ភ្នំពេញ: មន្ត្រីរាជរដ្ឋាភិបាលកម្ពុជា ពុំបានសម្តែងនូវការភ្ញាក់ផ្អើល ចំពោះការព្រមានពីសំណាក់ក្រុមមន្ត្រីគណបក្សសង្គ្រោះជាតិ ដែលមិនទាន់បង្កើតចេញជារូបរាងបានផងនោះ បែរជាព្រមានធ្វើពហិការមិនចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៥ នៅឆ្នាំ២០១៣។ មន្ត្រីរាជរដ្ឋាភិបាលនិយាយថា បើគណបក្សប្រឆាំងថ្មី មិនចូលរួមការបោះឆ្នោត នឹងមិនប៉ះពាល់លទ្ធិប្រជាធិបតេយ្យនៅក្នុងប្រទេសកម្ពុជាឡើយ។
លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី នៅរសៀលថ្ងៃទី២០ ខែសីហា ឆ្នាំ២០១២ បានមានប្រសាសន៍បញ្ជាក់ថា ការប្រកាសដកថយ មិនចូលរួមនៅក្នុងការបោះឆ្នោតជ្រើសតាំងអ្នកតំណាងរាស្ត្រ នាឆ្នាំ២០១៣ ដោយគណបក្សសង្គ្រោះជាតិ ដែលជាគណបក្សប្រឆាំងរួបរួមថ្មីនោះ វាមិនមែនជារឿងចម្លែកទេ ហើយការមិនចូលរួមបោះឆ្នោតរបស់គណបក្សនោះ មិនបានធ្វើឲ្យប៉ះពាល់ដល់ដំណើរការលទ្ធិប្រជាធិបតេយ្យ នៅកម្ពុជាឡើយ។ កត្តានេះ ក៏ពុំចោទជាឧបសគ្គដែរ ពីព្រោះមានគណបក្សនយោបាយជាច្រើនទៀត ចូលរួមក្នុងការបោះឆ្នោតជ្រើសតាំងតំណាងរាស្ត្រ។
លោក ទិត សុធា បានបន្ថែមថា "ចំពោះបុគ្គល សម រង្ស៊ី ខ្លួនឯង បានដឹងច្បាស់ណាស់ គឺសិទ្ធិនយោបាយរបស់គាត់ត្រូវបានចប់ ហើយការជាប់ទោសក្នុងបទល្មើសព្រហ្មទណ្ឌ គឺច្បាប់មិនអនុញ្ញាតឲ្យមានសិទ្ធិចុះឈ្មោះចូលរួមបោះឆ្នោត និងមិនអាចឈរឈ្មោះឲ្យគេបោះឆ្នោតឲ្យបានដែរ"។
លោក ទិត សុធា បានបញ្ជាក់ទៀតថា "ផ្ទុយទៅវិញ គណបក្សថ្មីរបស់ក្រុមប្រឆាំង គឺបានបរាជ័យមុនពេលចាប់កំណើត។ បើសិនគ្មានគណបក្សនយោបាយមួយចូលរួម មិនមែនមានន័យថា គ្មានការបោះឆ្នោតនោះទេ គឺការបោះឆ្នោតនៅតែដំណើរការទៅជាធម្មតា"។
លោក ទិត សុធា បានបន្ថែមថា "រឿងកំហុសបុគ្គល សម រង្ស៊ី ម្នាក់ មិនអាចយកមកបំផ្លាញលទ្ធិប្រជាធិបតេយ្យនៅកម្ពុជាដ៏រឹងមាំបាននោះទេ ពីព្រោះនេះជាសិទ្ធិផ្ទាល់ខ្លួនរបស់លោក សម រង្ស៊ី ដែលមិនមាននីតិសម្បទាគ្រប់គ្រាន់តាមផ្លូវច្បាប់ ក្នុងការចូលរួមប្រកួតប្រជែងក្នុងការបោះឆ្នោត មិនមែនបានន័យថា ខ្លួនជាទណ្ឌិតមិនបានបោះឆ្នោត បែរជាស្រែកថា ដំណើរការអនុវត្តលទ្ធិប្រជាធិបតេយ្យនៅកម្ពុជា ត្រូវបំផ្លាញឡើយ"។
ក្នុងសន្និសីទកាសែត កាលពីរសៀលថ្ងៃទី២០ ខែសីហា ឆ្នាំ២០១២ គណបក្សប្រឆាំង ស្នើឲ្យមានការរុះរើសមាសភាពដឹកនាំគណៈកម្មាធិការជាតិរៀបចំការបោះឆ្នោត (គ.ជ.ប.) នៅមុនការបោះឆ្នោត ខែកក្កដា ឆ្នាំ២០១៣ ដែលចាប់ពីពេលនេះទៅ មានរយៈពេល ៩ខែ ទៀតនោះ។ ចំពោះរឿងនេះ លោក ទិត សុធា បានបញ្ចេញប្រតិកម្ម ច្រានចោលថា ការទាមទាររបស់គណបក្សប្រឆាំង ឲ្យមានការុះរើសមាសភាពដឹកនាំ គ.ជ.ប. នោះ ជាបទចម្រៀងដដែលៗ ដែលខ្លួនឯងភ្លេចថា សមាជិករបស់គណបក្សប្រឆាំង មានវត្តមាននៅក្នុងក្បាលម៉ាស៊ីនដឹកនាំ គ.ជ.ប. ដែរ មិនមែនមានតែសមាជិកគណបក្សកាន់អំណាចទេ។
លោក ទិត សុធា បានចាត់ទុកការទាមទារដដែលៗ របស់គណបក្សប្រឆាំង ក្នុងរឿងផ្លាស់ប្តូរសមាសភាព គ.ជ.ប. ថាគឺជាបទចម្រៀងដដែល របស់ក្រុមដែលចាញ់។
ជាការកត់សម្គាល់ នៅក្នុងសន្និសីទកាសែតរួមគ្នា រវាងគណបក្សសមរង្ស៊ី និងគណបក្សសិទ្ធិមនុស្ស កាលពីរសៀលថ្ងៃទី២០ ខែសីហា ឆ្នាំ២០១២ លោក ប៉ុល ហំម តំណាងស្ថាបនិកគណបក្សសង្គ្រោះជាតិ បានលើកឡើងពីការព្រមានធ្វើពហិការ របស់គណបក្សប្រឆាំងរួបរួមថ្មីនេះ ដោយមិនចូលរួមបោះឆ្នោតជ្រើសតាំងអ្នកតំណាងរាស្ត្រ អាណត្តិទី៥ នាឆ្នាំ២០១៣ ទេ ក្នុងករណីដែលលោក សម រង្ស៊ី ប្រធានគណបក្សសង្គ្រោះជាតិ មិនមានលទ្ធភាពវិលចូលមាតុប្រទេស សម្រាប់ការប្រកួតប្រជែងក្នុងការបោះឆ្នោតបាននោះ ហើយពេលនោះ លទ្ធផលនៃការបោះឆ្នោត នឹងគ្មានការទួលស្គាល់ពីសហគមន៍អន្តរជាតិ។
ជាមួយនោះដែរ គណបក្សប្រឆាំងរួបរួមថ្មី ដែលទើបតែទៅចុះបញ្ជីនៅក្រសួងមហាផ្ទៃ នាថ្ងៃទី២០ ខែសីហា ឆ្នាំ២០១២ ក៏ទាមទារឲ្យមានការផ្លាស់ប្តូរសមាសភាពដឹកនាំ នៃគណៈកម្មាធិការជាតិរៀបចំការបោះឆ្នោតផងដែរ ដោយជ្រើសរើសបុគ្គលដែលគណបក្សនយោបាយ អាចជឿទុកចិត្តបាន ឬក៏សមាជិកគណបក្សនយោបាយ ដែលមានអាសនៈនៅរដ្ឋសភា។ ការធ្វើបែបនេះ ដើម្បីអ្វីដែលគណបក្សប្រឆាំងលើកឡើងថា ដើម្បីឲ្យការបោះឆ្នោតធ្វើឡើងដោយសេរី យុត្តិធម៌ និងអាចទទួលយកបានទាំងអស់គ្នា៕ .
