កំពង់ចាមៈ រថយន្តស៊ីរ៉ែនមួយគ្រឿង ម៉ាកកាមរី ដែលជាអំណោយរបស់លោក ឧត្តមសេនីយ៍ ឆាយ គឹមសុន ស្នងការនគរបាលខេត្តកំពង់ចាម ត្រូវបានប្រគល់ជូនលោក វរសេនីយ៍ត្រី កែវ ស៊ាងហ៊ាន់ អធិការនគរបាល ស្រុកព្រៃឈរ កាលពីព្រឹក ថ្ងៃទី៧ ខែសីហា ឆ្នាំ២០១២ នៅស្នងការដ្ឋាននគរបាល ខេត្តកំពង់ចាម។
ស្នងការនគរបាលខេត្ត លោក ឆាយ គឹមសុន បានមានប្រសាសន៍អោយដឹងថា រថយន្តមួយគ្រឿងដែលជា អំណោយរបស់លោក បានប្រគល់ជូនអធិការដ្ឋាននគរបាល ស្រុកព្រៃឈរ នាពេលនេះគឺទុកអោយសមត្ថកិច្ច នគរបាលមូលដ្ឋានយកទៅប្រើប្រាស់ក្នុងអង្គភាព ដើម្បីបម្រើការងារ ក្នុងការចុះល្បាតតាមបណ្តា គោលដៅសំខាន់ៗ ថែរក្សាសន្តិសុខ សុវត្ថិភាពជូនប្រជាពលរដ្ឋ នៅក្នុងមូលដ្ឋានរបស់ខ្លួន។
លោកស្នងការ បានមានប្រសាសន៍ឲ្យដឹងទៀតថា នេះជាលើកទី២ហើយ ដែលលោកបានប្រគល់អំណោយរថយន្ត ដល់កម្លាំងនគរបាលអធិការស្រុក ហើយលើកទី១នោះ គឺលោកបានប្រគល់រថយន្តស៊ីរ៉ែន មួយគ្រឿងដែរ ជូនដល់អធិការដ្ឋាននគរបាលស្រុកអូរាំងឪ។ លោក ឧត្តមសេនីយ៍ បានអោយដឹងផងដែរថា នៅក្នុងខេត្តកំពង់ចាម នាពេលបច្ចុប្បន្ន ស្ថានភាពសន្តិសុខ មានស្ថេរភាពល្អ ហើយបទល្មើសស្ទើរតែគ្រប់ករណី គឺមានការថយចុះជាលំដាប់ ប៉ុន្តែបើទោះជាយ៉ាងនោះក្តី លោកនៅតែពង្រឹង ដល់កម្លាំងសមត្ថកិច្ចនគរបាលទូទាំងខេត្ត ខិតខំធ្វើយ៉ាងណា បន្តកិច្ចការបង្រាបបទល្មើសផ្សេងៗ អោយស្របទៅនឹងគោលនយោបាយ ភូមិឃុំមានសុវត្ថិភាពរបស់រាជរដ្ឋាភិបាល។
លោកស្នងការក៏បានអោយដឹងផងដែរថា គ្រប់ប្រតិបត្តិការបង្ក្រាប ទោះជាបង្ក្រាបបានករណីតូច ឬធំ លោកតែងតែផ្តល់ជាថវិកាផ្ទាល់ខ្លួន ដើម្បីលើកទឹកចិត្ត ដល់កម្លាំងនគរបាលក្រោមឱវាទ ដែលបានចុះបំពេញការងារគ្រប់ករណី៕
