កម្ពុជាទទួលភ្ញៀវទេសចរអន្តរជាតិ បានជាង ១ លាន ៧ សែននាក់
ក្នុងរយ:ពេល ០៦ ខែ នៃឆ្នាំ២០១២ នេះ
មន្រ្តីក្រសួងទេសចរណ៍កម្ពុជា បានអះអាងថា ចំនួនភ្ញៀវទេសចរ អន្តរជាតិដែលចូលមកទស្សនាក្នុងប្រទេសកម្ពុជា ក្នុងរយ:ពេល ៦ ខែ នៃឆ្នាំ ២០១២ នេះ បានឈានរហូតដល់ជាង ១ លាន ៧ សែននាក់ គឺកើនឡើងជាង ២៦ ភាគរយ បើប្រៀបធៀបនឹងរយ:ពេលដូចគ្នានៃឆ្នាំ ២០១១ កន្លងទៅ ។ លោក គង់ សុភារ័ក្ស ប្រធាននាយកដ្ឋានស្ថិតិ និង ព័ត៌មាននៃក្រសួង ទេសចរណ៍ បាន ឲ្យដឹងថា ក្នុងរយ:ពេល ៦ ខែដើមឆ្នាំ ២០១២ នេះ ភ្ញៀវទេសចរអន្តរជាតិដែលចូលមកទស្សនាក្នុងប្រទេសកម្ពុជា មានចំនួន ១ លាន ៧ សែន ៦ ម៉ឺននាក់ ដែលមានកំណើនកើនឡើងចំនួន ២៦,៨ ភាគរយ បើ ប្រៀបធៀបនឹងរយ:ពេលដូចគ្នានៃឆ្នាំ ២០១១ ។
លោក គង់ សុភារ័ក្ស មានប្រសាសន៍ថា ក្នុងចំណោមភ្ញៀវទេសចរ អន្តរជាតិទាំងនោះ ភ្ញៀវទេសចរជាជនជាតិវៀតណាមមានចំនួនច្រើនជាងគេបំផុត បន្ទាប់មកទៀត គឺភ្ញៀវទេសចរជាជនជាតិកូរ៉េជាប់លំដាប់លេខ ២ ហើយភ្ញៀវ ទេសចរជាជនជាតិបានជាប់លំដាប់លេខ ៣ ។
លោក គង់ សុភារ័ក្ស បានបន្តថា ចំណែកតំបន់ទេសចរណ៍ដែលទទួលបាន ភ្ញៀវទេសចរអន្តរជាតិច្រើនជាងគេបំផុត គឺខេត្តសៀមរាប បន្ទាប់មក គឺរាជធានី ភ្នំពេញ និង ខេត្តព្រះសីហនុ ។
ទាក់ទិននឹងមូលហេតុដែលនាំឲ្យកម្ពុជាទទួលបាននូវកំណើននៃភ្ញៀវទេសចរអន្តរជាតិក្នុងរយ:ពេល ៦ ខែដើមឆ្នាំ ២០១២ នេះវិញ លោក គង់ សុភារ័ក្ស បានលើកឡើងនូវកត្កាមួយចំនួន ដូចជាកត្តានយោបាយ និង កត្តាបែបបទនៃការ ធ្វើដំណើរចេញចូលកម្ពុជាជាដើម ។
វិស័យទេសចរណ៍ ជាវិស័យមួយដ៏មានសក្តានុពលសម្រាប់ជួយទ្រទ្រង់វិស័យ សេដ្ឋកិច្ចជាតិកម្ពុជា ជាក់ស្តែងកាលពីឆ្នាំ ២០១១ កម្ពុជាទទួលបានភ្ញៀវទេសចរ អន្តរជាតិចំនួនជាង ០២ លាន ០៨ សែន នាក់ និង ទទួលបានចំណូលពីវិស័យនេះ ជិត ២ ពាន់លានដុល្លារអាមេរិក ។
កាលពីខែមុន សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានបង្ហាញនូវការរំពឹងថា នៅឆ្នាំ ២០២០ ខាងមុខ ការ មកដល់នៃភ្ញៀវទេសចរអន្តរជាតិ អាចកើនឡើងដល់ ៧ លាននាក់ និង នាំមកនូវ ចំណូលសរុបប្រមាណ ៥ ពាន់លានដុល្លារ ហើយបង្កើននូវឱកាសការងារបាន ប្រមាណ ៨០ ម៉ឺននាក់ ៕