាតិប្រមាណ១.៧៥៦.៦៥២នាក់ កើនឡើង២៦,៨% បើធៀបរយៈពេលដូចគ្នានៃឆ្នាំ២០១១ ។ ដោយឡែកក្នុងអំឡុងខែមិថុនា ២០១២ នេះភ្ញៀវទេសចរអន្តរជាតិមកទស្សនាកម្ពុជាមានចំនួន២៥០.៩១៨នាក់កើនឡើង២៩,៨% បើធៀបនឹងខែមិថុនា ឆ្នាំ២០១១ ។
តាមរបាយការណ៍ក្នុងចំណោមភ្ញៀវទេសចរអន្តរជាតិមកទស្សនារយៈពេល៦ខែដើមឆ្នាំ២០១២ នេះគឺបានបែងចែកភ្ញៀវទេសចរចូលតាមផ្លូវអាកាសមានចំនួន៨៥០.៨៧៩នាក់ស្មើនឹង៤៨,៤% ក្នុងនោះតាមច្រកភ្នំពេញ ៣៤៣.២៨៦នាក់ស្មើនឹង១៩,៥% និងតាមច្រកសៀមរាប ៥០៧.៥៩៣នាក់ស្មើនឹង២៨,៩% ។
មន្ត្រីក្រសួងទេសចរណ៍បានបញ្ជាក់ថា ភ្ញៀវទេសចរអន្តរជាតិភាគច្រើនដែលចូលមកទស្សនាកម្ពុជាក្នុងរយៈពេល៦ខែនេះរួមមានភ្ញៀវមកពីប្រទេសវៀតណាម កូរ៉េ ចិន ឡាវ ថៃ អាមេរិក ជប៉ុន បារាំង អូស្ត្រាលី និងអង់គ្លេស។ ប៉ុន្តែតាមតួលេខគឺភ្ញៀវមកពីប្រទេសវៀតណាម ស្ថិតនៅក្នុងលំដាប់ថ្នាក់លេខ១ បន្ទាប់មកគឺភ្ញៀវមកពីប្រទេសកូរ៉េ ។ យ៉ាងណាក៏ដោយមន្ត្រីរូបនោះបានអះអាងថា ភ្ញៀវទេសចរដែលមកពីតាមបណ្តាប្រទេសទាំង១០ខាងលើនេះ គឺសុទ្ធតែមានចំនួនកើនឡើងជាបន្តបន្ទាប់បើប្រៀបធៀបរយៈពេលដូចគ្នានៃឆ្នាំ២០១១ ។
ទន្ទឹមនឹងនោះភ្ញៀវទេសចរកម្ពុជាដែលបានចេញទៅក្រៅប្រទេសសម្រាប់ដើមឆ្នាំ២០១២ នេះមានចំនួន៣៨៨.៩៤៧នាក់កើនឡើង៣២,៧% ធៀបនឹងរយៈពេលដូចគ្នានៃឆ្នាំ២០១១ ផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕